قوماش 146
نووسینی: #ئوسامە جەمیل#

گەڕامەوەو سەلامم لێکرد، گۆتی وەی عەلەیکەسەلام کا گیزەکە، گۆتم: بالۆت باسبکەم، گۆتی: باسی چدەکەی، کا گیزەکە؟ گۆتم: وەڵلا گیزم لۆ هینابووی، گەیشتمە سەیتەرەکەی ئەودیووی ڕوباری، گۆتی: ئەوی مەجیدە قەرەو مەسولیتی، گۆتم: هەوە، گۆتی: ئەو کارخانچییە گیزەکەی نەگێڕابیتەوە؟ گۆتم: بەرێوەڵلا، گۆتی: بینە بدەمن، گۆشت قابیلی بازیە، گۆتی: ئەو عەرز عیزە ئەوە چەندەم جارە وەدەکا، خۆ ڕەنگ نییە شتەکم لۆبێ، یەکسەر لوولی دەدا، گۆتم: ئێ بەخۆت دەزانی ئەمن دەرەقەتی وی نایێم! گۆتی: خەتای توو نییە، ئەوە یەکەمجاری نییە ئەو دەگگانە داوێ، ئەمن عیلاجی دەکەم، ئێستا یەک ڕاپۆرتی لەسە دەنووسم و دەرێم دزەو بەدەرکردنی دەدەم، گۆتم: داوای لێبوردن دەکەم نابی گلەییت هەبی، گۆتی: ئیزنت دەدەم، بەران ئەگەر ئەو جارە لە هەولێرێ هاتیەوە، دەبی هەندە گیزم هەلۆبینی، گۆتم: بەچاوان، گۆتی: دەبینە دە دینارم بدێ، مادام هەر هاتی بەدەست بەتاری مەڕۆ! ئیدی چارەم نەبوو دە دینارم لە دەستینا، وەریگرت و گۆتی: بەخێربێی سەر ئەو چاوانە!
گەڕامەوەو سواری تڕومبێلی بووم، جەماعەت گۆتیان: باشبوو قورتاربووی، وەڵلا خێرەکت لەسەرە! شوفێرەکە گۆتی، ئاخیر سەیتەرەمان مایە، لەوێ قورتاربین، بەسەلامەتی دەگەینەوە ناو هەولێرێ، پێنج شەش دەقەکی پێچوو گەیشتینە سەیتەرەی شاوێسی، شوفێرەکە ڕایگرت و هەویەکانی برد، ئەمەش لەناو تڕومبێلی دانیشتبووین، چەکدارەک هات و گۆتی: ئەوە لۆ دانابەزن لۆ تەفتیشی، دیارە کلک زەردن! بەناچاری هاتینە خوارێ، گۆتم: وەڵلا لەولای دەیانگۆ کلک کەسک، ئێستاش بووینە کلک زەرد، چەکدارەکە گۆتی: دەبینم زمان درێژی دەکەی، وەرە پێشمکەوە وەرە، ئەمنی بردە کن مەسوولەکەی، مەسوولەکە لە پێشەوەی پیکابی دانیشتبوو، شەپقەکی عەسکەری لەسەریبوو، چەکدارەکە گۆتی: گەورەم ئەوە پێدەچی جاسووسبی! ئەویش سەری برنکردو گۆتی: لۆ چیگۆتیە؟ گۆتم: وەڵلا هەر ئەوەندەم گۆ: لێرە پێمان دەرێن کلک زەرد، لەولاش دەرێن کلک کەسک! مەسوولەکە زەردەخەنەکی کردو گۆتی: ئەتوو چ ئیش دەکەی؟ گۆتم: تازە دامەزرایمە بە مامەستا، گۆتی: بڕۆ لەکۆرمان بەوە بڕۆ! گۆتم: زۆر مەمنون مارت ئاوابی، گۆتی: ئەمن ئەتوو دەناسم، لۆیێ ئیزنم دای، ماشەڵلا شکلت عەینەن شکلی بابتە، سەلامان لە بابت بکەو خوات لەگەربی! گەڕامەوە لای تڕومبێلی، ئەمن و شوفێرو نەفەرەکیدی ماینەوە، دیاربوو لەو سەیتەرەش ئێکیدیان لە جەماعەتیمە لوولدابوو، سواری تڕومبێلی بووین و شوفێرکە گۆتی: وەلەو دوو شەهیدمان دا، بەران باشبوو ئەمە قورتاربووین، لەوەتی لەو ڕێیەی هات و چووی دەکەم، بەبەردەوامی ئێک دوو نەفەرم لێ کەم دەکا، گۆتم: زوو پێلێنێ با دەربازبین، شوفێرەکە گێڕی گۆڕی و پێی لێنا!
