ڕەحەتە لوقم
#کاروان حەسەن#
بەر لەهەموو شتێک من نەهاتووم باسی تەکنیک و شێوەی نووسین و جۆری گۆشەنیگا و شتی تری تایبەت بەهونەری ڕۆمانەوە بکەم، ئەوانە بۆ کەسی شارەزا و تایبەت بەو بوارە جێ دێڵم، من تەنیا لەڕووی بابەت و ڕووداوەکانەوە لەم ڕۆمانە دەدوێم.
ئەم ڕۆمانە گێڕانەوەیەکی ڕۆژگارێکی پڕ حەسرەت و کێشە و مەینەتی میللەتی کوردە کەلەنێوان ساڵانی (1963- 2006) ڕوویان داوە.
ڕووداوەکان بەگشتی وەک شوێن لە گەڕەکی (تەیراوە) ی هەولێر ڕوویان داوە، سەرەتا و دەستپێکی ڕووداو لە ڕۆمانەکە بەوە دەستپێدەکات کاتێک بنکەی پۆلیسی تەیراوە هەموویان بەیەکەوە خۆیان و تفاق و تفەنگەکانیا ن دەچنە شاخ و دەبنە پێشمەرگە، لەناو ئەو پۆلیسانەش فۆکس خراوەتە سەر ژیانی (عەتاوڵڵا تەیراوەیی) ئەو یەکێک بوو لەپۆلیسەکانی ببووە پێشمەرگە، کاتێک حزبی بەعس هەواڵەکە دەزانێ هەموو ئەو ژنە پۆلیسانە دەگرن و دەیانخەنە زیندانەوە، (بەگم)ی خێزانی عەتاوڵڵا یەکێک دەبێت لەو ژنانەی دەخرێتە زیندان، بەڵام بارودۆخی ئەو جیاوازە لەژنانی تر کەهاوزیندانین و لەگەڵ ئەو گیراون، بەهۆی ئەوەی زگی هەیە، ئەوەیە دوای ماوەیەک لەزیندان دەمێننەوە و شەوێک ژان دەیگرێت و منداڵەکەی دەبێت، دوای ماوەیەک (عەتاوڵڵا)ی مێردی لەڕووبەڕووبوونەوەیەکدا لەگەڵ ڕژێمی بەعس شەهید دەبێت و حزبی بەعس خێزانی عەتاوڵڵا لەزیندان ئازاد دەکەن، ئیتر (بەگم) خۆیی و کۆرپەلەکەی کە ناوی (غەریب)ە، بێ چەتری باوکایەتی دەمێننەوە، بەڵام (بەگم) ژنێکی تابڵێی ئازا و چوست و چالاک و بە ورە بوو، لەسەر پێییەکانی خۆی وەستا و بەدیار غەریبی کۆرپەلەی دانیشت و شووی نەکردەوە، بەکارکردن لەحەمام و ماڵان کارەکەری دەکرد و بژێوی خۆیی و منداڵەکەی بەڕێوە دەبرد، ڕۆژگار هات و ڕۆیشت، غەریب گەورە بوو، کوڕێک بێ ئەوەی باوکی ببینێ، لەسۆزی باوکایەتی بێبەش، چونکە سێبەری باوکی لەسەر نەبوو دایکیشی لەبەر کارکردن و پەیداکردنی بژێوی ڕۆژانە وەک پێویست ئاگاداری نەبوو ئیتر غەریب تووشی بەتووشی هاوڕێی خراپ دەبێ و مێردمنداڵێکی شەڕانگێز و بەجووڵەی لێدەردەچێت و لەگەنجیشدا سەرە ڕۆ و عەجوول دەبێت و دەبێتە مەشڕوب خۆرێکی ئاڵودە بەیانەکان و شەڕاب و ڕەحەتە لوقم، ئیتر ڕۆگارێکی ناخۆش و پڕ مەینەت و بەئێش و ئازار بەڕێ دەکات و هەتا ماوەکیش لەزیندان بەسەر دەبات و دواتر بە کەفالەتی سەرۆک جاشێک ئازاد دەکرێ بەو مەرجەی چەکی جاشایەتی بخاتە شانی و ئەویش قبوڵی دەکات. غەریب بە ژیانێکی ئاڵۆز و پڕ کێشەدا گوزەر دەکات، بێ باوکی و بێ کەسی دەیکاتە کەسێکی خراپ بۆ خۆی، دواتر بەهۆی بێ ئیش و کارییەوە ئەو شوێنەی ماڵی خۆی تێدایە کە حەسارە دەکاتە قومارخانە بۆ پەیداکردنی پارە، بەڵام دواجار هەموو ئەو پارانەش لەقومار کردن دەدۆڕێنێ، ڕووداوەکان زۆرن و ناکرێ لێرەوە هەموو شتێک بخەمە ڕوو، بەڵام لەم گێڕانەوەیەدا پەردە لەڕووی کۆمەڵێک بابەت و لایەن هەڵدراونەتەوە و باسیان لێوەکراوە وەک:(کۆمەڵایەتی، سیاسی، ئاینی، هاوڕێییەتی، داب و نەریت، شەڕ و ماڵوێرانی) هەروەها ناوی دەیان کەسایەتی و ڕۆشنبیر و هونەرمەندی تەیراوەی تێدایە.
لایەنێکی گرنگ ئەوەیە کە لەڕاپەڕینی ساڵی 1991دا چۆن خەڵک کەوتە دزین و سووتاندنی کەل وپەلی فەرمانگەکان. ئەمەش بەیەکێک لەبێ سەروبەرییەکان و بێ پلانی بەرەی کوردستانی و هێزی پێشمەرگە دەگەڕێتەوە، ڕووداو گەلێکی زۆر هەن و سەرنجی خوێنەر ڕادەکێشن و پەلکێشی ناو ڕووداوەکانت دەکات، دەتوانن خوێنەری بن و هەموو ئەو کێشە و ڕووداوانە بخوێننەوە.[1]
Αυτό το στοιχείο έχει γραφτεί σε (کوردیی ناوەڕاست) γλώσσα, κάντε κλικ στο εικονίδιο
![](https://www.kurdipedia.org/images/flags/ku.png)
για να ανοίξετε το στοιχείο στην αρχική γλώσσα!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Αυτό το στοιχείο έχει προβληθεί φορές 952
Γράψτε το σχόλιό σας για αυτό το προϊόν!