کۆمپانیای دیلۆیت چوارەمین ڕاپۆرتی لەبارەی وردبینی نەوت و گازی هەرێمی کوردستان بڵاوکردەوە و سافی بڕی هەناردەکراو لەرێگەی بۆرییەوە و لەماوەی سێ مانگدا زیاتر لە 28 ملیۆن بەرمیل بووە.
بەپێی سایتی حکومەتی هەرێمی کوردستان و لە چوارچێوەی پڕۆژەی وردبینی سەربەخۆی کەرتی نەوت و گاز لە هەرێمی کوردستان، ئەمڕۆ کۆمپانیای جیهانی دیلۆیت بۆ وردبینی و ڕاوێژکاری، ڕاپۆرتی چوارەمی وردبینی و پشتڕاستکردنەوەی زانیارییەکان تایبەت بە داتا و زانیاریی نوێ دەربارەی هەناردەکردن، بەکاربردن و خەرجی و داهاتەکانی نەوت لە 1ی نیسانی 2018 تاوەکو 30ی حوزەیرانی 2018 بڵاوکردەوە.
هەروەها هاتووە: ئەنجومەنی هەرێمی بۆ کاروباری نەوت و گاز بەردەوام دەبێت لەسەر کارکردن بۆ برەودان و دەوڵەمەندکردنی ڕاپۆرتەکانی وردبینی و پێداچوونەوە بە پشتبەستن بە سەرنج و فیدباکی لایەنە پەیوەندیدارەکان لەناویشیاندا کۆمەڵگەی نێودەوڵەتی، حکومەتی هەرێمی کوردستان دووپاتی پابەندبوونی خۆی دەکاتەوە لە بەرامبەر هاووڵاتییانی هەرێمی کوردستان کە هەردوو گەورە کۆمپانیای جیهانی (Deloitte) و (Ernst & Young) بەردەوام دەبن لەسەر وردبینی و پێداچوونەوەی سەربەخۆ بۆ سێکتەری نەوت و گاز بە هەموو پرۆسە و بەشەکانییەوە.
حکومەتی هەرێمی کوردستان ڕایدەگەیێنێت: وەک بەشێک لە ڕێککەوتنمان لەگەڵ کۆمپانیا نێودەوڵەتییەکانی وردبینی، ڕێککەوتن کرا لەسەر ئەوەی کە کۆمپانیا نێودەوڵەتییەکانی وردبینی یارمەتی هەرێمی کوردستان دەدەن لە بارەی ڕاهێنان و گەشەپێدانی سەرچاوە مرۆییە ناوخۆییەکان. ئەنجوومەنی هەرێمی بۆ کاروباری نەوت و گاز، بە هەماهەنگی لەگەڵ دیلۆیت، وۆرکشۆپێکی ڕاهێنانی دەربارەی ژمێریاری و وردبینیی پیشەسازی نەوت و گاز بۆ ماوەی 3 ڕۆژ لە ماوەی 23 تاوەکو 25ی تشرینی یەکەمی 2018 ڕێکخست بە ئامادەبوونی 15 بەشداربوو لە فەرمانگەکانی وردبینیی پارێزگاکان سەر بە دیوانی چاودێری دارایی هەرێمی کوردستان، و پلانێک لە ئامادەکردندایە بۆ ڕاهێنانی زیاتر بۆ پاڵێوراوانی هەڵبژێردراو لەلایەن دیوانی چاودێری دارایی بۆ دابینکردنیان بە تەکنیکە نوێیەکانی وردبینی و زانیارییەکانی دەربارەی نەوت و گاز تاوەکو لە داهاتوودا سوود لە توانا گەشەپێدراوەکانیان وەربگیرێت لە بواری وردبینیکردنی کەرتی نەوت و گاز لە هەرێمی کوردستان.[1]
#12-12-2018#