جیاواز لەو سەردانەی پێشووی شاندی هەرێم کە هیچ وەزیرێکی یەکێتی تێدا نەبوو، وا بڕیارە لەم هەفتەیەدا شاندێکی باڵا لە حکومەتی هەرێم سەردانی #بەغدا# بکەن و لەگەڵ بەرپرسانی بەغدا و چەند وەزیرێکی پەیوەندیدار بە کێشەکانی نێوان #هەولێر# و بەغدا کۆببنەوە.
بەرپرسێکی حکومەتی هەرێمیش ئەم سەردانەی شاندی هەرێم بە یەکلاکەرەوە وەسف دەکات، چونکە حکومەتی ئێڕاق پەلەیەتی لە ناردنی پڕۆژە یاسای بودجەی گشتی بۆ پەڕڵەمان.
حکومەتی هەرێم و حکومەتی ئێڕاق ئامادەکاری تەواویان کردووە بۆ سەردانی کردنی شاندێکی باڵا لە هەرێمەوە بۆ بەغدا. بۆ ئەوەی کۆتا دانیشتن لەبارەی پڕۆژە یاسای بودجەی گشتی ئێڕاق و پشکی هەرێم لەو پڕۆژە یاسایە، هەروەها بابەتی فرۆشتنی نەوتی هەرێم و پابەند بوونی هەرێم بەهەر ڕێککەوتنێک کە لەسەر ئەو بابەتە دێتە ئاراوە. لەگەڵ بابەتی ناردنی 400 ملیار دینارەکە کە حکومەتی ئێڕاق ڕەزامەندی لەسەر داوە و وەزیری دارایی ئامادە نییە ئەو بڕە پارەیە ڕەوانەی هەرێم بکات.
شاندەکەی هەرێم بە سەرۆکایەتی (ئاوات شێخ جەناب) وەزیری دارایی ئابووری لە #بزووتنەوەی گۆڕان# و ئەندامێتی هەریەکە لە وەزیری سامانە سرووشتیەکان و سەرۆکی دیوانی ئەنجومەنی وەزیران و وتەبێژی حکومەت و سەرۆکی فەرمانگەی هەماهەنگی و بەدواداچوون لە #پارتی دیموکراتی کوردستان# و وەزیری پلاندانان و سکرتێری ئەنجومەنی وەزیران لە #یەکێتیی نیشتمانیی کوردستان# دەبێت.
هاوکات شاندەکەی هەرێم لەگەڵ وەزیرانی دارایی و نەوت و پلاندانان و چەند بەرپرسێکی دیکەی ئێڕاقی کۆدەبنەوە.
سەردانی ئەمجارەی شاندی هەرێم بۆ بەغدا بەسەردانێکی یەکلاکەرەوە دادەنرێت، چونکە حکومەتی ئێڕاقی پەلەیەتی لە ئامادەکردنی پڕۆژە یاسای بودجەی گشتی بۆ ساڵی 2023 و چارەسەرکردنی کێشە هەڵپەسادراوەکانی نێوان هەولێر و بەغدا بۆیە بەغدا نایەوێت لەوە زیاتر کات بە فیڕۆ بدات و ئەگەر حکومەتی هەرێم ئامادەی ڕێککەوتن و پاشان پابەند بوون بێت بەو ڕێککەوتنەوە ئەوا حکومەتی ئێڕاقیش ئامادەیە ماف و شایستە داراییەکانی هەرێم بنێرێت. [1]