قوماش 64
نووسینی: #ئوسامە جەمیل#

گۆتم: هەورۆ، ئەوەی ڕوویدا نە خەتای توو بوو نە ئیمن، خەتای ئەوانەبوو کەبوونە دڕک لە بەینی من و توو، ژیانی من و توو و دوو خێزانیان وێران کرد، کێ بزانی ژیانیمە ئەوهای بەسەردێ و ئاگری تێبەردەبی! گۆتی: ئەتوو چدەکەی لێرە، هەونکە ئەو سەگبابە بێتەوە پارچە پارچەت دەکا، گۆتم: مردن لەو ژیانەی باشترە، وەعدبی ئەگەر یەک ڕۆژم لە ژیان مابی، لەو جەهەنەمەی قورتارت کەم، گۆتی: بڕۆ خۆت قورتارکە، گۆتم: زۆر سەلام لە داکت بکە و سەرەخۆشی منی بگەیەنێ! گۆتی: بە چاوان! خواحافیزیم لێکرد و بە چاوی پڕگریان ئێکدیمان بە جێهێشت، ئەو چۆوە ژۆرێ و ئەمنیش ناو تڕومبێلەکەی شێرۆی!
شێرۆ پێی لێنا و گەڕاینەوە، لە ڕێیێ گۆتی: کورە زۆرت ئاگا لەخۆبی، وەڵلا ئەو بێنامووسانە گێیان لێنیە خۆت و داکت و بابت بە سعاتەکی بکوژن! گۆتم: ڕاست دەکەی، گۆتی: دوو قسەی خێرت لۆ بکەم! گۆتم: فەرموو، گۆتی: بە گێی دختۆر شێرۆی بکەو واز لەو کیژەی بینە، تازە ئەو چووە ڕێی خۆیی و ئەتووش بڕۆ ڕێی خۆت، عارد و عاسمان لێکبدا ئەنگۆ ناگەنە ئێکدی، گێ لە نسعەتی دختۆر شێرۆی بگرە، بگەڕێ لەولاو لەولا خزمەکی گەندە پەیاکە و بیهینە، هەرهیچ نەبی پێی بخافرێی و ئەو کیژەی لەبیرکەی! گۆتم: شێرۆ لە بیر ناکرێ لەبیر! گۆتی: ئەمن قسەی خۆم کرد و ئەتووش کەیفی خۆتە، لەسەر ئەو ئاقرەی بی، ڕۆژەکی دەکەویە بەردەستی ئەو سەرۆک جاشەیی و پەل پەلت دەکا، با چشتەکی دیشت پێ برێم، ئەو ڕدێنەش بتراشە، با تووشی کێشە نەبی، داکت و بابت زۆر گوناعن، لەوەی زیاتر ئەزیەتیان مەدە! شێرۆ کە ئەو قسەی کرد بەینەکی باش تەماشام کرد و فکرم لەو قسەی کۆتایی کردەوە، بەڕاستی شێرۆ ڕاستی گۆ: داکم و بابم زۆر گوناحن هەق نیە لەوەی زیاتر ئەزیەتیان بدەم، ئاخر ئەوان ئەوەی لە توانایان دابوو لۆ منیان کرد، ئەوان گوناحیان نیە کە ئیشەکە نەبوو!
گەڕامەوە مارێ، دیتم داک و بابم لە حەوشێ ڕاوەستاینە و چاوەڕێی من دەکەن، ناهەق نەبوون، چوونە دەر بە شەوێ جۆرەک بوو لە شێتی، شەوێ هەموو جادە و ڕێ و کۆرانەکان دەبوونە مەفرەزەی جاش و ئەمن و ئیستخباراتی، بەس هەویەت مەزبووت نەبا، یان دەفتەر خدمەی عەسکەریت پێ نەبا، قوڕیان بەسەری دەکردی، چەند کەس لەسەر شریتی گۆرانی شوان پەروەری لە سێدارە درا، چەند تەلەبەی نازدار گوللە باران کران، ئاخر ژیان زۆر قورس بوو قورس!
دوو سێ ڕۆژ پێچوو، مام ڕەسوری لاسەیی لە شەقراوەی هاتە مارێمە، کەونە برادەری بابم بوو، هەرجاری بهاتبایە جۆڕکە گیز و باویەکی دەهینا، خۆ ئەگەر هاوینیش با، بێ ترێ و هەرمی نەدەهات، زۆر بەخێراتنمان کرد و لەگەر بابم کەتنە قسان، بابم گۆتی: وەزعی شەقراوەی کووە؟ مام ڕەسور گۆتی: باش نیە، لەوەتی ئەو دوو سێ ئەمنەیان کووشتیە، زیاتر لە سی جاحێریان گرتیە و بنبزریان کردینە، دونێ شەوێ سعات چاری بەیانی پێشمەرگە بەسە سەیتەرەیان دادایە و ئەوەی لەوێبووە کووشتیتیان، حوکمەت هەر شێت بووە، چاوی سۆر بووە، ئەوەی بیگری بنبزری دەکا، وەکی مام ڕەسور ئەو قسەی کرد، قسەکەی بازۆم بە بیر هاتەوە، کە گۆتی: خۆت قورتار ئەوشۆ بەسەر سەیتەرەی دادەین، بەران دیارە ئەو شەوی هێرشەکەیان نەکردیە و پاشی کردیتیان، پاشی ئەو قسەی مام ڕەسوری تەئکید بووم بازۆ شەوەکی بەسەر ئەو سەرۆک جاشەش دادەدا، بەران هەرچەند مێکشم دەهینا و دەبرد، نەمدەزانی کوو بە هەورینی برێم، ئەو شەوی لەماری ئەو جاشەی نەبی و بچیتەوە ماری بابی ڕەحمەتی!