گەیشتینە کن خەستەخانەی جمهوری و گۆتم: ئەمن لێرە دیمە خوارێ، گۆتی: بەچاوان، ڕایگرت و خواحافیزیم لێکردن و لەجادەی پەڕیمەوە ئەوبەری، یاغریاغر بەبندیواری خەستەخانەی شۆڕبوومەوە لۆلای مارێ، لە قولینچکی خەستەخانەی سوڕامەوەو لای مارێ بەدەرکەت، درم گەشبۆوە گۆتم: ئۆخەی ئەوجارەش گەیشتمەوە مارێ، تەماشامکرد، گەڕەک چۆلە، هەر لەخۆمەوە هەستمکرد شتەک بووبی، لۆیێ بڕەک بەتووندی ڕۆیشتم، گەیشتمەوە مارێ و لەدەرکەمدا، کەس دەرکەی نەکردەوە، چووم لە دەرکەی ماری مام قادر قرپەستوورمدا، ئەوانیش کەس لەمارێ نەبوون، گۆتم: خوایە گەڕەک لۆ ئەوها چۆلە، دەبی چببی! چووم لە دەرکەی ماری دختۆر شێرۆم دا، وەختەکی مندارەک هات کردیەوە، گۆتم: ئەوە لۆ گەڕەک ئەوها چۆلە؟ گۆتی: وەڵلا پلکە زەکیەی مام قادر قرپەستووری گوللەکی بە پەراسووی کەتیەو هەموو ڕۆیشتن لۆ تەواری!

جانتایەکەم لەماری دختۆر شێرۆی داناو بەڕێکەتم لۆ تەواری، وەکی گەیشتمەوێ، دیتم زۆر قەرەبارغەو دەرزی فڕێدەیە عاسمانێ ناکەوتە عاردی، چونکە هەر زەکیە بەتەنێ بریندار نەببوو، بەرکو خەرکەکی زۆربوون و هەریەکەی دەتانی برێی لەگەڕەکیبوو، گەڕام لەناو قاوشەکان دختۆر شێرۆم دیتەوە، غارمدا کنی و سەلامم لێکرد، گۆتی: ئۆه ئەوە هاتیەوە؟ گۆتم: ئەرێوەڵلا، دیاربوو، بتلە خینەکی بەدەستبوو، گۆتم: ئەتوو بەمن برێ زەکیە خان کووە؟ گۆتی: دوعای لۆبکە وەزعی باش نییە، وا لە عەمەلیاتیەو دەبی ئەو بتلە خینەی بگەینمە عەمەلیاتی، گۆتم: کا داک و بابم، گۆتی: وا لەپێش دەرکەی عەمەلیاتینە، وەرە بابتبەم! وەگە دختۆر شێرۆی کەتم و ڕۆیشتین، گەیشتینە پێش دەرکەی عەمەلیاتی، دیتم داک و بابم و زۆربەی جیرانەکان لەوێنە، داکم چاوی بەمن کەت قیت بۆوە، چووم دەستی وی و بابم ماچکردو چاکوچۆنیم لەگەر جیرانەکانیشکرد، تەماشامکرد مام قادر لەسە چینچکان دانیشتیەو پاری بە دیواری دایە، دیاربوو زۆر بێتاقەتبوو، سەلامم لێکردو دوعای خێرم لۆ پلکە زەکیەی کرد، ئیدی لەگەر جەماعەتی لەوێ ڕاوەستاین و چاوەڕێی خەبەرەکی ناو عەمەلیاتی بووین، گۆتمە یەک لە کوڕەکانی مام قادری: ئەوە داکتان کوو برینداربووە، گۆتی: بەسەردان چووبوە پیرزینی، سەرەکی لەداپیرم بدا، لۆ نەببوە شەڕە تۆپ لەبەینی هەردوولایان، گوللە تۆپەک کەتبووە جیرانەکی ماری داپیرم و ببووە مشەوەشی، ئیدی دەرپەڕیبوونە دەرێ، لەو هەراوهۆریایەی ببوە تەقەو گوللەک بە پەراسووی داکم کەتبوو، ئیدی لەوێ زوو گەیاندبووە تەواری، خەبەریان دامەو هاتین، ئەوجە بەتەمای خوای، گۆتم: یاڕەببی خوا شفای بداو بەسەلامەتی بێتەوە مارێ.
