سەرۆکێ حکومەتا هەرێما کوردستانێ راگەهاند، ئه و کار دکەن خەلکێ شنگالێ ب سەربلندى بۆ دەڤەرێن خۆ ڤەگەڕن و برێڤەبرنا دەڤەرێ ژى د دەست وان دا بیت
مەسروور بارزانى، سەرۆکێ حکومەتا هەرێما کوردستانێ پەیامەک د دەهەمین سالیادا جینۆسایدکرنا ئێزدییان دا بەلاڤکر و گۆت: ئەڤرۆ دەﮪ سال ب سەر جینۆسایدکرنا خوشک و برایێن ئێزدى ل شنگالێ و رەخودۆرێن وێ دا دەربازبوون، کو ژ ئەنجامێ هێرشێن درندانە یێن تیرۆرستێن داعشێ، هزاران کەس ژ ئاکنجیێن دەڤەرا شنگالێ ب کۆم هاتنە کوشتن و دەهان هزار کەس ژى بێ سەروشوون و ئاوارە بوون.
هەروەسا خویاکر، هەر چەندە دەﮪ سال ب سەر ڤێ تاوانێ دا دەربازبوون بەلێ ب لێبۆرین ڤە هێشتا ئێش و ئازارێن خوشک و برایێن ئێزدى ب دوماهى نەهاتینە و هێشتا هەژمارەکا مەزن یا وان بێ سەروشوینن و ب ئەگەرا خۆسەپاندنا ملیشیایان و هێزێن چەکدارێن دەرڤەیى یاسایێ ل شنگالێ رەوشا دەڤەرێ ئاسایى نەبوویە و ئاوارە نەشیاینە ڤەگەڕنە دەڤەرێن خۆ.
گۆتژى: دڤێ یادێ دا قوربانیدانا هێزێن پێشمەرگێ کوردستانێ ب رێبەرییا سەرۆک بارزانى د رزگارکرنا شنگالێ دا بلند د نرخینین و ب رێزڤە تەماشە دکەین.[1]
مەسروور بارزانى دازانین، حکومەتا هەرێما کوردسانێ دوپات دکەت کو بەردەوامە د بزاڤێن خۆ دا ل گەل حکومەتا فیدرال بۆ ئاسایکرنا رەوشا نەئارام یا شنگالێ و رەخودۆرێن وێ و کار بۆ ئاڤەدانکرنا ناوچێ دکەت بۆ وێ یەکێ زەمینە بۆ ڤەگەڕاندنا ب سەربلندى یا خوشک و برایێن ئێزدى یێن ئاوارە بۆ جهێن وان خۆش بکەت و ژبەر ڤێ یەکێ ژى دوپاتیێ ل بجهئینانا رێککەفتنا شنگالێ وەک خۆ دکەین بۆ وێ یەکێ ئارامى و سەقامگێرى بۆ ناوچێ ڤەگەڕیت و پاراستن و برێڤەبرنا دەڤەرێ ژى د دەست خەلکێ رەسەنێ شنگالێ دا بیت.
ل دوماهییا پەیاما خۆ ژى سەرۆکێ حکومەتێ خویاکر، سەرێ رێزێ بۆ شەهید و قوربانیێن کۆمکوژییا شنگالێ و هەموو شەهیدێن کوردستانێ د چەمینین.