داهاتوو بۆ ئەم ئایینەیە
سید قطب
وەرگێڕانی : مزەفەر عەولا قەسرێی
ئیسلام ڕێبازە، ڕێبازی ژیانە، ژیانێکی مرۆیی و واقیعیی بەهەموو واتا و پێداویستییەکانییەوە. ڕێبازێکە دیدی بیروباوەڕانەی لەخۆگرتووە، کە سرووشتی (بوون) تەفسیر دەکات و پێگەی (مرۆڤ) لەم بوونەدا دیاری دەکات، ئەمە جگە لەوەی ئامانجی بوونی مرۆڤیش دیاریدەکات.
ئیسلام ئه و سیستەم و ڕێکخراوە واقیعییانەی لەخۆگرتووە، کە لەم دیدە بیروباوەڕییە هەڵقوڵاون و پشتیان پێدەبەستێت و وێنەیەکی واقیعییان پێدەبەخشێت، کە خۆی لە ژیانی مرۆڤدا دەبینێتەوە، وەک سیستەمی ڕەوشت و ئه و کانیاوەی لێیەوە هەڵدەقووڵێت. هەروەها ئه و بنچینانەی لەسەری دادەمەزرێت و ئه و دەسەڵاتەی بنچینەکانی لێوەردەگرێت.
هەروەها سیستەمی سیاسی و شێوە و تایبەتمەندییەکانی و سیستەمی کۆمەڵایەتی و بنچینە و پێویستییەکانی، سیستەمی ئابووری و فەلسەفە و شێوازەکانی و سیستەمی نێودەوڵەتی و پەیوەندی و پەیوەستییەکانی.
ئێمە باوەڕمان وایە داهاتوو بۆ ئەم ئایینەیە، بەڵام بەمەرجێک ڕێبازی ژیان بێت، هەموو ئه و لایەنانەی باسمان کردن پێکەوە لەخۆبگرێت و لەیەکتر جیانەکرێنەوە. ئه و لایەنانەی هەموو بوارەکانی ژیانی مرۆڤ ڕێکدەخەن و هەموو خواستە ڕاستەقینەکانی مرۆڤ بەدیدێنن، کە دەستیان بەسەر جۆرە جیاوازەکانی چالاکییەکانی مرۆڤدا گرتووە.[1]