دوو سعاتەکی پێچوو، دختۆر شێرۆ هاتە دەرێ، گۆتی: عەمەلیاتەکە تەواوبوو، وا دەیبەینە عینایە موڕەکەزەی، ئەوجە دوعای لۆبکەن و تکایە بڕۆنەوە مارێ، ئەو قەرەبارغیە هیچ سوودی نییە، ئەوە ئەمن لێرەمەو با مام قادرو کوڕەکانی لێرەبن، هەموو گۆتیان بابە ئەمە کوو دەڕۆین و قادری بەجێدێلین، وەڵلا هەتا زەکیە نێتەوە مارێ، ئەمە ناڕۆینەوە! بابم گۆتی: کاکە بەگێی دختۆر شێرۆی بکەن، ئەو لە ئیشەکەی دەزانی، با ئەمە بچینەوە لای مارێ و ئەو جاحێرانە لێرەبن، ئیشاڵڵا بەسەلامەتی دەردەچی و هەر چشتەکی تازەش بوو، خەبەرمان بدەنێ! ئیدی ئەمە زۆربەی جیرانەکان خواحافیزیمانکردو گەڕاینەوە مارێ.
شەوێ دختۆر شێرۆ خەبەری هیناو گۆتی: زەکیە هومبە وەزعی باشەو بەخۆ هاتتەوە، داکم گۆتی: هەی قوونکەتی، ئەوە چ زەکیە هومبەتە، ئەو بەستەزمانە وا لە مردنە، شێرۆ گۆتی: ئێ ئێ دایە عاجی، هەر ئیشت بەمن دەبی، ئەوجە خۆت دەبینیەوە، داکم گۆتی: ئیشاڵلا قەت ئیشم بەتوو نابی، بابم گۆتی: وەختی هەندێ نییە، ئەنگۆ دوعای بکەن زەکیە خان زیاتر بەرەو باشی بڕوا، هەتا دەوری سعات دوازدەی شەوێ لەماری مام قادری بووین و لەگەر کیژەکانیان دانیشتین، هەندەی نەبرد مام قادر هاتەوەو کوڕەکیشی لەگەربوو، سەلامیان کردو بەخێراتنەوەمان کردن، مام قادر گۆتی: جەماعەت ئەلعەمدولیللا ئەوجارەش زەکیە بەسەلامەتی دەرچوو، دوعای لۆبکەن سێ چار ڕۆژیدی لە خەستەخانەی دەربچی، گۆتمان: ئیشاڵلا بەسەلامەتی دێتەوە، بابم گۆتی: دەوجە کاکە ئەمە دەڕۆین و ئەنگۆش ئیسراحەتەکی بکەن چونکە زۆر ماندینە، ئیدی خواحافیزیمان کردو هەر کەسەو چۆوە ماری خۆی.
دە ڕۆژەکی پێچوو زەکیە لە خەستەخانەی دەرچوو، بابم بەمنی دەگۆ: کوڕم زۆر مەچووە دەرێ، با ئەو سەرۆک جاشە فرسەت وەرنەگری و زەڕبەکت لێنەدا، عەسرەکی بازۆ لەگەر خۆخی دەزگیرانی هات و ماوەکی دانیشتن، گۆتیان: ئەمە هاتینە لۆ خواحافیزی و دەبی سبەینێ لۆ سوریای بەڕێبکەوین، لەوێش لەماوەی دوو حەفتەی ئیشاڵلا دەردەچین، ئەمەش دوعای خێرمان لۆکردن و خواحافیزیمان لێکردن، بازۆ لەدەرکەی سەری لەبن گێی نام و گۆتی: ئاگات لە هەورینی نییە؟گۆتم: ناوەڵڵا، هیچ خەبەری نییە، گۆتی: ئەو سەرۆک جاشە گێڕی گۆڕیەو ئێستا لەجاران بەهێزتربووە، پارەو چەکەکی زۆریان دایتێ و دەورەکی زۆری هەیە لە تێکبەردانی ئەو دوو حزبەی، لۆیێ ئاگات لەخۆبی، گۆتم: باشە دەستت خۆشبی و ئیشاڵڵا بەسەلامەتی دەردەچن، خواحافیزیان کردو ڕۆیشتن.
