له و وتەیەی لە دیالۆگی بەغدا پێشکەشم کرد، بەشێکی دابڕێنراو و بەدەر لەسیاقی وتەکانم گوێزراوەتەوه و واوێناکراوە وەکو ئەوەی من داوای لەبیرکردنی قەسابخانەی سپایکەرم کردبێت و تاوانی حەڵاڵکردنی سەروماڵی ئێزدییەکانم بەڕێگاپێدراو زانیبێت، ئەمە بەهەڵەدابردنە، بەڵکو پێچەوانەکەی ڕاستە چونکە من لەوتەکەمدا هۆشداریمدا بەوەی گەورەترین ئاستەنگی و گەورەترین مەترسی لەبەردەم عێراقدا ئەوەیە سەرکردەکانی لەسەر ئەم پەیڕەوەی ئێستا بڕۆن و سەرکەوتن ڕابگەیەنن و تاوانەکانی سپایکەر و دەستدرێژی بۆسەر ئێزدییەکان لەبیربکەین و خۆمانی لێ گێل بکەین، من جەختمکردەوە پێویستە ئێمە چارەسەری شکست و کەموکوڕییە بنەڕەتییەکانی سیستمی فەرمانڕەوایی بکەین هەتاوەکو ئه و قەسابخانانە دووبارەنەبنەوە.. چونکە ئەوەی ئه و تاوانانە لەبیردەکات بەرپرسیارێتی تاوانەکانی ئایندە و بەردەوامی بازنەی توندوتیژی دەگرێتەئەستۆ.
چونکە ئەوەی ئێزدییەکان ڕووبەڕووی بوونەوە لە دەستدرێژی و کۆمەڵکوژی تاوانێکی قێزەونە کە پێویستدەکات تاوانباران و ئەوانەی بەشداربوون لە ئەنجامدانی لێپرسینەوەیان لەگەڵدابکرێت و سزا بدرێن و قوربانییەکان قەرەبووبکرێنەوە و شەنگال و ناوچەکانی دیکە ئاوەدانبکرێنەوە.
وادیارە کارێکی ئەنقەست هەیە بۆ شێواندنی ڕاستییەکان بۆ مەرامی خۆیان لەدژی هەڵوێستە نەگۆڕ و مەبدەئییەکانی من سەبارەت بە ماف و کۆژانەکانی ئێزدییەکان.
کوڕان و کچانی ئێزدییەکان باش دەزانن کێ بەخێرایی فریایان کەوت و یارمەتیدان و کێش شکستیهێنا لە یارمەتیدانیان لە ناخۆشترین باروودۆخی مێژووی هاوچەرخی ئەواندا کە پێیداتێپەڕدەبن بەوەش پێموایە ئەوان باوەڕ بەوەناکەن کە بەرهەم ساڵح، داوای لەبیرکردنی حەڵاڵکردنی خوێنی ئێزدییەکان دەکات....
بەرهەم ساڵح
16-01-2017