لە چوارچێوەی یارییەکانی خولی نایابی بالەی یانەکانی ئێراق جەولەی دووەمی قۆناغی دووەم چوار یاری بەهێز بەڕێوەچوون.
لەنێو هۆڵی داخراوی #یانەی وەرزشی پێشمەرگەی سلێمانی# و لە یاری لوتکەی دێربی کوردستان لە خولی نایابی یانەکانی ئێراق، هەردوو تیمی تۆپی بالەی یانەکانی پێشمەرگە و #هەولێر# ڕووبەڕووی یەک بوونەوە.
لەو یارییەدا کە کاتژمێرێک و 50 خولەکی خایاند، تێیدا و کوڕانی پێشمەرگە پاڵپشت بە چەپڵە ڕێزانی هاندەرانیان کە لە زۆرێک لە شار و شارۆچکەکانی کوردستان بۆ پاڵپشتی تیمەکەیان هاتبوونە نێو هۆڵەکە، توانیان بە ئەنجامێکی گرنگ سەرکەوتن بەدەست بهێنن.
لە سێتی یەکەمی یارییەکەدا، یاریزانانی هەولێر وەک هەمیشە پێشەنگی خاڵەکانیان وەرگرت و توانیان بە ئەنجامی 17 -25 خاڵ براوەبن.
ئەمە و لە سێتی دووەم (عەلی تەها)ی کاپتنی تیمی بالەی یانەی پێشمەرگە و هاوڕێکانی هاتنەوە سەر ڕێچکەی یاریکردن و ململانێی بەهێزی یانەی میوانیان و بە ئەنجامی 25 -22 خاڵ سەرکەوتنیان بۆ خۆیان یەکلاکردەوە، پاش ئەو سێتە و لە سێتی سێیەم و بەهۆی زیاتر هاندانی هەوادارانیان و پاڵپشتی لە تیمەکەی کوردستان، پێشمەرگەکان بە ئەنجامی 25 -21 خاڵ ڕکابەرەکەیان تووشی شکست کرد.
هەرچی لە سێتی چوارەم و دوا سێتی یارییەکە بوو کوڕانی سەوز پۆشی شاری بیرمەندوو ڕۆشنبیران یەکلایەنە و بە ئەنجامی 25 -18 خاڵ سەرکەوتنیان بۆ خۆیان یەکلاکردەوە و بەو ئەنجامەش پێشمەرگە توانی بە ئەنجامی 3 -1 سێت بردنەوە مسۆگەر بکات و 3 خاڵی گرنگی ئەو یارییەشی بردەوە.
هەر لە ئەنجامی یارییەکانی جەولەی دووەمی قۆناغی دووەم:
مەسافی شیمال -نەینەوا 3-2
غاز جنوب × سمود 3-0
بەحری × حەبانیە 3-0
[1]