دوو مانگەک تێپەڕی، کێشەی من لەگەر مارێ، ئەو ڕدێنە بوو کە بەرمدابۆوە، داکم و بابم زۆر دەترسان تووشی سەرهێشەکی گەورە ببم، بە تایبەتی لەگەر ئەو جاشەی لای ماری خۆمان، ئەو مەفرەزە خاسەی هەبوو، سمێرەکی گەورەی سبوغکرای هەبوو، دایم هەشت نۆ جاش لە پێش ماری بوون، پێش ماری چۆل بوو، دیوەخانەکی گەورەی لەوێ دروست کردبوو، دارو بارەکی زۆری لێ چاندبوو، حەوزەکی گەورەی لێدابوو، پڕی ئاوی کردبوو، هەر جاحێرەک بە پێش ماری داچووبا و ڕدێنی هەبا، دەیگرت و بە هیشکی بە مووسی لۆی دەتراشی و ئەوجە فڕێی دەدا ناو حەوزەکەی، زۆر کەسی ئەوها لێکردبوو، ئەوەی ڕدێنی هەبا، نەدەوێرا بەوێ دابچی، زۆر جار ئەمە لە پێش دەرکەی، ئەگەر جاحێرەکی بەڕدێنمان بدیتبا لۆ ئەولای دەچی، پێمان دەگۆ: نەکەی بچیە لای ماری ئەو جاشەی، تووشی کێشە دەبی! ئەو جاشە خۆ فرۆشە، بەو دوادواییەی فێرببوو، دشداشەکی سپی لەبەر دەکرد و عەگالەکیشی لەسەری نابوو، نازناوی خۆشی کردبووە جبووری، یەک دوو جار بابمی دیتبوو، پێی گۆتبوو: ئاگام لێیە کوڕت ڕدێنی بەردایتەوە، ئەمن دەزانم خەمەکی گەورەی هەیە، بەران پێی برێ ئەو ڕدێنەی بتراشی، ئەمن لەبەر خاتری توو دەنگی لەگەر ناکەم، بەران ئەگەر نەتراشی ناچار دەبم ئاقری بکەم! بابم و داکم زۆریان ڕجا کرد ڕدێنم بتراشم، ئەوان ناهەق نەبوون و دەترسان، بەران ئەوان نەیان دەزانی ئەمن و هەورین وەعدم دابووە ئێکدی ئەگەر لۆ یەک نەبووین، ئەو هەتا دەمری جلکی ڕەش لەبەربکا و ئەمنیش هەتا دەمرم ڕدێنی بەردەمەوە! ئەی عەشق، چ ژەهرەکی تارو مار و کووشندەی، کوو هەموو هێواران دەمانکوژی و بەیانیانیش لەگەر جریوەی پەڕەسێلکەکانی سەر دارتێلەکان زندیمان دەکەیەوە، ئەی عەشق گەردەنت ئازاد نەبی، ئەی عەشق ئەو ئاگرە چبوو لە هەناوی من و هەورینت بەردا، ئەی عەشق لەو دنیا مەحکەمەی من و توو و هەورینی دەبی هەزاران ساری پێبچی!
هەرکووی هەبوو دری داکم و بابم ڕازی کرد جارێ وازم لێبینن، چوومە دەرێ و بە کۆرانەکەی پشت ماری مەفرەزە خاسەکەی تێپەڕیم و چوومە بازاڕی، گەیشتمە لای مەحکەمەیی و لە بن دیواری قەراتێ، چوومە لای کتێب فرۆشەکان و تەماشا کتێبەکانم دەکرد، گۆتم بزانم یەک دوو کتێبان ناکڕم، سەرم شۆڕکردبۆوە سەر کتێبان، جاحێرەک لە تەنیشتە من ڕاوەستابوو، وەکی من تەماشا کتێبانی دەکرد، سەری هینا لای سەرم و گۆتی: سبەی شەوێ مێوانتان دێ! بە تووندی ئاوڕم داوە، جاحێرەکە چووە ناو قەرەبارغی و خۆی بزرکرد، هەرچەند چاوم گێڕا نەمدیتەوە، زانیم ئەو قسە ئی بازۆیە و دەیەوێ سبەی شەوێ بەسەر ماری ئەو سەرۆک جاشەی دابدا، کە ژیانی من و هەورینی تار کرد! درم ڕنگەی لێوەهات، کوو سبەی شەوێ هەورینی لەو مارەی دەرینم و بیپارێزم، زۆر دەترسام لەو هێرشەی گووللەکی پێ بکەوی و شتەکی لێبێ، خۆ ئەگەر هەورینی من شتەکی لێبێ هەر بە جارەکی شێت دەبم و بە ئاقاری دەکەوم، دیسان دەنووسم: ئەی عەشق کۆستت کەوی!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!