مەولەوی و ئەشقی ئەفلاتوونی
(مەولەوی و ئەشقی ئەفلاتوونی) بەرهەمېوی کاک کەیهان عەزیزیەن، جە (115) لاپەڕېنە ئاماڎە و چاپ کریان.
ئی بەرهەمە، ئەوەوانای و شیکاریێوی تازەن کە گەرەکشا بەپاو تیئوریە ناوازەکا، شېعرەکاو مامۊسا مەولەوی هورسەنگ کەرۊ.
دیارا بابەتوو ئەشقی ئەفلاتوونی، بابەتێوی تایبەتا کە جۊرێوتەر تەماشەو ئەشقی و وەشەسیایی کەرۊ و گەرەکشا ئی چەمکیە جە تەنگەلانوو تەماحێ جەستەیێ و لەزەتی گاناوی قوتار کەرۊ و دەرەتانێوی تازە و وەرفراوانتەرش پنە بەخشۊ.
چی ڕوانگەنە، ئەشق و وەشەویسی تایبەتمەڼیی بەشەریانە (ترازیا جە بابەتی ڕەگەزی) ش پەنە مڎریۊ و پاسنە شی کریۊوە کە وەشەویسی تەنیا جە گەرەک بېیەی نېر و مۍ پەی یۊترینی قەتیس مەبۊ، کریۊ ئی وەشەسیاییە بەینوو دوۍ پیایانە پېسەو دوۍ بەشەرا وەشبۊ و بنەمای ژیوابەخشە بە وېشەوە گېرۊ، ئی باسە توولانین و هەرپاسنە کە کاک کەیهان جە بەرهەمەکەشەنە ئیشارەش پنە کەردەن، جە کتېبوو مېمانی یان زیافەتیەنە بە وردی باس کریان.
کاک کەیهان چی بەرهەمەنە دەلاقێوی تازەش ڕوو بە بەرهەمە شېعریەکاو ئی فەرهەنگی کەردەنۆ و فرە ژیرانە گەرەکشا بەپاو تیۆریە جەهانیەکا شەن و کەو دەقەکا کەرۊ، ئینەیچ هەنگامېوی گەورۍ و تازېنە و یاگۍ دەس وەشیەنە.
دلۍ ئا بەرهەمانە کە تاکو ئیسە سەرو شېعرەکاو مەولەی پېسەو کتېبی چاپ کریێنۍ و دەسو من کەوتېنۍ ، یەرۍ بەرهەمۍ سەرنجەشا بەردەبېنۍ. ئاڎییچۍ:
لیریکای شاعێری گەورەی کورد، مەولەی بە قەڵەموو بەڕېز ئەنوەر قادر محەمەد.
میهرەجانی مەولەوی، سەرجەموو ئا وتارا کە جە کونگرێوەنە کە ساڵەو 1988 جە سلێمانی پەی مەولەوی گېریان.
شەریعەتی مەیل، بە قەڵەموو هومایۆن ساحیب، کە ساڵەو 2010 چاپ کریان.
بەڵام ئی بەرهەموو کاک کەیهانی بە میتود و بەپاو تیۆریێوی سەرنجەربەری تەری ئاماڎە کریان و دەرەتانێوی تازەتەرش پەنە بەخشېیان.
ئی بەرهەمە کریۊ بۊ بە بنەما پەی بەردەی ڕاوە پانلی و ئەرەنیشتەی تایبەتی تاکو بە وردی لایەنە جیاوازەکېش گنا وەروو سەرنجۍ.
بەڵام بە کورتی و بە ئەوەوانای من
یەکەم: دەس بەردەی پەی خودوو ئی هەرمانۍ، وېش هەنگامېوی تازۍ و گەورېنە، ئانە کە دلۍ دنیاو شېعرەکاو مەولەویەنە کەشفی تازە کریابۊو پېوەڼ دریابۊ بە بابەتېوی پېسەو ئەشقی ئەفلاتوونیەوە، کەردەیۆ دەرەتانی تازەی و فراوانی بەخشای بە شەپۊلانەو شېعرەکان.
دووهەم: ئی بەرهەمە پەنجەرېوە تازەش کەردەنۆ پەی باس و بابەتی ناوازەی و فرسەتش ڕەخسنان پەی شەن و کەو کەردەی تازەتەری.
یەرەم: ئی هەنگامېنۍ کە تاوا ئەدەبېیاتوو ئېمە بە جەهانی کەرا
چوارەم: وېستەیۆ ڕابېتەی پەی پېوەڼدای شېعرەکاو مەولەوی بە بابەتی ئەشقی ئەفلاتوونیەوە و کەشفوو ئی بنەمایا دلۍ شېعرەکانە، فرەو یاگەکانە ئەرېنی و هورکەوتەن.
پەنجەم: گەورەیی بەخشای بە کەسایەتی مەولەوی و فراوان کەردەی دەرەتانوو شېعرەکاش و پاراو کەردەی بەرینایی شېعرەو هۆرامانیا.
بەڵام چەنی ئانەیچە، بڕېو سەرنجۍ هەنۍ کە ڕەنگە پەی دۊڵەمەڼ کەردەی ئا بەرهەمی لازمېبا. ئەر فرسەت بۊ دماتەر بە وردی باس کریا. بەڵام:
یەکەم: بە باوەڕوو من بڕېو چا نموونە شېعرا کە پەی ڕەوایی دای بە باسەکەی دەسچن کریێنۍ، پەلەشا پۆوە دیارا و کریۍ شېعرۍ تەرۍ هورچنیا.
دووهەم: کریۊ ئینەیچە بە نەزەرەکاو کاک کەیهانی زیاڎ کریۊ کە پەی مەولەوی فرەتەر عرفانی نەزەری و زوانی عرفانی وەرسەرنج بېیەن و باوەڕ مەکەروو مەولەوی کەوتەبۊ سەرو ڕاو عرفانی کرداری و قوناغ بڕیش کەردەبۊ.
یەرەم: وەشەویسی دلۍ شېعرەکاو مەولەویەنە شەخسی بېیەن نەک نۊعی.
چوارەم؛ کریۍ جە بواروو زوانیەرە پۊرەلوای بە کتیبەکەیەرە کریۊ.
جە کۆتاییەنە، دەس وەشی ماچوو بە کاک کەیهانی و چەمەڕاو کاری تازەتەریشنا.
ڕەئوف.م.[1]