سەیدایێ نالبەند بخو و خەتێ دەستێ خو ژینا خوە بو مە بڤی رەنگی دیار دکەت و دنڤێسیت و دبێژیت :- ئەز ئەحمەدم موخلسم کورێ ئەمینێ نالبەند بابێ من خەلکێ باژێرێ ئامێدیێ بو میرگەها پاشایێت میر سێڤدینا ل جهێ بەهدینان. من مامەک هەبو ناڤێ وی (عەبدولڕەحمان) بۆ، بابێ من ژ باژێرێ ئامێدیێ چو گوندێ (بامەڕنێ) ل سالا (1281) کوچی نک شێخ (محەمەد) ێ شێخ طاهرێ ئامێدی و ل وێرێ ئاکنجی بو و نالبەندی دکر بو ژیارا عەیالێ خوە، بابێ من پێنچ کوڕ هەبوون و دوو کچ ئێک ژوان کوڕا ئەز بوم کو ل سالا (1308) مشەختی بەرامبەری (1891- 1892) زایینی ئەز هاتمە دنیایێ. دەمێ ژییێ من بوویە پێنچ سال من دەست ب خاندنا قورئانا پیرۆز کر لنک دایکا خوە فاتمایێ هەتا من بدوماهی ئینای، من دەست بخاندنا کتێبێت شریعەتێ کر، دوو سالا ل بامەڕنێ خاند پاش ئەز چومە ئامێدیێ بەر خاندنێ ئو ل خاندنگەها قوبەهان سالەکێ من خاند و ئەز ڤەگەریامە مال، پشتی هەیامەکێ من خوە بسەروبەر کر و ئەز چومە باژێرێ (زاخو) ل وێرێ ژی سالەکێ من خاند ئەز زڤریمە ڤە مال پاش دەمەکێ من خوە پێک ئینای ئەز چومە باژێرێ (دهوکێ) من سێ سالا ل وێرێ خاندن کر و ئەز هاتمە ڤە مال پشتی دەمەکێ من خوە سەر راست کر و ل سالا (1323) مشەختی ئەز چومە گوندێ (بێدوهێ) ل ناڤ جهێ بەرواری ژووریا ل سەر توخیبێ هەکاری و بەهد ینان داکو خواندنا خو بدوماهی بینم لنک (شێخ محەمەد پارسای) کوڕێ شێخ (طه) یێ (مائی) من دوو سالا خاند و سەیدایێ من (شێخ محەمەد پارسا) وەفات بو چو بەر رەحما خودێ ل سالا (1335) مشەختی پشتی مرنا سەیدایێ خوە ئەز بوومە مەلایێ گوندێ بێدوهێ ل شوینا سەیدایێ خوە داکو دەرسێت فەقیێت وی بێژمێ و خلمەتا مالا سەیدایێ خوە بکەم، هەتا سالا (1342)مشەختی بەرامبەری (1924 - 1925) زایینی ئەو سالا ئێنگلیز و فەلێت تییارێ (فەلە رەشک) هێرش ئینایە سەر گوندێت مە (مائێ، بێدوهێ،بناڤیێ) ئەم ژی مشەخت بوین چوینە ناف تورکا دەڤەرا هەکاریا و ل قەزا (چەلێ) ئەم فەحەوهاین و ل گوندێت وێ بەڵاڤ بوین، بەلێ ل ڤێ مشەختییێ ئەم گەلەک پەریشان و بێ سەروبەر بوین بێ کاری و ئێش و نەساخی کەتن ناڤ مە و گەلەک مروڤ ژمە مرن. ئەز پشتی سالەکێ ڤەگەرهامە ڤە جهێ عیراقێ ئو لناف عەشیرەتا (گولییا) ل گوندێ رویسێ ئاکنجی بووم و بومە مەلایێ گوندی، پاش ل وێرێ من ژنکەک بۆخو خوازت ناڤێ وێ (سەیدا فەهیما) بو کچا سەید ئوسمان خشخاشی، ئەز بوومە خودان مال و ژن خۆدێ پێنچ بچویک دانە من، و نێزیکی، دە (10) سالا ئەز مامە ل وێرێ مەلایێ گوندی، پاش ژنا من مر. من ژنەکا دی ژوی گوندی بوخوە خوازت و مەهر کر ناڤێ وێ (سافیا) بو پاش هەیامەکێ ئەو ژی مر و چوویە بەر دلوڤانیا خودێ و کچەک لدویڤ خوە هێلا. ئەز گەلەک شەپرزە بوم و مامە گرفتار ب ڤان بچویکاڤە و کەتن لەپێت من سێوی و بێ دایک، ئەز ژ وی گوندی ڤەگوهازتم چومە گوندێ (بێگوڤا) هەر ل ناف گولییا ئەز بومە مەلایێ گوندی دوو سالا من مەلاتی کر ل وێرێ کوڕێ منێ مەزن محەمەد ل گەل خویشکا وی یا بسپور (گولبهار) مرن ئو مانە ددەستێت مندا، دوو کچێت بچویک (ئەسما، ئاسیا) ئەز گەلەک پێڤە پەر گندە و ئالوز بووم من چ رێک نەمان ژبلی برنا وان بونک باپیرێ وان سەید ئوسمانێ ل گوندێ خشخاشا داکو بخودان ببن و سەخبێرا وان بهێت کرن و چاڤێ خوە بدەن وان و من برن و ئەز چوومە وێرێ. ئەز بوم مەلا ل گوندی، من پێنج شەش سالا مەلاتییا وان کر و کچێت خوە ل وێرێ دانە شوی و مەلاتی هێلا و ئەز تەنگەزار بووم ودەر بدەر ب دنیا کەتم. بومە گەریدە ژڤێ گوندی بو گوندێ هە ژڤی جهی بو جهێ هە دا وەکو شعرێت خوە لێک دەم وڤێک بێخم بەلکی چاپ کەم..
Αυτό το στοιχείο έχει γραφτεί σε (کرمانجی) γλώσσα, κάντε κλικ στο εικονίδιο
![](https://www.kurdipedia.org/images/flags/ku.png)
για να ανοίξετε το στοιχείο στην αρχική γλώσσα!
ئەڤ بابەت ب زمانا (کرمانجی) هاتیە نڤیساندن، کلیک ل ئایکۆنا
![](https://www.kurdipedia.org/images/flags/ku.png)
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
Αυτό το στοιχείο έχει προβληθεί φορές 21,712
Γράψτε το σχόλιό σας για αυτό το προϊόν!