عەدێ و مەدێ 10
سەر سەت مەتری هەمووی قەپات بوو، دەرزیت فڕێ دابا نەدەکەتە عاردی، گۆتم : ئەوها بڕوا لۆ عیشایێش ناگەینە قەبرستانی، عەدێ گۆتی : خەمت نەبی، بە دەرکەی پشتەوە دەچینە ژۆرێ، لە پشت سناعەی جادەک هەیە دەچتەوە هەولێری نوێ، بەوێ دادەڕۆین !
هەردوو برا چونکە زۆر چووبوونە سەر قەبران لۆ مەسوولی گەورە و تڕە مەسوولان، زۆر باش شارەزای کون و کەلەبەری قەبرستانی شێخ ئەحمەدی بوون، چووینەوە سەر جادەی شەقراوەیی لە سناعەی تێپەڕین و لە بەینی مەعمەل جغارە و وەزارەتی پێشمەرگەی چووینە ژۆرێ، سێ چار دەققەکی ڕۆیشتین و گەیشتینە قەبرستانی و بە دەستە ڕاست چووینە ژۆرێ، چەند تڕومبێل لە سەر سەت مەتری بوو، هەندەش زیاتر لە ژۆرێ بوو، گۆتم : زۆر مەچوونە ژۆرێ دەنا گیر دەبین، هەر لەوناوەی ڕاگرین باشە ! عەدێ گۆتی : وەلەو ئەتوو زۆربەی جار تێناگەی، بەران ئەوجارە بڕۆکەکی تێدەگەیی !
تڕومبێلمان ڕاگرت و هاتینە خوارێ، بە پێیان ڕۆیشتین و هەر گەیشتینە ناو قەرەبارغی و عەدێ و مەدێ وەرگەڕانە چۆکیان و دەستیان بە وەی ڕۆ وەی ڕۆی کرد ! ئەو خەرکە بە ڕاست و چەپ ئاوڕیان داوە، ویستم لەوان دوور کەومەوە و نەزانن لەگەرە وانم، بەران مەدێ تووند قۆری منی گرتبوو، دوو سێ جار خۆم ڕاتەکاند فایدەی نەبوو !
ئەو دوو برایە خۆیان نەهێشت هەنکی بگریێن و لە خۆدەن، بەلا چاوەکی هەر تەماشای ئەولا و ئەولایان دەکرد و دەیانوویست مەسوولەکەی ببیننەوە و بچن باوەشی تێهەرینن و تێر تێر بگریێن، گێم لێبوو ئێکەک گۆتی : وابزانم ئەوانە برای ڕەحمەتینە ! ئێکەک لەولاتر گۆتی : بە گێرەی ئەو شین و واوەیلایەی وا پێدەچی، خەرکەکی زۆر دەورەیان لە عەدێ و مەدێی داو دەیانگۆ برام سلاوەتەکی لێدەن و ناوی خوای بینن، کاکە هەموومان دەمرین و دەچینەوە لای خوای، مەدێ گۆتی : وازمان لێبینن، ئەمە تازە پشتمان شکا، ئەی هاوار چ موسیبەتەکی گەورەیە، عەدێ لێی وەرگرتەوە و گۆتی : ئەوجە لەوە پاش تەلەفۆن لۆ کێ بکەم و لەگە کێ دانیشم ! دوو جار ویستم لە قریتەی پێکەنینێ بدەم، بە زۆری خۆم گرت، ڕێک تەمسیلەکەی عادل ئیمامم بە بیر هاتەوە وەکی مێردی پلکی سەرۆک وەزیرانی دەمری و ئەویش دەچتە تازیەیی و دەبینی چ کۆیلە و ماستاوچیەک لەوێ خەریکی شین و واوەیلاینە ! ئاخر هەتا گەیشتینە قەبرستانی عەدێ و مەدێ بەندیان دەگۆ، هەونکەش ببینن چ دکرەکی دەکەن !
هەندیان لە خۆدا، وەختەکی تاقەتیان لێ بڕا و دانیشتن، بە دانیشتنیش هەر شینیان دەکرد و بابە ڕۆییان دەگەیشتە ئەوسەری قەبرستانی، خەفەتی گەورەی ئەوان ئەوەبوو مەسوولەکەیان نەدەدیتەوە و بیانبینی ئەوان چ شینەکی دەکەن، وەختەکی مەلا دەستی بە تەلقینی کرد، عەدێ و مەدێ غاریان دا و چوون لەسەر قەبرەکەی درێژ بوون و تووند باوەشیان بەو سەر و ئەو سەری قەبرەکەی کرد !
مایتی..[1]