قوماش 134
نووسینی: #ئوسامە جەمیل#

لە ژۆرەکەی هاتمە دەرێ، سەفین گۆتی: با بیکوژم، گۆتم: لۆ دەتەوێ بیکوژی؟ گۆتی: ئەو سەگبابە بوو گوللەکەی لە قۆریدام، گۆتم: جارێ ڕاوەستە، بابزانین دەگەینە کێ، گۆتی: ئەتوو بەمن برێ هەنار وەزعی کووە؟ گۆتم: کێ؟ گۆتی: هەنار! گۆتم: ئەوجە خێرە ئەتوو دەپرسی؟ گۆتی: وەڵلاهی هەرجاری ناویم بە بیردێتەوە دەوم پڕی ئاو دەبی، دەرێم دەبی ئەو هەنارە، شیرین بی، ترش بی، مێخۆش بی! گۆتم: دەرێی بەتەمای خەتی بپسێنی؟ پێکەنی و گۆتی: وەڵلاهی بە گێرەی ناوەکەی پێدەچی زۆر جوان بی، لۆ ناێی وەکی پیاوان هیممەتەکم لۆ بکەی! گۆتم: جارێ با لەو کێشەی قورتاربین، وەعدبی هیممەتەکی باشت لۆ بکەم، گۆتی: کورە دەلێمگەڕێ بابچم ئەو گەمبۆزەی بکوژم، گۆتی: سەبرەکی بگرە، بزانین دەگەینە کێ!
ئەمن و سەفین و سێ چار چەکدار گەڕاینەوە هەولێرێ و چووینەوە مارێمە، بابم لەوێبوو، وەکی زانی هاتینەوە، گۆتی: بەتەمای چبکەی کوڕم؟ گۆتم: بەڕای توو چبکەین؟ گۆتی: وەڵلاهی وەزعەکە هەند ئارۆزبووە، پیاو نازانی چبرێ! گۆتم: ئیشاڵلا خوا حەلی دەکا، گۆتی: زۆرتان ئاگا لەخۆبی، کورە نەکەن خافر بن، وەڵلا هەر خافربن، ئەو زەلامە هجوم دەکا، گۆتم: خەمت نەبی، خۆمان باش تووند کردیە!
سێ چار ڕۆژ تێپەڕی، ڕۆژەکی کابرایەک هاتە مارێمەو بەتەنێ لەگەر بابم دانیشت، دیاربوو هەر خووندەخووندیان بوو، پاشی بەینەکی کابرا ڕۆیی، بابم گازی منی کردو گۆتی: وەرە دانیشە! چووم دانیشتم و گۆتم: برێ بابە! گۆتی: کوڕم ئەو زەلامە هاتبوو، گۆتی: ئەو سەرۆک جاشە ئەمنی ناردیە، دەرێ ئەگەر ئەوان دەستیان هەبی لە ڕفاندنی کوڕەکەم ئەمن لێیان خۆشنابم و ئەوەی پێمبکرێ لەگەریان دەکەم، ئەوجە پێش ئەوەی بگەمە ئەو قەناعەتەی کوڕەکەم لەکنەوانە، با بەری بدەن، ئەگەرنا وەزعەکە بەتەواوی تێکدەچی! گۆتم: ئەتوو چتگۆ بابە؟ گۆتی: پێمگۆ بڕۆ پێی برێ، ئەو تانی هەورینی لە دەستەمە دەربینی، بەران ئەوە خەونە ئەگەر بیەوێ هەنارمان لەبەر دەستی دەربینی، با بەسەلامەتی واز لە هەناری بینن و هەر کەس لەماری خۆی! کابراش گۆتی: ئەمن دەچم پێی دەرێم بزانم چدەرێ! گۆتم: باسی هەورینت نەکرد؟ بابم دەستی لەسەر شانی دانام و گۆتی: کوڕم هەورین خێزانیتی، دەتەوێ چبرێم، کوڕی گەورەم بەگێی بابت بکەو دەست لە هەورینی بشۆ، هەورین لۆتوو تازە بەس یادگارییەکی جەرگبڕەو تەواو، کوڕم ژیان بەردەوامەو لەسەر کەس ڕاناوەستی، ئەگەر لەسەر خێران لەکۆر ئەو کێشەی بووینەوە، ئەوە بەدوو معامەلەی مامەستایەتیەکەی خۆت دابڕۆ و دامەزرێ، تەئکیدم کە بوویە مامەستا لە گوندەکی مەشغول دەبی و زۆر شتی ترش و تار لەبیر دەکەی! هیچ دەنگم نەکرد، هەر چەندە بەو قسانەی بابم زۆر ئازارم پێگەیی، بەران زانیم قسەکانی بابم لەبنی دری دێتە دەرێ و زۆر ڕاستە، لۆیێ خۆم لەبیر کردو گۆتم: مادام وەیە، با هەنار نەفەوتێ زوو عیلاجی بکەین! گۆتی: مەخسەدت چیە؟ گۆتم: سەفین چاوی لەدوو هەناریە و با وەکی ئیمنی لێنێ و زوو لێکیان مارەکەین! گۆتی: ئەوجە پێکدی ڕازینە؟ گۆتم: سەفین هەناری کەتیتە بەر دری و پرسی هەنارییش دەکەین! گۆتی: ئەدی وەختەکی بازۆ هەر باسی هەناری دەکرد، گۆتم: وەڵلا بازۆ بایدایتەوە سەر خۆخێی مام حەمەدەمینی، بەتەمایە ئەوی بینی، وەزعەکەی ئەوهای لێهات، دەنا لەمێژبوو گواستبوویەوە، گۆتی: دە مادام وەیلێهات بەخۆت لەگەر هەناری قسەی بکە، گۆتم: زۆر باشە!
پاش مەغریبێ لەگەر دختۆر شێرۆو کۆمەرەچەکدارەکی چووینە ماری قادرەفەندی، سەلاممان کردو دانیشتین، هەنار هات بەخێراتنی کردین و گۆتی: ئەدی کووە سەفینتان لەگەر نییە؟

پێکەنیم و گۆتم: ئەتوو سەفینی لەکێ دەناسی؟ زەردەخەنەکی کردو چ قسەی نەکرد، گۆتم: سەفین بەخۆی نەهاتیە، بەران ئەمە بەدوو ئیشەکی سەفینی داهاتینە! گۆتی: فەرموون برێن! گۆتم: وەڵلا هاتینە داوای دەستی توو دەکەین لۆ سەفینی، ئەگەر ڕازی پێمان برێ، هەتا زوو ناوی خوای لێبینین و کۆتایی پێبینین، با وەکی ئیشەکەی من و هەورینی لێنێ! بڕەک داماو گۆتی: ناکرێ فکرەکی لێبکەمەوە، گۆتم: با لۆ ناکرێ، ئەو ئیشە بەبێ فکردنەوە هەر نابی، دەوجە هەتا ئەمن چایەکەی دەخۆمەوە، ئەتوو فکری لێبکەوەو وەرامیشم بدەوە، دختۆر شێرۆ گۆتی: ئێ وەختی هەندێمان لەکێبووە ئەی هاوار، تاخیر دەبین تاخیر! هەنار گۆتی: دختۆر شێرۆ وەیە دەرێن ئەتوو ئیشی خۆت بەخۆت دەزانی و بەخۆشت دەزانی چدەکەیی و چناکەی؟ دختۆر شێرۆ گۆتی: بەرێ وەیەو هەر وەش دەبی! گۆتم: یاڵلا هەنار ئەوە چایەکەم تەواو بوو، دەوجە قسەکمان لە دەستی بنێ! گۆتی: ئەتوو وەکی برای منی، کووت پێباشە ئەوها بکە! دختۆر شێرۆ گۆتی: ئەلفاتیعە مەعەلسەلاوات! گۆتم: کێڕان کێڕان! گۆتی: وازم لێبینە، دختۆر شێرۆ ئیشی خۆی بەخۆی دەزانی، ئەمن لە ئاین و ئۆینی ژنان باش تێدەگەم! گۆتم: دە مادام وەیە، بابچین خەبەرەکەی ببەینەوە، وەبی فەوری و سەوری بێین لێکیان مارەکەین!
