کەسوکاری ئەو گەنجە کوردەی پێش 10 ڕۆژ لە خورماتوو ڕفێندرا، حەشدی شەعبی تۆمەتبار دەکەن بە ڕفاندنی کوڕەکەیان و دەڵێن لەلایەن چەکدارانی ئەو هێزەوە بریندار کراوە، ڕفێندراوە و لەبەرامبەر ئازادکردنیشی داوای پارەیان لێدەکەن.
ماوەی 10 ڕۆژە کوڕێکی کورد بەناوی باخەوان عەزیز، تەمەنی 23 ساڵ لەلایەن چەند چەکدارێکەوە ڕفێنراوە و، دوای ئەشکەنجەدانێکی زۆر، ڕادەستی پۆلیس کراوە. کەسوکارەکەی زانیویانە حەشدی شەعبی ڕفاندوویەتی و ماددەی چواری تیرۆریان داوەتە پاڵ.
بەپێی ئه و وێنانەی بۆ دایکیان ناردووە باخەوان لە دەست و پێ کەوتووە و تەندروستی ناجێگیرە، لە بەرامبەر ئازادکردنیشی و داننان بە هەڵەکەی خۆیان، حەشدی شەعبی داوای پارە لە خانەوادەکەی دەکات.
بەفراو ڕۆستەم، دایکی باخەوان بە تۆڕی میدیایی ڕووداوی ڕایگەیاند کوڕەکەم گوتی بە ڕێگادا دەرۆیشتم کاتێک دوو ئۆتۆمبێل پێشیان لێگرتم، دواتر دوو گوللەیان لە پێیەکانی داوە، ئێستاش داوای پارەم لێدەکەن. من، پارە لە کوێ بهێنم و بیدەمە دەست حەشدی شەعبی؟ داوا دەکەم ڕزگاری بکەن و نەشتەرگەری بۆ پێیەکانی بکەن. من ئه و کەسانە ڕادەستی خوا دەکەم.
ئەگەرچی ماوەیەکە دۆخی ئەمنی خورماتوو جێگیرە، بەڵام حاڵە‌تەکانی ڕفاندن لە زیادبووندان، ئیداری خورماتووش زانیاری لەسەر باندەکانی ڕفاندن هەیە، بەڵام توانای لێپێچینەوە و بنبڕکردنی نییە.
شەلال عەبدول، قایمقامی خورماتوو لەبارەی ڕفاندن لە خورماتوو دەڵێ ئەوانەی ئەمکارە دەکەن، چەند لایەنێکی دیارن کە دەستیان لە ڕفاندنی خەڵکدا هەیە، ئەوان چەند بەشێکی حەشدی شەعبین. من، پێموایە کاتێک بێ پارە دەبن، دەست دەدەنە ڕفاندنی خەڵک و دواتر بە پارە ئازادیان دەکەن.
حەشدی شەعبی زۆرترین سەرایە و هێزی لە خورماتوو هەیە، ڕەتیدەکاتەوە دەستی لە ڕفاندنی خەڵکدا هەبێت و کەسیان ئەشکەنجە دابێت. عەلی حوسێنی، گوتەبێژی حەشدی شەعبی لە خورماتوو دەڵێ ئێمە وەکو حەشد، لەبەردەم خودا و یاسا خۆمان بێبەری دەکەین له و چەکدارانەی ئەو کارانە دەکەن. کاری حەشد لەناوبردنی داعشە، نەک ڕفاندنی خەڵک، بۆیە ئەوە کاری ئێمە نییە و تۆمەتە دەخرێتە پاڵمان، هەر کەسێکیش بەڵگەی هەیه، با پێمان بدات تاوەکو سزای ئه و کەسانە بدەین.
لەماوەی سێ مانگدا لە خورماتوو، 33 حاڵەتی ڕفاندن ڕوویانداوە، کە شەشیان بێ سۆراخن و، ئەوانەی دیکەش بەپارە ئازادکراون، بەگوتەی ئاسایشی خورماتووش، بەشێک لە ڕفێنراوەکان بەناوی هێزی ئەمنییەوە بردراون.