شەهید وریا کێ بوو؟
کوشتنی وریا بە تەور، تاوان و چیرۆکی ڕاستەقینەی سەردەمی ڕۆژانی سەختی پێشمەرگایەتین و کارەساتێکی جەرگبڕ و ناخۆشی نێو شۆڕش و خەباتن، بەداخەوە کەسانێک شەرمنانە یاخود بۆ لەدەستنەدانی بەرژەوەندییەکانیان، ئەنگوست ناخەنە سەر ڕاستییەکان و ئەوەش دەبێت بە جۆرێک لە بازرگانیکردن و بزواندنی هەندێک ئەقڵی بچووک و ئارامگیری بۆیان، بازرگانیی بێ دەستمایەش هەر مایەپووچ دەبێت. ڕەزاقی وەستا وەهاب ناسراو بە وریا ڕەش، لە ساڵی 1956دا لە شاری سلێمانی لەدایک بووە. لە ساڵی 1978دا سەر بە ڕێکخستنە نهێنیییەکانی کۆمەڵەی ڕەنجدەرانی کوردستان بووە، تێکۆشەرێکی خۆنەویست و ئێجگار بلیمەت و چاونەترس بووە، نهێنی پاراستن لەلای وریا زۆر گرنگ بووە و ببووە هۆکاری ئەوەی هەمیشە لە کار و چالاکییەکانیدا سەرکەوتوو دەبوو. شەڕی نەگریسی کورد کوشتن و مەرامی گڵاوی هەندێک لە سەرکردە و فەرماندەکانی نێو حیزبەکان و شۆڕش، بووە هۆی ئەوەی دەستیان سوور بێت بە خوێنی یەکتر.
بەڵام هیچ کام و هیچ کاتێکیش هەندێک لەو سەرکردانە بە دەستی خۆیان هیچ چالاکییەکان لە بەرژەوەندیی شۆڕش ئەنجام نەداوە، جگە لە مەلا بەختیار لە تۆڵەی شەهید خاڵە شەهاب و هاوەڵەکانی کە لەسێدارە دەدرێن، پارێزگاری بەعسی شاری سلێمانی لە شەقامی مەولەوی لە شاری سلێمانیدا، لەگەڵ دوو تێکۆشەری دێریندا بە سزای گەل و شۆڕش دەگەیەنن، دەنا زیاترینیان بە خەڵکی دڵسۆز و هێزی پێشمەرگە کارەکانیان پێ ڕاپەڕاندوون. یەکێک لەو پێشمەرگانەی لە شاری سلێمانیدا کاری ئیختیالات و لە نەیارانی یەکتریان پێ بە کوشت دەدان، ئەویش ڕەزاقی وەستا وەهاب ناسراو بە وریا ڕەشە. ئەو کادر و بەرپرسانەی بە دەستی وریا و بە فەرمانی ناوەندی کۆمەڵە کوژران، بریتی بوون لەم ناوانە: (نووری حەمە عەلی - پارتی، عەبدولی سۆران - پارتی، سدیق ئەفەندی - پارتی، فەتاحە قەڵەو - ئەندازیار، حاکم عومەر - بەعسی بوو، سەڵاحی سەموون - فەرمانبەر و ڕەفیق حیزبیی ڕژێمی بەعس و بەڕێوەبەری کارگەی جگەرەی سلێمانی بوو، عەلە خڕە - پارتی، شێخ وەزیر نەکوژرا، بەڵام بریندار بوو، مچەی بابە گەورە و چەندین چالاکیی تری نێو شار) بە دەستی وریا ئەنجام درا.
لەگەڵ ئەوەشدا گۆرانە ڕەش و ئازاد چاوشین بە هەمان شێوە ئیختیالاتیان دەکرد، تەنانەت ئازاد چاوشین هێندە کادر و تێکۆشەرێکی بێهاوتای قارەمان بوو، ئەگەرچی خەڵکی سلێمانی بوو و شارەزای بنکە و بارەگا و مۆڵگای بەعس نەبوو لەنێو شاری هەولێردا و شارەزای کووچە و کۆڵانەکانی شاری هەولێر نەبوو، بەڵام ئازایەتی و قارەمانێتیی ئازاد چاوشین دەگەڕێتەوە بۆ دڵسۆزی و لەخۆبردوویی، دەنا تاوانبارێکی بەعس لەنێو شاری هەولێردا بە سزای گەل و شۆڕش بگەیەنێت هەر وا ئاسان نییە، بەتایبەت خەڵکی ئەو شارە و لەدایکبووی ئەو شارە نەبیت. بە هاوکاریی ڕێکخستنە دێرینە نهێنییەکان کارەکەی ئەنجام دابوو، ئەو قارەمانێتییە تەنها لە ئازاد چاوشین دەوەشایەوە، بەتایبەت کاری لەو جۆرە زۆر ترسناکە. پاش دەنگدانەوەیەکی زۆر و ترسی حیزبەکان، بەتایبەت ئەو حیزبانەی ئەندامەکانی دەکوژران، بەیانی فەرمییان بڵاو دەکردەوە و یەکێتییان بەو مەبەستە تاوانبار دەکرد و حیزبی بەعسیش بۆ تێکدانی زیاتری بارودۆخەکە، پاگەندەی خۆی دەکرد و یەکێتییش تاوانی تیرۆرکردنەکانی خستە ئەستۆی حیزبی بەعس و بەم جۆرەش ڕەزاقی وەستا وەهاب ناسراو بە وریا ڕەش ناڕازی دەبێت و شەرم لە وەڵامدانەوەی بەرپرسی ناوەندی کۆمەڵە دەکات کە بە نامەی فەرمی داوای کوشتن و لەسێدارەدانی ئەو کەسانەی لێ کردوون، دواتر کاراکتەری چالاکییەکان بە بەعسی ناو ببرێت.


#شەهاب کەریم#
#مێژوویەک لە لوولەی تفەنگەوە؛ ڕۆژگارە سەختەکانی شاخ 1979-1991# [1]