$یەکهەڵوێستی و سەرکەوتنی فراکسیۆنەکان و پاشەکشەی موزایەدەخوازان$
#مەلا بەختیار#
#24-01-2019#
خۆشحاڵم، دوێنێ‌ شە و #23-01-2019# فراکسیۆنە کوردستانییەکان، بە یەکهەڵوێستی کوردایەتییان، داکۆکییان لە زیادکردنی بودجەی کوردستان، لەبوارەکانی مووچە و فەرمانبەران و پێشمەرگە کرد و سەرەنجام، توانییان، یەکێک لە کێشە بنەڕەتییەکانی نێوان هەرێم و بەغدا، کە ساڵەهایە، بەناکۆکی ماوەتەوە، چارەسەر بکەن. ئەمەش، هاوکاتی هەنگاوە سیاسییەکانی تری دوای هەڵبژاردنی پەڕڵەمانی ئێراق، دەریانخست چارەسەری ستراتیژی ئابووری، بەغداە.
ئەم یەکهەڵوێستییە، ڕەگ‌ و ڕیشەی دەگەڕێتەوە بۆ ئەو سیاسەتە ئابوورییەی حکومەتی هەرێمیش، وەکوو شایستە داراییەکانی کوردستان، ساڵەهایە داوایکردووە، بەڵام کاریگەریی تایفەگەری لەسەر حوکمڕانی ئێراق، وایان کردبوو، پێچەوانەی ئەو شایستە بژێوییە بسەپێنێ‌. ئەمە لەکاتێکدا، پێشمەرگەی کوردستان، لەکاتی تێکشکانی سوپای ئێراقدا، سەنگەرەکانی پێشەوەی بەرەنگاری گرتبوو. کەچی دەوڵەتمەدارانی ئێراق زەق زەق خوێنی ڕژاوی پێشمەرگە و کەژاوەی بەڕێکراوی شەهیدانیان دەدی، بەڵام ئەقڵیەتی تایفەگەری و پیلانگێڕی، ڕێی نەدەدان، تەنانەت بژێوی ماڵ و منداڵی پێشمەرگەش دابین بکەن.
فەرمانبەرانی کوردستانیش، لەکاتی داڕمانی نرخی نەوت‌ و، قەیرانی ئابووری جیهانی و، ناوچەییدا و بەناچاریی گرتنەبەری سیاسەتی پاشەکەوتی مووچەدا، مەینەتییەکی بێڕادەیان تەحەمول کرد و ئەو پشوو درێژیەشیان، وەکوو شانازییەکی بەرەنگاری سەختییەکانی ژیان‌ و گوزەران دەژمێردرێ‌. هەرچەندە دەشویسترا، ئەم قۆناغە سەختە، بەڕێگەی ئاژاوە و سیاسەتی پۆپۆلیستی، حکومەتی هەرێم (سەرەڕای هەڵەکانیان) بەرەو هەڵدێر ببرێ‌‌ و کوردستان چەشنی لیبیا و یەمەن لێبکرێ‌، بەڵام زۆرینەی گەلەکەمان، بە درکی نەتەوایەتییان، پشوودرێژییان هەڵبژارد، نەک بشێویی سیاسی و هەڵدێری دەسەڵاتدارێتی.
هەشبوون، دۆخی داراییان بە هەل دەزانی بالورەی دوو ئیدارەیی لێبدەن‌ و دڕکی هەلپەرستییان لێرە و لەوێ‌ بچەقێنن؛ کەمیش نەبوون ئەوانەی خۆڵەمێشی موزایەدەیان بەپاساوی بەرگری لە یەکێتی دەپرژاندە چاوی بەشێکی ڕای گشتی، تایبەتی نەوەی دوای ڕاپەڕین.. بەڵام هەموو ئەو سیاسەتە دوور لە ئەقڵانییەتەی سیاسەت، لە بەردەم سیاسەتی ڕیالیستی شکستی خوارد، ئەگەرچی هێشتا پاشماوەی زیانبەخشی ئەو سیاسەتە هەڵبەزو دابەزە، لەناو هەموو لایەنەکاندا، بێ کاریگەر نین. هەر بۆیە، حکومەتی نوێی کوردستان، دوای نزیکەی چوار مانگە، پێکنایەت!
لەکاتێکدا، دەست خۆشی لە فراکسیۆنە کوردستانییە پەرۆشەکانی باشترکردنی گوزەرانی خەڵک دەکەین‌ و ئومێد دەخوازین، لەسەر ئەرکە دیموکراسی و نەتەوایەتی و دەستوورییەکانیان، هەروا بەیەکهەڵوێستی بمێننەوە و ناکۆکی لە کوردستان جێبهێڵن و کۆکی لەبەغدا بپارێزن.
ئیدی.. پاساو لە بەردەم حکومەتی هەرێمیش نەما، کە دەستبەجێ‌، دوای پێکهێنانی حکومەتی نوێ‌، بە کۆی سیستەمی حوکمڕانی و دژایەتی گەندەڵی و مشەخۆریدا بچێتەوە و چاکسازی بنچینەیی لە حوکمڕانیدا بکات. دیارە پەڕڵەمانی کوردستانیش، لە ئەرکە سەرەکییەکانی، دوای هەڵبژاردنی سەرۆکایەتییەکەی، کاراکردنەوەی کارنامەی تەواوکردنی دەستووری کوردستانە.. هەروەها، وردتر چاودێریکردنی پابەندبوونی حکومەتە، لە جێبەجێکردنی پڕۆژە و بەرنامەی ڕاگەیەنراویان لەناو ئەو لایەنانەی حکومەت پێکدێنن.
پێشمانوایە، دوای جێگیربوونی مووچەی پێشمەرگە و فەرمانبەران، زەمینەی سەقامگیری سیاسی و حوکمڕانی باشتر دەڕەخسێ‌، بۆ ئەوەی سەرجەم کێشەکان چارەسەر بکرێن. تەنیا چارەسەرکردنی تەنگوچەڵەمەی خەڵکیش، دەستەبەری قوڵکردنی پڕۆسەی دیموکراسییە.. نەک بێباکیی سیاسی و حوکمڕانیی.. چونکە هەموو بێباکییەک، لە جومگە سەرەکییەکانی سەروەری یاسا و ژیانی خەڵک، مەترسی گەورەی هەیە لەسەر چارەنووس، نەخوازەڵڵا لەم هەلومەرجە هەستیارەی ناوچەکەدا! [1]