باسێوی کۊتا سەرو ڕۊمانەو (سیاو ڕێحانەی) ی
بەشۍ: یەرەمە
نویستەی: #هەورامان ڕۆستەمی#
هەڵێ ڕازوانیێ و ڕانویسیێ!
سەرەم چانەی سڕ مەنەن کە ئی کتېبە لاوېشەوە ویراستارش بېیەن! ئاخۆر کتېبێو چن دانێ هەڵێش مشیۊم چەنە با؟ هەر بەشێو یام فەسڵێو چن دانێ؟ هەر لاپەڕێو چن دانێ؟بە هەزار داخێوە هەر خەتێوە و جۆملېوە چن دانێ؟
یۆ جە گەورەتەرین تایبەتمەنیەکاو زوانی هۆرامی کە بۍ ئانەی دەس کەرمۍ بە ئەوە وانایش ساختارەکەشا یام ڕۊتوو نویستەکەیش، پېسەو واتەو (ڎ). وانەر بە ئەوەڵین چەم وستەی بە مەتنیوی کە (ڎ) چەنەبۊ مزانۆ کە هۆرامیا، بەڵام بەداخەوە ئی ڕۊمانە عالێ بۍ بەش کریەینە چینەیە. وەختێو چەمت گنۆ پا وشا کە جیاتی پیتو (ڎ)، (ذ)شا نویستېنە، ڕېک ئەجۊت مەتنیوی عەرەبی موانیەوە.
دماجار هەڵێ تایپیێ و ئێملایێ کە بە جۊرئەت متاڤوو واچوو خەت بە خەتوو ڕۊمانەکێ هەڵەش ئینا چەنە! خەت بە خەتش!
ویراستاروو ئی ڕۊمانێ هۆرامی بېیەن یام نا؟چن شارەزاییش بېیەن سەرو زوانی هۆرامیەنە! ئیسە ساختار و ڕازوان یاگێ وېش، ڕانویس هەڵەش چەنەبۊ، وانەر دڵسەردبۊوە جەوانایش.
ئاخۆر یۊ پەرسۆ جە ویراستاروو ئی ئەسریە کە ئینە یانېو چېش؟ چن وېش متاڤۆ بوانۊشەوە؟
نویسەر جە وەڵێنەو کتېبەکەیەنە نویستەنش کە ئی ڕۊمانێ جگەم ئانەی خزمەتێوا بە زوان و فەرهەنگوو هۆرامانی، هەوڵش دان کە زوانو هۆرامانی پارێزیۆ و یۆ جە سەرەکیتەرین ئاواتەکاو نویسەریا، کە کەس شکەش نېیەنە چەنش، بەڵام بەداخەوە ئی ڕۊمانە ئاشقانێ، تێکەڵاو کەردەی مەسایێلی سیاسی و کۊمەڵایەتی کاتوو وېش و بە ئەژناسنای سرووشتوو هۆرامانی و تێکەڵ کەردەیش چەنی تەنگ و چەڵەمەکاو کۊمەڵگاو ئا سەردەمیە و بە تایبەت تەنگ و چەڵەمەکاو ژەناو هۆرامانی جە نۆعوو وېشەنە بۍ وێنێنە و واوەی هەزار جار دەس وەشی کەروو جە کاک حەمەڕەزای ئازیزی کە هەرچن دوورە وەڵاتەنە مژیڤۆ و دوورا جە هۆرامانی، بەڵام هەزار ئاخ و داخ پەی هەڵە ئێملایەکاش کە شکۆ کتېبەکەیش ماڕان و ئاواتم ئانەن جە چاپە دماینەکاشەنە ئی خاڵێ وەرچەم گیریۆ و هەڵەکېش ساقێ کریاوە و لای سەری کتېبخانەو هۆرامانیەوە پېسەو کتېبێوی فاخری گردێما شانازیش پەنە کەرمۍ.[1]