هەری مەینەتی
بەشۍ: پەنجەمە
پا جۊرە مایجانە سابیری کۆڕش جە ویرو کۆپان لاریەنە لا بەرد، بە ڕاسی وێچش ئانڎە گرفتاریێش فرێ بێنێ کە حەز نەکەرۍ چا بارۆ، وېش مەشغوڵ کەرۊ. بە لوای هەر شەو ڕوێوی چا زمسانە سەختەنە، پەی وېش و زارۆڵەکاش پیسە بۍ ژیوێوی دوبارەی. هەر ڕوێو کە لوێ، هەنگامێوە زیاتەر بە وەهاری نزیکێ گنێنێ، ئامای وەهاری، پەی ئاڎیشا گۆرەتەرین مۆژدەو ژیوای بێ، چوونکە هەم گاوە زەردە زێێ و گۆرەکەش بۍ و کەرە و ماس پەی زارۆڵەکا فەراهەم کریێ، و دوەمو ئانەیچە، گیواو سۊز بۍ و ئیتر خەمو ئاڵفی جە مل گنێ.
ئیسە ئیتر بەپاو فەسڵی مەشیێ زمسان مازیش مەڕیا بیێ، چوونکە تەنیا دوە حەفتێوش مەنە بۍ کە نۆرۆز بۍ وەرۆ، بەڵام پاسە دیار بۍ کە زمسان دڵش نېیا پۆ بازۆ جیا، هەڵای هەر وەروە زەمینەنە بێ.
مایجانە ڕوێو چن جارێ سەرو گۆڕو گاوە زەردێ دێ. هەر جارێو ئێرە وار و لوێ دلێ گۆڕەکەی، دەسېو ئارێ سەرەشەرە و دۆعێوە خێریش پەی کەرۍ.
شەوۍوە کە گردو زارۆڵەکا وتێبێنێ، ئامارە وار، دوە یەرە سەعاتێو بۍ کە سەرو گۆڕەکەیش نەذا بێ، وەختێو بەرەو گۆڕەکەێش کەردۆ، ناڵەو گاوەکېش ئەژنەوی! بە پەلە لوا دلێ و چراو دەسیەکېش بەردە چەنی وېش، لوا نزیکەش کۆتۆ، گاوەکێ بە ئاشکرا داواو نەجاتیش وەنە کەرۍ. چەرمایی چەماش گۆرە بیەبێ! جە ئێش و ئازارەنە دۆرو وېشەنە خولیېوە. لوا نزیکتەرەش بیۆ مذیۆ دەسێ گۆرەکەکەی چەنی نیمەو سەرەیش بەر ئامێنێ. پاسە دیار بۍ کە گۆرەکەکە، دلێ لەمێشەنە مەردەبۊ. دڵش گیریارە و ماتەمی گرتەرە، نەزانێ چېش کەرۊ! پەنا ئۆ کێ بەرۆ! جە بۍ دەسەڵاتیشەنە ئایەتەلکۊرسیێ وانێ و فوو کەرۍ سەرەو گاوەکێرە! بە پەلە، ئاماوە سەر و سابیری کۆڕش هایش کەردۆ. سابیر بە وەرم ئاڵۆسی ئامارە وار پەی دلێ گۆڕەکەی. نە سابیر و نە ئەذاش هیچ هەرمانۍو نەتاوێنێ کەرا. وەزعەو گاوەکێ سات بە سات خرابتەرە بێ. مایجانە ڕوەش کەردەنە ئۆ سابیری و واتش، ڕۊڵە سابیر گېیان تۊ چېگە بنیشە با من بلو مەتی لاڵێ چڕو ئێگە، بەشکەم چارێو بېزۆوە. سابیر واقش بەردە بێ، نەزانێ چېش بە ئەذێش واچۆ، چا وەختەنە کە ئەذاش گەرەکش بۍ جە گۆڕەکەنە بلۆ بەر، گاوەکێبۊڕێوی زلش کەرد و گۆرەکەکە، جە لەمەشەنە کۆتەرە وار. چېش بۍ چا دەیێقەیە وەشتەر پەی ئاذیشا، شاذی و زۆق جە چەما هەردوییەنە دیار بێ، گۆرەکەکە ئەوەڵ جار هیچ ژڵێویایێوش نەبۍ. گاوەکێ زوو زوو لێسێشۆ و بە لوتەش دێش وەنە، دماو چن دەیێقا، هۆرزناشۆ سەرو پەیا. مایجانە بە دیەی ئا مەزەرەیە، هەناسێوی پەڕ جە ئارامش و درێژش هۆرکېشت، بە تەماشەو گۆرەکەکەی هەڵسەو شاڎیی دلێ چەماشەنە هەڵقێش ۋستە.
