بەشێ چا نامۍ هەکە (کامیل بەدرخان) ی پەی (ئەفسەر شاردی لی) کېیاستە:

فرە زەحمەتەن چن دېڕێنە بار و زروفو کوردەسانی دلۍ تورکیاینە و پېوەڼی مېیانو کوردی و ئەرمەنی نیشانە بڎەو، فرە قومیۍ و فاکتۍ هەنۍ کە مەشۊم وەرچەم بگېریتان، چوونکم کاریگەریێ فرەشان کەردەن سەرو باری ڕامیاری و ستراتیژی.
بنەماڵەو بەدرخانیەکا جە سەدەو (13) یۆ، گېرە تاکو ئامای ئوسمانیەکا پەی ناوچەکەی، دەسەڵآتدارۍ کوردەسانی بیېنۍ، یۊ چا میرا بە نامۍ (نەسرەدین) ، سکۍ وېشانېش بیېنە، عانەی هۊرکنیای زەڕ و زیوی وېش بېیەنش، تاکو ئامای سوڵتان عەبدولمەجیدی درېژەش کېشان، میروو ناوچەو بۊتانی چا سەردەمەنە خوڎا چەنە وەشبېیە تاتەی ڕەحمەتیم بېیەن (بەدرخانی عەزیزی) ، دلۍ کوردەکاو تورکیاینە، تەنانەت دلۍ کوردەکا ورمێ و سەلماسیچەنە دەسەڵاتش بېیەن، ساڵەو (1850ز) سوڵتان عەبدولمەجید چەنی وەرگېرتەی دەسەڵاتی، لەشکەرو ئاناتۆلی بە فەرمانداری وەزیر عوسمان پاشای و (15) هەزار سوپاو ئەستەنبووڵیش بە فەرمانداری عومەر پاشای کېیاستە سەرو کوردەسانی.
ئەچا جەنگەنە کە ساڵێ زیاتەرش خواینا، میروو بۊتانی بە دیل گېریاو کېیانیا پەی ئەستەنبووڵی، چاگە مەکیاناش پەی دوورگەو (کریت) ی، سوڵتان عەبدولمەجید بە شانازی ئا سەرکۆتەیە، مەدالیېوە بە نامۍ کوردستانی وەشکەرۊن.[1]