ڕۆژەکی تەلەفۆنەکیان لۆکردین و گۆتیان سعات حەفتی هێوارێ وەرە نووسینگەی تەلەفۆنی، ئێکەک بەناوی سەفینی دەیەوێ قسەت لەگەر بکا، درم خۆشبوو بەو خەبەرەی و حەزمدەکرد بزانم دەنگ و باسی سەفینی چیە، بابم گۆتی: کوڕم بەتەنێ مەچوو، لەگەر دختۆر شێرۆی بڕۆن و ئیشاڵڵا خوا دەتانپارێزی، گۆتم: زۆر باشە، هێوارێ لەگەر دختۆر شێرۆی چووینە نووسینگەکەیی و بەینەکی چاوەڕێمان کرد، وەختەکی گۆتیانەمن: بڕۆ کابینەی ژمارە سێی، هەستام و چوومەوێ، هەندەی نەبر گۆتیەمن: تەلەفۆنەکەی هەگرە، هەرمگرت و گۆتم: ئەلۆ! سەفین بەدەنگەکی کز گۆتی: کوی؟ گۆتم: ئەتوو کوی؟ گۆتی: زۆر خراپم زۆر، لەگەر ئەو قسەی هەستمکرد قوڕگی پڕی گریانەو بەزۆری قسان دەکا!

گۆتم: تێمبگەینە چبووە، لۆ ئەوها بێتاقەتی؟ گۆتی: هەنار! گۆتم: هەنار چیتی، لۆ قسەم لۆ ناکەی؟ گۆتی: هەنار نەخۆشەو وەزعی زۆر خراپە! ئەو قسەی سەفینی لۆمن، وەکی ئەوەی وابوو لەسەر چیایەکی زۆر برند فڕێمبدەنە خوارێ، گۆتم: ئەتوو بەڕاستیتە، یان سوحبەتم لەگەر دەکەی؟ گریاو گۆتی: ئەو قسە ئی سوحبەتێ نیە، هەنار تەواو، ئەوپەڕی سێ مانگیدی بژی! گۆتم: سەفین ڕجات لێدەکەم، لۆم باسبکە، هەنار لۆ تووشی ئەو دەردەی بووە؟ گۆتی: هەر گەیشتینە ئەوڕوپای، پاش فەترەکی ژانەکی زۆر لە زگی پەیدابوو، هەستاین چووینە دختۆری، پاش فحوساتەکی زۆر، دختۆر گۆتی: زەهیر(ژەهر)خواردی کرایە، زەهیرەکەش زۆر بەقووەتەو بە تەواوی تەئسیری لە هەموو لەشی کردیەو تازە هیچمان پێناکرێ، هەر ئەوەندە هەیە ڕەنگە بتانین دوو سێ مانگ تەمەنی درێژکەینەوە، گۆتم: باشە نازانن کوو زەهیر خواردی کرایە؟ گۆتی: دختۆر دەرێ، پێدەچی لۆی لەشەربەتی کرابی، گۆتم: هەبی و نەبی لە کوڕی ئەو سەرۆک جاشەی دەرنەچووە، گۆتی: ئەمنیش شکم لۆوی دەچی، گۆتم: هەنار زانیتی؟ گۆتی: بەرێ، ئەو دختۆرانەی ئەوڕوپای هیچ چشتەکی لە نەخۆشی ناشارنەوە، ڕاست و ڕاست پێت دەرێن، گۆتم: هەنار ئێستا لەکێیە؟ گۆتی: لەمارێیەو هێشتا بەتەواوی نەیهێخستیە، بەران هوردە هوردە دەیهێخی و ئاخیری دەیکوژی! بەدەستەخۆم نەبوو، لە پڕمەی گریانێمداو سەفینیش وەکی من هۆڕ هۆڕ دەگریا، لەبەر گریانێ نەمتانی هیچ برێم، هەر ئەوەندەنەبی سەفین گۆتی: نەکەی بەماری بابم یان بە هەورین و خوشک و برایەکانی برێی، ئەوان خەمیان زۆر کەم نیەو خەمی هەناریشی بێتە سەرێ، تەلەفۆنەکەم قەپاتکردو چوومە دەرێ، دختۆر شێرۆ وەکی چاوی بەمن کەت، زانی چشتەک بووە، لۆیێ گۆتی: پێمبرێ چبووە، گۆتم: چت لێبشارمەوە، هەنار زۆر نەخۆشەو لەمردنە! شێرۆ گۆتی: کورە خێر برێ! گۆتم: وەڵلا کووت لۆ باسدەکەم ئەوهایە، سواری تڕومبێلی بووین و بەڕێکەتین لۆلای مارێ، هەتا گەیشتینەوە نێزیکی مارێ هەر گریایمەو فرمێسکم ڕێشتیە، هەزارو یەک داڵغەو فکرو خەیارم کردیە، دەمگۆ پێشتر دەمگۆ سەفین هەنار قورتاربوون و لۆ ئێکبوون، هەر ئەمن و هەورین نەبی تەفروتونابووین.
