خانا زەمانە کارش دوو ڕەنگەن
گا مایل بەنۆش گا مایل جەنگەن
نە نۆشش دەوام نە تاسەر جەفا
نە جەنگش دایم نەتا سەر سەفا
گا کەسێ مەنیو تەخت شاهی
وەکەسێ مەدۆ شۆربەی گەداهی
شازادەی چینی هەوای وەتەن کەرد
والیدە و پێدەر بەخاتر ئاوەرد
هۆرێزا وە پا بەدیدەی پڕ غەم
تەشریف بەرد بەلای خورشید عاڵەم
وات ئەی نازەنین بەیزای شەوق من
خاک تۆ ئەفسەر تاج فەرق من
ئیستدعام ئێدەن بەسەرئەفرازی
بە لوتف و ئەشعار بەندەنەوازی
بە ئەلتاف وێت شای حۆری لەقا
مەرەخەس کەری ئەی عەبد دەرگا
دیدەشان نەڕان والیدە و پێدەر
ئارەزوومەندن زام دڵ خەتەر
شەمیم چینم یاوان بە دەماغ
جەم بییەن نەدڵ دوود و دەرد و داغ
وەسواسەی پێدەر، خەیاڵ مادەر
ئاهیرش وستەن نەیانەی جگەر
حەکاکان واتەن پیران کامڵ
خاشاک وەتەن خاستەرەن نەگوڵ
ئەڵبەت من وەتەن شیام ئارەزوون
خارش جەلای من وێنەی موشک بوون
بشووم بەوەتەن بوینووم خاسە
تا نەسۆچۆ دڵ بەسۆز تاسە
وەی تەور دەروونم پڕسۆز و دەردەن
ئارەزووی دیدار پێدەرم کەردەن
ئومێدم ئێدەن نازار دوڵبەر
بدەری ڕوخسەت ئەی بەندەی کەمتەر
وارێد بووم بەزێد وە بێ دەردیسەر
بزانووم چۆنەن والیدە و پێدەر
یە خەیلێ وەختەن وێنەی گومڕاهان
شێویان لێشان قانوون شاهان
نە هیجران من کەفتەن وە بێ گیان
ئێنتزارمەن بەدیدە و بەگیان
هەرچەند بنیشوو جەلای تۆ فێشتەر
بەڵێ عومر من مەبۆ زیاتەر
خورشید کە زانا عەزمش زەروورەن
سێ ساڵەن نە موڵک مەملەکەت دوورەن
جەواب دا بەسۆز وات بەرگوزیدەم
خودا هامڕات بۆ ئەی نوور دیدەم
فیدای گیانت بام ئەی شێر سەروەر
عەزم لواتەن خودات بۆ یاوەر
بەڵێ مەرگ تۆ شای واڵا نەسەب
ڕۆی ڕەوشەن جە لام مەبۆ وێنەی شەب
شازادە شنەفت کەلام شیرین
دیدە نەمناک کەرد پڕ بی نە ئەسرین
واتش فیدات بام شۆخ دیدە مەست
من ئێختیارم نەمەندەن وە دەست
وەرنە عاشقان هەرتاکە مەردەن
کێ بۆ بێ شەرتی چەنی دۆست کەردەن
من یە شەرتم بۆ شای شیرین جەمین
وەختێ کە یاوام بە چین و ماچین
حەرام بۆ جە من خورد و خاو و نۆش
بە ئاواز سۆز سازان نەدەم گۆش
شای نۆش ئافەرین وەنەم حەرام بۆ
تاکە من نەبووم بەخاک پای تۆ
چونکە جەی وەرتەر من عەهدم کەردەن
پەی نۆش ئافەرین سەوگەندم وەردەن
خورشید وات ئەی ڕاز کەم بواچە وەس
ئەی حەرفە جەرگم کەردەن وەقەقنەس
بەڵێ من سەرگەرد ڕێزەی ڕازت بام
بە دیدەو بەرۆح پایەندازت بام
فەردا تەدارەک ئەساسەی سەفەر
مەسازووم پەرێت خودات بۆ یاوەر
ڕازی و ناڕازی شێر دڵاوەر
قەبووڵ کەرد ڕازان شیرین دوڵبەر
ئاماوە جەلای ناز تەرسای فەرەنگ
تەشریف بەرد بەلای یاران هەمڕەنگ
خاتوونە خانم پەریزادە ڕەند
ماه زەڕئەفشان شۆخ دڵپەسەند
خان محەمەد چەنی حەمید چالاک
گرتە بین ئارام چون شێر بێ باک
سۆب سەحەر خورشید بێدار بی نەخواب
مەلوول بی چون خەم مەلوولیی سلاب
بە ئیشارەی چەم دڵ نەبی ڕازی
کەفت نەخەیاڵات تەدارەک سازی
فەرما وەزیران مونس هامڕەنگ
ئەکابرزادان ناحیەی فەرەنگ
پەرێ کارسازی تەڵەب کەردشان
هەزینەی سەفەر گشت ئاوەردشان
هەفت هەزار غوڵام قەشەنگ سادە
گشت ئەگریجە سەیف فەرەنگی زادە
پەنج هەزار کەنیز، توحفەی دڵاوێز
باڵا شۆخ شەنگ کەلام شەکەررێز
* دە هەزار سەوار، سەمەند گوڵ گوڵ
کول زین زبەرجەد دانەی مەداخڵ
یەک یەک بە کەماڵ وێش کەردش پەسەند
پەی نازەنینان غوڵامان ڕەند
دە هەزار زیبا بە قیمەت سەنگی
قوماش خۆش ڕەنگ ڕشتەی فەرەنگی
دوو سەد ئوشتور بار دانە و جەواهیر
بارشان گەوهەر چون شۆڵەی ئاهیر
سێسەد شوتور بار یاقووت و مەرجان
تاج مەرسەعی لایەق وە شاهان
هەشت سەد شوتور بار جە نوقڵ و نەبات
چەند قەبای زەڕباف بەرەسم خەڵات
دوو هەزار قاتر ناقەی جامازە
زین زەڕئەندوود حاشیە تازە
سێ هەزار قاتر، قاتر بارکەش
سەرپاڵان مەغمەر پەرێ سەرمەفرەش
سێ هەزار دانە سکەی خوش ڕەوا
پەرێ لەوازم شەو شەوچرای ڕا
دروست کەرد تەمام یەکسەر ئامادە
کیاست وە پێشکەش پەرێ شازادە
ئەسپان تازی پاو دمای سیا
کیاست پەرێشان پەی خوشنوودی شا
چل ئەسپان تەمام مەخرەود خارا
کڵاو ئاڵتوون دۆزکار بوخارا
لە جام مەرسەع ڕیکاب زەڕینگار
کیاستش پەڕێ شازادەی سالار
باز هەم بەتەقریب عوزر ئاوەردەوە
ڕەویەی موحیبەت تازە کەردەوە
شازادە بەشەوق خاتر گوشادی
کەردش نە دوڵبەر خانە ئابادی
جەو دما یاران گشت بە خاترجەم
شین بەلای شیرین خورشید عاڵەم
عەرز کەردن شیرین شاهیت پایەدار
نمەک حەڵاڵ کەر خودانیگەهدار
خورشید ئێد شنەفت دڵ ئاوەرد بە تەنگ
ڕێزنا ئەسرین مرواری بەسەنگ
وات خودای عاڵەم پشت و پەناتان
دەست یەدوڵا مەدەدکارتان
#خانای قوبادی# [1]