سابیر بە پەلە ئاماو سەرو برا گۆلانەکەش کە تازە وەرمش کۆتەبێ پۊرە، هایش کەردۆ. بە قاڵە قاڵ و قسە کەردەی سابیری چەنی براکەێش، کناچەکێچ هەر دوە، وەرمەنە هۆرسێ. گرد ئامێرە وار پەی دیذارو گۆرەکە تازە بە دنیا ئاماکەی.
پېسە جوجەڵا دۆرو ئەڎێشانە گلێرێ بیێ بێنێ و تەماشەو گۆرەکەکەی کەرېنێ. هەس و ئێحساسی زارۆڵانەشا پاسە بەر گنێ، کە ئەجۍ یەک نەفەر بە خانەوادەیشا زیاذ بېیەن. ئا شەوە شۆقو چراو دەسیەکێ چەنی شۆقو دڵو ئاذیشا، گۆڕەکەش فرەتەر ڕۊشن کەردەبۍ، هیچ هەدیێو دنیانە چانەیە وەشتەر نەبۍ پەیشا، (ژیوای جە ئۆجو ساڎەگی و فەقیریچەنە، متاوۆ ساتێ وەشێش چەنە هۆرگنا کە بە هیچ قیمەتێو و هیچ سەروەت و سامانېوی بە دەس نمیا و مەسنیا.)
پا جۊرە مایجانە و زارۆڵەکېش، ئا شەوە سەرو سەعاتێو چەنی گۆرەکەکەی بێنێ، دمایی لوێوە سەر بەڵام وەرم جە چەماشانە نەمەنە بێ. چېرو لێفەکەیچەنە، هەر باس باسو گۆرکڵەکەی بێ. سابیر کە وەڵتەر فرۆ گاوەکېش تام کەردەبۍ، جە ئەذێش پەرساش؛ ئەرۍ ئەذا گېیان کەی فرۆکەما پەی وەش کەری؟ئەذاش بە وەشحاڵیۆ جوابش داوە و واتش، ڕۊڵە گېیان با ئۍ شەو گۆرەکەکە خاس سێربۊ چەنەش، ئیجا سەوای وەرمنە هۆرسا فرۆکەتا پەی وەش کەرو.
وەرم جە چەما گردیەنە پڕا بێ. مایجانە ئاما بەر کە قۆتەرێو بارۆ و بنیۆش دلێ سۆبەکەی. چاوەختەنە سەرێوش کېشا ئۆ وەرهەیوانەکەی و تەماشێو بەریش کەرد. شەوۍوە سەردە بێ، هەڵای وەروە، زەمینەنە بۍ بەڵام سایێقەش کەردە بۍ و مانگە شەوە دنیاش ڕۊشن کەردە بێ. چا وەختەنە کە گەرەکش بۍ داڵانەکەنە قۆتەرەکەی بارۆ سەر، تەقەو دەربازەکەی ئاما! تۆزێو تەرسا و نەیاراش دەربازەکەی کەرۊوە! دڵو وېشەنە واتش مشیۊ کێبۊ پی نیمەشەوە!کە سەرەش وەنە شێویابۊ.
ئاما سەر، جە وەرهەیوانەکەنە دیارە وار، تاپۆ چېوێویش دی، خاس سەرەنجش دا مڎیۆ هەرەکەشانە، کۆپان لارا و خەریکا بە سەرە ماڵای ماڵۆ دەربازەکەیەرە.
ڕەزا بەهمەنی.[1]