سینەما سیروان لە هەولێر و چەند یادگارییەک
#کامەران وریا قانع#
2012-09-15
لەم هەفتەیە لەبەر هەندێک کار سەردانى هەولێرم کرد، بەیانییەکى زوو لە سلێمانییەوە بەرەو هەولێر بەرێکەوتم بەهیواى ئەوەى کارەکانم زوو تەواو کەم لەبەڕێوەبەرایەتى گشتى پەروەردەى هەولێر.
بەیانى زوو پێش کردنەوەى فەرمانگەکان بەڕووى هاووڵاتییان من گەیشتەمە ئەوێ هێشتا شەقامەکان چۆل بوون لەئۆتۆمبێل، من نزیکەى 45 خولەک کاتم هەبوو کەسەربەست بم، لەبەر ئەوە بڕیارمدا بچم نانى بەیانى بخۆم لەکۆڵانى سینەما سیروان، دوورى نێوان بەڕێوەبەرایەتى پەروەدەرى گشتى و سینەما سیروان نزیکەى 5 خولەکێکە بەپیاسە کردن.
کەچومە ئەو کۆڵانەى سینەما سیروانى (خەیاڵ منى بردەوە بۆ سەرەتا و ناوەڕاستى هەشتاکانى سەدەى ڕابردوو، تەمەنى هەرزەکاریم کە زۆر کاتم لەم کۆڵانە بەسەر بردوه، یەکسەر ئەو ڕۆژانەم بیر ئەکەوتەوە کە لە قوتابخانە لەگەڵ هاورێکانم دواى تەواو بوون یان زۆرجار لەکاتى دەوامى فەرمى ڕامان ئەکرد و خۆمان ئەگەیاندە ئەو کۆڵانە.
ئەو کاتە هەموو خۆشیمان ئەوە بوو بچینە سینەما، کەچوومە ناوەڕاستى کۆڵانەکە، دووبارە خەیاڵ منى بردەوە بۆ ئەو ڕۆژگارانەى کە ئەم کۆڵانە هەر بەبۆنى (لەفەى گەس، شاورمەى گۆشت) ڕێبوارانى مەست ئەکرد، کۆڵانێک تەسک و کوورت، بەڵام پڕ بوو لەژیان، لەو کۆڵانەدا چەندین دوکانى گەسی لێبوو یەک لەیەک قەرەبالغتر ئەو کات زۆر (عەجیب) بوو لەلام کە ئەو هەموو کەسە لە کوێوە ئەهاتنە ئەو کۆڵانه، لەبیرمە چەند دوکانێکى تر هەبوو، وەکوو دوکانى (ڤیدیۆ و کاسێتى بە کرێ ئەدا) چایخانەیەک و گەراجێکى لێ بوو یارى بلیارد و تێنس و دوو گۆڵى دەستى تیا ئەکرا، هەروەها دوکانێکى لێ بوو لەفەى گۆشتى ڕۆست و مریشک و جگەر فروش.
ئەو ڕۆژگارانە هەرزەکار بووین، تاقە ڕێگەیەک کە بە دنیاى دەرەوەى ئەیبەستینەوە ئەو سینەمایانە بوون، هەر لەفیلمەکانییەوە تاکوو ئەو پۆستەرە گەورانەى فیلمەکان کەزۆرترینیان کچێکى نمیچە ڕووت یان کچێک لەباوەشى کوڕێک بوو.
بۆ من چوونە ناو سینەما وەکوو ئەوە وابوو دوو دەستى نادیار بێن و دوورم خەنەوە لەسەر زەوى، بمبەن بۆ کیشوەرێکى دوور، لەناو سینەمادا هەموو شتێکت دەربارەى کۆمەڵگە و دەوربەر لەبیر ئەچوەوە، چەند خولەکێک ئەبوویت بەبوونەوەرێکى تر.
لە بیرمە چەندین جار لەبەر ئەو پەنجەرە بچووکەى پێش سینەما کە بلیتى لێ ئەفرۆشرا، ڕیزم ئەگرت یان بەهۆى قەرەبالغى لەدوورەوە تەماشاى ئەو گەنجانەم ئەکرد کە زۆر زەحمەت بوو بزانیت کام سەرە هی کام جەستەیە ئەوەندە تێکەڵ یەک بوو بوون، بەتایبەتى لەرۆژانى چەژن، هەتاکوو لەو ڕۆژگارانەش کەسانێک کاسبیان بەبلیتى سینما ئەکرد و ئەچوون بەکۆمەڵ ئەیانکڕى و دواتر بەگرانتر بەخەڵکیان ئەفرۆشتەوە کەتاقەتى ئەو قەرەبالغیان نەبوو.
