بنەچەو بەگزاڎەکا هۆرامانی
بەشۊ حۆتەمی
عەباسقولی سان:
عەباسقولی سان، کوڕو بارام میرزا بەگی، ئەڎاش کناچۍ (ئەڵاوێردیخانو لوڕ) ین، دمای کوشتەی تاتەیش و سڵېمان بەگی برایش و قۆمە نزیکەکاش، بەردەنشا پەی یانەو بابایش (تاتەو ئەڎێش) جە لوڕستان، چاگە گۆرە بېیەن و یاوان پەنە، خوڼەواریێ خاسش بییەن، شارەزاو تەفسیرو قورئانی و فەرمایېشتەکا پېخامئاوەرو ئیسلامی بییەن، زوانی فارسی و عەرەبیش بە خاسی زانێنۍ، کەسێ ئازاو چەنەئاما بییەن، جەنگو مېیانو (دەوڵەتی عوسمانی و سەفەویەکانە) چەنی لالۊیش (شاوێردی خانی دوەم) شانبەشانو سەفەویەکا زدو عوسمانیەکا جەنگان، ئازایێ فرەش ئەرمانان، کۆتەن وەرچەمو (شا ئیسماعیلی سەفەوی) ، وەختێ هەواڵش مەپەرسۊن کە بنەچەش کېن، باسشا جە کوشتارو تاتەیش و براو قۆمە نزیکەکاش پەی شا ئیسماعیلی کەردەن، شا ئیسماعیلی سەفەوی گەرەکش بېیەن خەلاتو (عەباس قولی بەگ) ی کەرۊن، ئاڎ داواش وەنەمەکەرۊن خەڵاتو حوکومڕانی هۆرامانیش پەنەبەخشۊن، ئاڎییچ ڕازیبېیەیش نیشانەدانو فەرمانش پەی بەرکەردەن، ئیتر پېسە حاکمو هۆرامانی گېڵانۆ پەی یاگۍ باوانو وېش، بە یاوایۆش بە هۆرامانی، خەڵکو ناوچەکەی لوێنۍ پېوایشۆ و خێرئامایێ گەرمشان کەردەن.
عەباس قولی سان، ماوەو حوکمداریشەنە تەقەیۊرێ فرەش ئاردەن ملو ژیوای خەڵکو ناوچەکەیرە، پەوکەی نامبانگێ فرەش پەی وېش وەشکەردەن، تەنیا کەسێ بېیەن دلۍ بەگزاڎەکا و سانەکا هۆرامانینە دلۍ (کتېبو تارېخوو سەردەمو سەفەویەکانە) نامېش تۊمارە کریێبۊ، جە وەختێنە تارېخ-نویسە ئەردەڵانییەکۍ نامی هیچ حوکمڕانیێ کوردەسانی و سانەکا هۆرامانیشان ناردېنە، مەگەر چا وەختانە کە لەشکەرکېشیشا کەردېبا سەر.
عەباسقولی سان سەردەمو حوکمڕانی (شا عەباسی دوەم) ینە ساڵەو (1075ک/ 1664ز) کوچی دمایینش کەردەن، یەرۍ کوڕېش شۊنیرە جیامەنېنۍ کە ئینۍ نامەکېشانۍ: (بارام بەگ، محەمەد بەگ، سڵێمان بەگ) ، دمای کۊچی دمایینیش بارام بەگی کوڕش بېیەن بە سانو هۆرامانی.[1]
Αυτό το στοιχείο έχει γραφτεί σε (هەورامی) γλώσσα, κάντε κλικ στο εικονίδιο
![](https://www.kurdipedia.org/images/flags/ku.png)
για να ανοίξετε το στοιχείο στην αρχική γλώσσα!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
![](https://www.kurdipedia.org/images/flags/ku.png)
ی کلیک کەرە!
Αυτό το στοιχείο έχει προβληθεί φορές 630
Γράψτε το σχόλιό σας για αυτό το προϊόν!