ڕۆو قەڵەمی و درەوشییایوەو یانەو حەیران هۆرامی
ئارۊ ڕاکەوتوو چوارڎەو کۆپروو (1403) شاروو هۆرامانوو تەختینە، پەی یوەمین جاری، یانێوە، وەشتەر واچمێ، یانەباوانێوە فەرهەنگی ڕوونمایی کریا و قەڵەم بەدەسێ و خەمەوەرێ فەرهەنگیێو هۆرامانی بە تایبەت شاروو هۆرامانی دڵوەشێ بیېێ.
هەیوانەو کتېبیانەو مامۊسا سەیدی جە ڕۊ قەڵەمینە، مێماندارەو کەسانېوە بې کە شۆن کەوتێو ڕا و ڕاوینەکەو مامۊسا سەیدی و سەرو پیری بېنێ، دیسان سەرو پیریوە فەرهەنگ دۆسێوە قۆڵێش هورماڵێوە و یانەو حەیران هۆرامیش بە ئەوپەڕوو زەحمەتیوە مەرزنارە پەی قەڵەم بە دەسە بې نازەکاو بەشو هۆرامانوو تەختی.
سەعات چوار و بە تەشریف ئارڎەو مێمانا بەرنامە بە دەنگو پېشکەشکار خەمیار هۆرامی، دەس پەنە کریا و هەر چاگەوە ئیشارە کریا بە چن خاڵا و وەرچەم ئانە بې کە جمەو یانەی، جمێوە هۆرامیانێنە و پاو باوڕوو هەرکەسی مەجبوور نېیا پەیش شار و شار کریۆنە و هۆرامان سەرپەلو هەرمانەکاشنە یاسایېوە هێقم و هەقەتینشا.
مامۊسا عوسمان مەردۊخی، بە دەنگی تەسکیندار و سوین وەشش نووروو قورئانیش تروسکانە کۆبېیەیوەکەی و دیسان حوجرەی دینی و فەرهەنگیەکېش ئامێتنەینە هەنگەری و ڕۆتی عێرفانی و فەرهەنگیش ئارڎیمێوە هۊش.
دماتەر وەرنماو شاروو هۆرامانی، مامۊسا حامێد مەردۊخی، خۆڵکە کریاو و دیسان پێسنەو جارانی، وینگای فەرهەنگ دۆسیەو وېش ئەرماناش بە حازر بېیا و مەرزنایرەو یانەی فەرهەنگی و هونەری و حەیران هۆرامیش بە دڵوەشی زانا و خاس یاوناش کە کەس دڵسۊزو زوانی هۆرامی نېیا و مشۊم وېما پی جۊرە هەرمانا جممێوە و خەموو وېما وەرمېنە و تەماکارو کەسی نەبیمێ.
ئازاد مرادی، پێسنەو وەرپەرسو یانەی و کەسېوە کە زیاڎتەر جە ساڵېوە بې بە ئەوپەڕوو زەحمەتیوە شۆنو جەوازو ئی یانەباوانی فەرهەنگیوە بېیەبێ و تاوابېش یاونۊش پەنە، جە لاو خەمیار هۆرامیوە چڕیەیاو و شۆنوو خێرئامایرە؛ ئیشارېوە تایبەتش کەرڎ پانەی کە ئی یانە، ئەرکش، ئەرکێوە فەرهەنگی و هۆرامیانەن و دووری وازۆ جە هەر ویر و باوڕێوە تاکەکسی کە شۊنەمایش گولە کەرۊنە و بنەڕەتو هەرمانەکاش هۆرامیانەن و شەخس و حێزبایەتی لۆمە کەرۊنە، بەحسوو ئانەیش کەرڎ کە تەقویمی ساڵانە وەش کریۆ پەی بەرنامەکاما و بەپاو ئانەی ملمێ ڕاوە.
کاک سامان بەختیار، پێسنەو وەرپەسوو ئدارەو ئێرشادی قەوڵو هامدڵیش دا پەی هەرمانە فەرهەنگیەکا و فەرماواش بە گرڎ جۊرێ پشتیوانو ئی یانەینمێ و یارڎەیشا مڎەیمێ تا یاونمێشا بە مەرام.
بەرنامە چن بەشێتەرێش بېنێ کە پەخشانە، شێعره و گۊرانیێ بېنێ کە جە لاو ئازیزا خاتوو مۆهەننا مورادی ، کاکە عەباس غەریبی، سەعدی شەریفی، حەسەن عومرانی، مامۊسا جەلال ئەکبەری، سیروان خالێدی و فەیسەڵ هێدایەتیوە بریەی ڕاوە و کۊنیشتەکەشا ڕازناوە.
ئاخرو بەرنامەیچۊ، کاکە بەهمەن شەریفی کە فەزاو هەرمان و کارو یانەی، شاروو هۆرامانینە بە زەحمەتو ئاڎیوە ڕیکە کەوتێ بې، بەحسو ڕۆتو هەرمانەکاش کەرڎ و دەسوەشیش کەرڎ چا کەسا کە بە هەر جۊرێو چا ڕانە یارمەتی دەرێشا بېیێ بېنێ.[1]