پارێزگاری #هەولێر# ئاماژە بەوە دەکات، بەهۆی کارەساتی شارۆچکەی حەمدانییە و ئاگرکەوتنەوەی باڵەخانەکەی #سۆران# کە هاووڵاتییانێکی زۆر لە هەردوو کارەساتەکە گیانیان لەدەستدا، بۆ ڕێزگرتن لە گیانی ئەو قوربانیانە، پارێزگای هەولێر هیچ ئاهەنگێک بۆ جەژنەکانی کریسمس و سەری ساڵ بەڕێوەنابات.
بەپێی ڕاگەیاندراوێکی پارێزگای هەولێر، ئەمڕۆ دووشەممە ڕێکەوتی #18-12-2023#، #ئومێد خۆشناو# پارێزگاری هەولێر لەگەڵ قایمقامەکانی ناوەند و عەنکاوە و بەڕێوەبەرایەتییە گشتییەکانی گەشتوگوزار و تەندرووستی و هێزەکانی ناوخۆ و زێرەڤانی کۆبووەوە.
بەپێی ڕاگەیاندراوەکە، پارێزگاری هەولێر لە کۆبوونەوەکەدا ئاماژەی بەوە کردووە، بەهۆی کارەساتی شارۆچکەی حەمدانییە و ئاگرکەوتنەوە لە باڵەخانەیەکی سۆران کە تێیاندا ژمارەیەکی زۆری هاووڵاتییان گیانیان لەدەستدا و برینداربوون، بۆ ڕێزگرتن لە گیانی ئەو قوربانیانە و هەستی خانەوادەکانیان، پارێزگای هەولێر هیچ ئاهەنگ و بۆنەیەکی فەرمی تایبەت بە سەری ساڵی نوێ ئەنجام نادات، بەڵام هاووڵاتییان ئازادن لەوەی لە هۆتێل و شوێنە گەشتیارییەکان ئاهەنگ ساز بکەن.
ئومێد خۆشناو ئاماژەی بەوە کردووە، لەپێناو پاراستنی سەر و ماڵی هاووڵاتییان و گەشتیاران، بۆ ڕێگەگرتن لە ڕوودانی هەر ڕووداوێکی نەخوازراو و نا یاسایی، ئەرکیان بەسەر تەواوی هێزە ئەمنییەکان لە پۆلیس و ئاساییش و زێرەڤانی، پۆلیسی فریاکەوتن و چالاکییە مەدەنییەکان، هاتوچۆ و بەرگری شارستانی و تیمە تەندرووستییەکان دابەشکردووە، دووپاتیشی کردووە کە پێویستە ئاسانکاری لە دەروازەکان پێشکەشی ئەو گەشتیارانە بکرێت کە بۆ شەوی سەری ساڵ دێنە هەولێر.
پارێزگاری هەولێر ئاماژەی بەوە کردووە ڕێگری لەوانە دەکرێت کە نیازیان هەبێت لە دەرفەتی پشووی سەر ساڵ بیکەنە سەر موڵکی گشتی و زێدەڕۆیی و سەرپێچی لەسەردا بکەن. [1]