ئەبێ بەخشندە مل کەچ کا، لە ڕاستی مووچەخۆری خۆی
سوراحی سەر فروودێنێ لە بۆ پیاڵە کە تێکا بۆی
کە ئاو داری لەسەر سەر ڕاگرتووە ئەیزانی چی تیایە
لە لای نەنگە کە پەروەردەی نقوم کا گەورەیی وایە
لقی شۆڕی درەخت میوەی ئەخۆن بێ ئەرکی بەرد و دار
پەڵی بەرد بۆ پەلی بەرزە، لەقەش بۆ سەر پەلی بەردار
لە دەوری دووریا پەستم دەروون پڕ دەرد و زووخاوم
ئەجەل دێ بمکوژێ، نامناسێ چی بکەم نامرم ماوم!!
لەبەر ئاشووبی خێڵم، هیچ شەوێ خەو نایەتە چاوم
خەوی ناخۆش ئەبینم بەم پەرێشان خاوییە خاوم
ئومێدی سەر لەسەر دەرکەن، ئەوانەی ڕاست و ڕووناکن
قەڵەم هەر سەرقەڵەم، مۆم بۆ مقەست، هەر بۆ ئەویش چاکن
ئەڵێن مورغی سلێمان ئاو لە ژێر خاکا ئەبینێ ئەو
منیش حەوت ساڵەڕێ دوور بێ، بە چاوی دڵ ئەبینم ئەو
چرا ڕووناکی بۆ ژێر خۆی نییە ڕەحمەت لە بابی با
ئەوی ڕووناکی کەچبینانە گۆڕە، ڕەنجی با بیبا
بە جووت پەروانە و ماسی کە دڵدادەی چرا و گۆلن
نزیکی ئەم ئەسووتێنێ، لە دووری ئاو ئەوان حۆلن [1]
#دیوانی پیرەمێردی نەمر#
#پیرەمێرد#