خواحافیزیم لە دختۆر شێرۆی کردو پێمگۆ لەکن کەس باس نەکا، فرمێسکی چاوم سڕیەوەو چوومەوە ژۆرێ، خۆم وا پیشاندا هیچ نەبووە، بەران چونکە دری داکی خەبەردەدا، داکم هەر چاوی بەمنکەت، گۆتی: پێمبرێ بزانم چبووە، لۆ ئەوها بێتاقەتی؟ گۆتم: هیچ نەبووە، بڕەک سەرم دێشی لۆیێ، داکم گۆتی: کوڕم چشتی لەمن مەشارەوە، ئەو درەم خەبەری دایە چشتەک بووە، کوڕم دری داکی درۆی نازانی، ڕاست و ڕاست پێمبرێ چبووە؟ گۆتم: وەرە بابچینە کن بابم و پێت دەرێم، چووینە ژۆرێ و دیتم بابم دانیشتبوو و قورئانی دەخیند، سەلامم لێکردو دانیشتین، داکم گۆتیە بابم: دەلێی بپرسە بزانە چبووە، ئەو کوڕە تەواو نییە، بابم ڕووی لەمن کردو گۆتی: دەبرێ کوڕی گەورەم برێ، بزانم چبووە؟ گۆتم: وەڵلا بابە، هەنار نەخۆشە، داکم گۆتی: هەناری خوشکی هەورینی؟ گۆتم: بەرێ، گۆتی: ئەی کۆرەبم، ئەو ژنە چیتی کوڕم؟ گۆتم: وەڵلاهی دایە، بە قسەی دختۆرەکانی وێندەربی، زەهیر خواردی کرایەو وەزعی زۆر خراپە، بابم گۆتی: عیلاجیان نەکردیە؟ گۆتم: لە عیلاجی دەرچووەو هیچیان پێناکرێ، تێکەری خینی بووەو ئاخیرو ئۆخیریتی، داکم و بابم زۆر بێتاقەت بوون، داکم خۆی پێنەگیراو دەستی بەگریانێکرد، گۆتمە داکم و بابم: بەران سەفین زۆر ڕجای کردو گۆتی: توخوا با نەمارێ بابم و نەمارێ خەزورم بزانن، بابم گۆتی: کوڕم هەر دەبی بزانن، خۆ ناکرێ ئەو شتەی لەوان بشارینەوە، گۆتم: سەفین دەیەوێ بەخۆی لە دەرفەتەکی پێیانبرێ، لۆیێ گۆتی: ئەنگۆ باس مەکەن، داکم گۆتی: وەی لۆت کۆرەبم هەنارۆکە، ئاخیری لە وراتی غەریبی دەمری، ئەمن گۆتم: لۆخۆی گەیشتە سەفینی و قورتاربوو، نەمزانی عیزڕائیل لەوێ چاوەڕێی دەکا، بابم گۆتی: کوو دەزانم خوا بەهەقە، ئەوها دەزانم ئەو ئیشە لەماری ئەو سەرۆک جاشەی دەرنەچووە!
مایتی[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!