د. نەسرەدین ئیبراهیم گولی
(هەکە بێژنە ئێکى دێ دەستەک یان تلەکا تە بڕین و پێشڤە (20) ملیۆن دۆلاران وەرگرى دێ وەکەت؟ پا چاوا خۆبەخش و پێشمەرگە؟!)
مە گەلەک جاران گوه ل گازندەکێ دبیت کە ناڤەرۆکا وێ ئەوە هەکەر هندەک کەسان شۆلەک کربیت، بۆچى وى چ تشتەک نەوەرگرتیە، ئەڤ چەندە و گازندەیە کەسانەک فێرى پەروەردەکێ کرن بەردەوام کەربوکینەک ڤەشارتى یان ئاشکرا ژ هەر تشتەکى و کەس و لایەن و سیاسەت و حوکمەتا هەرێمێ و هەمى پێکهاتەیێن ڤێ کوردستانێ هلگرن و گەلەک ش وان برنە ناڤ ڕێزێن وان گرۆپ و لایەنێن تیرۆرستى یێن وەکى ئەنسارولئیسلام و ئەلقاعیدە و داعش و …هتد، هەبین ل وەلاتێن وەکى ئەفغانستان و کۆسۆڤۆ یان ل چیچان و جهێن دیتر ژناڤچۆن و کەسێ نزانى ب چ سەر چوون. ئێکى ڤەدگێڕا جارەکێ وى گوه ل دەیکەکێ بى دگۆتە کۆڕێ خوە:” بابێ تە چەند سالان پێشمەرگاتى کر چ بۆ نەهات کرن. هەڕە بۆ خۆدێ بکە و وەکى بابێ خوە نەبە”، پاشى بەرێ کۆڕى کەتە ل گەل ڕێکخراوەکا تیرۆرستى و کارێ وى بیە مرۆڤێن بێ تاوان کۆشتن. بەلکو وى مرۆڤ ژى سەرژیکربن و یان وەکى داعشان ژى مالا گەلەک کەسان وێران کربیت. ئەرێ ئەڤەیە یا دەیکێ دگۆتى وى “بۆ خۆدێ”؟ بلا ئەڤ جۆرە هزرکرنە ب سەر مێنتالیتەیا مرۆڤێ کوردستانێ زال نەبیت. ڕاستە مافێ هەر کارەکیە بهایێ خوە وەرگریت، بەلێ پا هندەک جاران پەروەردکرن ل سەر کەربوکینە و نەڤیان و ڕکمانەیێ ناهێلیت ئه و کەس ب شێوەکێ لۆژیکانە و دروست هزر بکەت. بابێ وى کەسێ ئەم بەحسێ وى ژ ڤێ پاداشتێ نەهاتبیە زڕبەهرکرن، بەلێ دەیکا وى و هندەکان نەدهێلا ئه و وێ پاداشتێ، هەر چەندە یا کێم ژى بیت، ببینیت. وان ماسکەک کربیە بەر چاڤێن وى و وى ب وێ بەرچاڤکێ تشتێ جوان ژى کرێت ددیت. ئەڤ مرۆڤە نموونەى سەدان و هزاران کەسانە ل کوردستانا مە. ئه و ژ بەر ڤێ کەربێ دشێن ببنە دوژمن و ئاگرى بەردنە کوردستانێ. سەدان کەسێن ناڤ داعشێ ژ ڤان توخمە مرۆڤان بوون. باشە کیژ (ئەقلێ) دروست دێ باوەر کەت هەکە ئێک بێژیت چ تشتێ باش و جوان ل ڤێ کوردستانێ نەهاتیە کرن و نینە؟ یێ ئەڤە د هزر و مێنتالیتەیێ وى بیت بەس ئه و مرۆڤە یێ شێت بیت و چ د مەژیێ وى دا نەبیت. هەر چەندە نینە ل ڤێ کوردستانێ کەسەک تێرا خوە نەبیت و وەرنەگرتبیت، بەلێ پا ناهێتە ڤەشارتن کێماسى ژى دێ هەبن. هەمى مرۆڤێن ڤى وەلاتێ نازدار مفایێ ژێ وەرگرتى، کێم و زێدە، بەلێ پا هەکە هندەکان زێدەتر هەبیت یانژى کەسانەکێ گەندەلێ کربیت، ناهێتە ڤەشارتن، بەس پا ئەڤە ڕامانا هندێ نینە ئەز و تو ڕابین سەر وى کەسى ڤێ کوردستانێ و هەمى مرۆڤێن وێ بێخینە بن چەنگێن داگیرکەران، وەلا چیە گەندەلیا هەى و من و بابێ من چ بۆ نەهاتیەکرن. دبیت ئه و ڕۆژ بڕێڤە بیت، بەلکو ژى چ جاران نەهێت. هزاران پێشمەرگە و خۆبەخش و مرۆڤان بۆ ڤى وەلاتى زەحمەت کێشان و چوون و یان شەهیدبوون و دەمێ خزمەت دکر ل هیڤیا هندێ نەبین و دزانى بەلکۆ چ جاران ژى چ تشت بۆ نەهێتەکرن بەلێ پا بەردەوام بى. بەلگە ژى شەهیدبوونا وى یە. باشە هەکە بێژنە ئێکى دێ دەستەک یان تلەکا تە بڕین و پێشڤە (20) ملیۆن دۆلاران وەرگرى دێ وەکەت؟ مەرج نینە هەر کارەکێ کەسەک بکەت پێشڤە تشتەک بەربکەڤیت. خوە ڕاهینان ل سەر کەربوکینەیێ ژ کەس و لایەن و وەلات و نیشتمان و ئاخ و ئالا و کوردستانێ ل سەر تشتێ هۆسا و فرۆتنا وەلاتى مەزنترین گونەهە و ئەڤ پەروەردەکرنا زارۆیێن خوە گورزەکێ کۆژەکە ل پێکهاتەیا کەساتیا وان و وان نەچارى هندێ دکەت د ژیانا خوە دا هەمى دەمەکى ڕەشبین و شکەستى بن و تام و چێژێ ژ ژیانێ و پەیوەندیێن خوە ل گەل خەلکێ وەرنەگریت. ئەڤ کەسە بۆ تووشبوون ب نەساخیێن دەروونى (سایکۆلۆژیک) و جڤاکى ب سانەهیتر بن و د خوەل بەر نەخۆشیان گرتنێ لاواز بن و ب سانەهى تووشى تێکچوونێن مەژى ببن، سیستەمێ دەمارى و بایۆکێمیاوى، یێ کۆ ڕەفتار و کریارێن وان ڕێکدئێخیتن وەکى پێدڤى و دروست کار نەکەت. کى بەرپرسیارە؟ باشە بۆچى ئەم نەشێین وەکى کەسانەکێ هزر بکەین کە جۆن ف. کێنێدى (1917-1963) سى و پێنجەمین سەرۆک کۆمارێ وەلاتێن ئێکگرتیا ئەمریکا، ئێکە ژ وان نموونەیان، یێ کو د ئێک ژ جوانترین گۆتنێن خوە ل دۆر بهایێ بەرپرسیارەتیێ ل نک مرۆڤان دبێژیت:”پرسیار نەکەن کا وەلاتێ من بۆ من چ کریە، پرسیار بکەن و بێژن کا من بۆ وەلاتێ خوە چکرییە؟” باشە ما ژ ڤێ جوانتر هەیە؟ ئەڤە گۆپیتکا ڕەوشتییە. ناڤبرى مەسیحى یە و بەلکو ژى ئایین و ئاییندارى ل نک وى و د پلە و پایە و پۆستێ وى یێ جڤاکى و سیاسى دا چ ڕامانەک ژى نەبیت. بۆچى ل کوردستانێ ژى هەنە بەرۆڤاژى وى هزر دکەن و وەسا دبینن چونکى بۆ “بابێ” وى چ نەهاتیەکرن، بلا کوردستان ژناڤ بچیتن. کى ل بن گوهێن وان کەسان دخوینیت و پف دکەتە بن گوهێن وى؟ ئەرێ ئەڤە ڕاستە کەسەک وەسا هزر بکەت هەکە ئەز نەبم و چ بۆ من نینە بلا بۆ کەسێ نەبیت؟ ل دەمەکى وەسا نینە. گوه و چاڤێن ب نەڤیان و کەربوکینێ هاتیە تژیکرن هەمى جۆرێن هزر و ڕەفتارێن شاش دکەن، هەتاکو ژ ناڤبرنا کوردستانێ و جیهانێ ژى بیت. تیرۆرستەکێ داعشى دیارترین ئه و نموونەیە.
*بسپۆرێ زانستێن پێداگۆگى و پەروەردەیى/فاکۆلتییا پەروەردە/زانینگەها زاخۆ.[1]
Αυτό το στοιχείο έχει γραφτεί σε (کرمانجی) γλώσσα, κάντε κλικ στο εικονίδιο
για να ανοίξετε το στοιχείο στην αρχική γλώσσα!
ئەڤ بابەت ب زمانا (کرمانجی) هاتیە نڤیساندن، کلیک ل ئایکۆنا
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
Αυτό το στοιχείο έχει προβληθεί φορές 903
Γράψτε το σχόλιό σας για αυτό το προϊόν!