ڕۆژی پاشی بە قەرەبارغیەکی زۆر چووین و بابم هەناری لە سەفینی مارەکردو شەکراو خوراوەو پیرۆزباییمان لێکردن، لە کاتی مارەکردنەکەی دیقەتمدا داکم فرمێسک بە هەردوو چاویدا دەهاتە خوارێ و زوو زوو تەماشایەکی منی دەکرد، وەکی برێی برینی کەونی دەکولانەوە، ئەو برینەی ئەمن و هەورین لە هەناوی سێ چار خێزانمان کردو تیمار نابی و نابی!
دوو سێ ڕۆژ تێپەڕی و بابم گازی سەفینی کرد، گۆتی: کوڕم ئەو ژنە زوو بگۆزەوەو تاخیری مەکە، کەس نازانی دنیا چی بەسەردێ، با وەکی مەسەلەکەی مەی لێنێ، سەفین گۆتی: بەچاوان، لەو دوو سێ ڕۆژەی خلاسی دەکەم، ئەمە لەو قسانە دابووین، مام ڕەسوری لاسەی بەخۆو بە کۆمەرە خزمەکی بەژۆرێ کەت، دیاربوو هەموو چەکیان لەخۆ بەستبوو، سەلامیان کردو بابم لەبەریان هەستاوەو چاک و چۆنیمان کرد، گۆتی: دەبا گلەییەکتان لێبکەم، ئو هەرایە قەومایە، ئەنگۆ لۆ خەبەرەکیمەتان نەدایە، ئاخر ئیش کوو ئەوها دەبی! بابم گۆتی: ئەنگۆ خۆشەویست و کەس و کاریمەنە، ئەمە لەنگۆ زیاتر کێمان هەیە، بەران ئیشەکە بە پەلە ڕوویداو ئەلحەمدولیللا زەلامیش زۆربوون و ئەو خزم و برادەرانە قسووریان نەکردیە! ئەمە ئەگەر لێشن بقەومێ هەر ئەنگۆ بە هانان دێن و هەر ڕووش لەنگۆ دەکەین!
وەختی هێوارێ لە ژۆرێ دانیشتبووین، دختۆر شێرۆ بە مشەوەشی لە خەستەخانەی هاتەوە، سەلامی کردو داکم گۆتی: دختۆر شێرۆ ئەوە لۆ ئەوها مشەوەشی، تێمانبگەینە چبووە؟

دختۆر شێرۆ گۆتی: ئەوجە چنەبووە، هەرایەکە هەرا، نە سەری دیارە نە بن، بابم گۆتی: ئێ دەبرێ کوڕم بزانین چبووە؟ گۆتی: وەڵلا ئەو سەرۆک جاشە بەخۆو بە مندارەوە بەناو ئێککەتینەو ئێکدیان خلاس کردیە! بابم گۆتی: لۆ؟ شێرۆ گۆتی: دونێ شەوێ لە مەزرەعەی بووینەوە مێوانیان هەبووە، هەتا نیوەی شەوێ ئارەقیان خواردتەوەو قوماریان کردیە، کوڕەکی زۆری دۆڕاندیە لە قوماری، کە پارەی پێ نەمایە، سویجی تڕومبێلی دانایەو ئەویشی دۆڕاندیە، ئەوجارە گۆتیتی: خانییەکەی هەولێرێ، ئەویشی دۆڕاندیە، بابی وەکی پێیزانیە لێک گیربووینەو بوویتە هەرا، بە تفەنگان بەناو ئێککەتینەو ئێکدیان کەلوکۆم کردیە، چار لە مێوانەکان کوژرایە، کوڕەک و برازایەک و خوشکەزایەکی سەرۆک جاشەکەش کوژراینە، دەوری بیست و پێنج کەسیش بریندارن، گۆتم: ئەدی سەرۆک جاشەکە؟ شێرۆ گۆتی: ئەو سەگبابە دوو گووللەی بە لاقوونی کەتیەو شەوێ هینابووین، عەمەلەتیان لۆکردیەو دەرباز بووە، گۆتم: ئەو کەری کەربابە لەمە بووە پشیلەی حەفت ڕوح و نامری و نامری! بابم گۆتی: کوڕم، هێشتا ئەجەلی نەهاتیە، وەکی ئەجەلی هات، بەخۆشی نازانی کوو سەراوبن دەبی، دختۆر شێرۆ گۆتی: ئەو خەبەرە خۆشە، چونکە تەئکیدم لەبەر ئەو هەرایەی ئاگایان لەمە نامینێ و تازە کەتینە داوی خۆیان، قابیلە ماری ئەو هەموو کوژرایەی بە سانایی وازیان لێبینن، لە هەموو عەنتیکەتر دەرێن ئەوان لە عیزبەکینەو مارێ ئەو سەرۆک جاشەش لە عیزبەکیدی، مەعنای وەیە ئەو ئاگرە بە هەوەنتە ناکوژێتەوە! داکم گۆتی: دەوەرە دانیشە وەرە، مادام ئەو خەبەرە خۆشانە دەینی، با چایەکی عەننابیت لۆ تێکەم! شێرۆ گۆتی: ئەی ڕەعمەت لە بابت دایە عاجی، دەوجە ئەو دیشلەمەشم لۆ بینە، کە بە دەستی خۆت دروستت کردیە!
مام ڕەسوری لاسەی دوو شەوان لەمارێمە مانەوە، پاشان لەسەر ڕجاو تکای بابم بڕیاریان دا بچنەوە شەقراوەیی و بابم پێی گۆتن: تەئکیدبن، ئەگەر خوانەخواستە شتەک ڕووبدا، خەبەرتان دەدەمێ! ئیدی خواحافیزییان کردو بەڕێکەتن.
پاشی سێ چار ڕۆژان لەگەر دوو سێ چەکداران چووم سەرەکم لە داک و بابی بازۆی دا، گۆتم بزانم وەزعیان کووە و بازۆش هیچ دەنگ و باسی نییە، بەینەکی باش دانیشتم و قسەی خۆشمان کرد، داکی گۆتی: بازۆ تەلەفۆنی کردیەو گۆتی لەو ماوەی دێمەوە، گۆتم: کوو دێتەوە، ئەدی تووشی کێشە نابی لەگەر مەسوولەکانی حیزبەکەی؟ گۆتی: ئەمنیش پێمگۆ، گۆتی: پێیان گۆتیمە وەرەوە بە ئاقری دانیشە، هیچت لێناکەین، ئەوجە؟قەولە بێتەوە، خۆخێی مارەکاو لەگەخۆی بباتە خاریج، گۆتم: دەی خێری تێدایە ئیشاڵلا، خوای گەورە بیانپارێزی و هەر لەخۆشیدابن!
پاش مەغریبەکی درەنگ لەمارێ دانیشتبووێن و چەکمان لەکۆشی دابوو، مندارەکی عەوڵای مام سەعیدی هات و گۆتییە من: تەلەفۆن ئەتووی دەوێ، گۆتم: نەیگۆ کێیە؟ گۆتی: لێم نەپرسی، بەران ژنەکە، گۆتی: لۆم گازیکەن! ئەمن هەر لەخۆمەوە فکرم لۆ وەی چوو هەورینبی، بابم گۆتی: بەتەنێ مەچووە دەرێ، با دوو زەلامت لەگەر بێن، ئەو وەزعەش ئەوها دەرناینی، دەبی تەلەفۆنەکی پەیابکەم، لەگەر دوو لە ئامۆزایەکانم هەستام و چووینە مارێ عەوڵای مام سەعیدی، دەستم دا تەلەفۆنی و بە گێم وەناو گۆتم: هەلەو! ئەویش یەکسەر گۆتی: پرتەقار ئەتووی؟
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!