من ئەو کابرایەى کەبلیتەکانى لەخەڵک وەرئەگرت و ئەیهێشت بچنە ژوورەوە بەگرنگترین پیاوى سەر زەویم ئەزانى چونکە بەدەست ئەو بوو بچیتە ناو هۆڵى سینەماکە و کیشوەرێکى تر.
زۆر جار کەئەچویتە ناو هۆڵى سینەما لەبەر قەرەبالغی جێگا نەدەما و هۆڵەکەش تاریک ئەبوو لەبەر ئەوە کەسێک بەخۆیی و لایتێکى دەستى هاوارى ئەکرد وەرە ئێرە برا! هەندێکجار لایتەکەى لەناو چاوت ئەدا، زۆر جار دەبوایە لەسەر پلیکانەى نێوان هەردوو لاى کورسییەکان دابنیشت بەتایبەتە لەفیلمە هیندیەکان یان ئەو فیلمە ئەمریکییانەى کە زۆربەیان ئەکشن بوون، یان ئەو کاتانەى کەدرەنگ ئەچوویت بلیت بکریت و لەکاتى کرینى بلیتەکە گوێت لەزەنگى دەست پێکردنى فیلمەکە ئەبوو (خۆشترین زەنگ بوو لە ژیانم کەگوێبیستى بم بەتایبەتى کاتێک زوو ئەچویتە هۆڵەکە و لەچاوەروانى ئەبوییت بەبیستنى لێدانى زەنگى دەست پێکردن خۆت ئامادە ئەکرد بۆ سەفەرێک لەگەڵ فیلمەکە بکەیت) . خۆشى ئەو دۆخە ئەوە بوو لەکاتى نمایش کردنى لەقتەیەکى شەردا دەبوە فیکە لێدان و چەپڵە ڕێزان، بەڵام لەکاتى لەقتەیەکى ڕۆمانسى یان ماچ ئەو هۆڵە کز و بێ دەنگ ئەبوو لەپڕ یەکێک بەدەنگى بەرز کۆمنتێکى بازاڕیی ئەداو دواتر بەدواى ئەو هاوار و فیکە دەستى پێ ئەکردەوە، هەروەها ناوبڕى نێوان فیلمەکەش باش بوو بۆ خواردنى شتێک یان خواردنەوەى ساردەمەنیەک.
من خۆم یەکەم فیلم کە لە سینەما سیروان بینیم ئەگەر خەیاڵم خیانەتم لێ نەکات فیلمى (عومەر موختار بوو) لەبیرمە زۆرزۆر قەرەبالغ بوو، یەکێک لەسیفەتەکانى ئەو کاتى سینەما ئەوە بوو کە زۆر جار فیلمەکە زۆر کوورت کرا بوەوە چونکە لێیان ئەپچڕى یان سانسۆرى ئەخرایە سەر، لەبەر ئەوە زۆرجار لەناوەڕاستى فیلمەکە لەقتەیەکى ڕوتى فیلمیکى تریان پیشان ئەدا، خۆش ئەوە بوو دواى ئەو لەقەتە ڕووتە خەڵکێکى زۆر ئەهاتنە دەرەوەى هۆڵەکە چونکە پێشتر ئەو فیلمەیان دی بوو!.
هەروەها دۆخی ناخۆشى ئەو کاتە ئەوە بوو زۆر جار لەکاتى تەواو بوونى فیلمەکان و چۆڵکردنى هۆڵەکە، لەپێش دەرگاى سینەماکان مەفرەزەکانى سوپاى گەل (جەیش شەعبی) سەیتەرەیان دائەناو داواى ناسنامەیان لەخەڵک ئەکرد و زۆر گەنجیان ئەگرت.
لە کۆتایی ئەم بیرەوەرییە کاتێک هاتمەوە سەر خۆم چوومە ئەو چایخانەى ئێستاش ماوە، نانى بەیانیم و چایەکەم خواردەوە، کابرایەکى بەتەمەن بەرانبەرم دانیشت بوو، لێم پرسى (ئەخبارى) سینەما سیروان چییە ؟
وەڵامێکى سەیر و جوانى دامەوە بەشێوەی هەولێریەکى ساف و بێگەرد وتى: مامۆستا ژیانى خەڵک بەخۆیی بویتە سینەما، ئیتر سینەمامان لۆچییە!
دواتر درێژەى بەقسەکردن داو وتى: ئەوە نزیکەى دوو سارە سینەما قەپاتکرایە، بڕیارە تێکى بدەن و بیکەن بەپارک!
منیش لێرەوە ئەلێم خۆزگە پارێزگاى هەولێر نەدەهێشت ئەو کۆلان و سینەمایە و گازینۆى لەیالى تێک بچێت، چونکە کەم کەس هەیە لەنەوەى پەنجاکان و شەستەکان و هەفتاکان ڕۆژێک لەرۆژان نەچوبێتە ئەو سینەمایە یان لەفەیەکى گەسی لەوێ نەخواردبێ.[1]