یاڎەوەریەکېم
بەشو: ششی
دوێ ڕوێ بۍ وەرۋێوە سووکە، تەڕە و شلە، دەشت و دەرش فیسنابێنە. دڵوەشیېوە ھەرچن کەم و گوزەراش، ۋستەبېنە دڵمان، بۍ ئێختیار سەرەمانیا ئەو زرێبارێ! شیپانەو قەبرەو دەروېشیمان بڕیە. یاوایمێ دووڕیانەکەو ھەردوە دەگاکا. دوێ ئاوایێ لاپاڵەو زرێبارێ سەردابەرڎۍ و ڕووت و قووتێ. بەحتوو دەشت و دەری بییەبێنان. چەمێوەم جادەکەیرە خشیێنە و چەمێوەیچم سرووشتی خاڵخاڵ بییەی. چی حەڼانە ئێڼەم زانا ماشینەکەم کوا دەس ئەندازێوەرە کە دلێ جادەکەینە کېشییەی بێنە! ھەرچن چی وەختانە گردێمان دڵما گیریان و دڵگرانێنمێ، بە دییەی دیمەنە وەشەکەو ئا وەڵاتییە، گۊرانیێمان ئەینێ، دەی واچی چېش! حەر ئانەمان ئەی چەنەو ھیچېوتەر. فرەتەر جە ڕاکێمان بڕیەو بە چن قەنچ و پېچێ یاوایمێ دەگا خنجیلانە دڵگیرەکێ. ئەوەڵین و تاقانە دیمەنێوە کە کەوت وەروو چەمیماوە، درەختېوە مەکین سەروسیما وەش و تاقانە. گەڵا ڕوومەتشەوە نەمەنەبۍ. لک و بنش کەوتەبێ بەروە و چرچێ لاشەی مانیاو مەکەتی دەورانوو ئەوراو تەژنەی و خەم و خەفەتوو ساڵە وییەردەکاو عومریش ڕوێ ڕا دیارێ بێنێ. دەگا سەنگ فەرش کریەیبێنە و کش و ماتیش چەنە چۆڕیێرە. دالێش مەنەبېش بانگوو وېرەگا عەسری زمسانی، چۆڵ و ھۆڵی دەگای چڵاکنۆرە. پاسارە قریرەتاوییەکا و لەبانە سەرو سیما زەلاوییەکاو زرێبارێ، چۆڕیای چۆڕیێنېرە. بۍ دەنگی دەگاکېشان چڵاکنەیبێرە. تەماشاما چەنەشان نەتەمامیێ. دوێ پیایێ سەروکېش وەش کۊڵانێوەنە جمووجووڵشان ئەی و لادەسیشا کەردێبێنێ بیبینەکەیشارە. فرسەتشان نارد ئېمە وینانە. دلێ کووجییە سەنگفەرشەکانە گومێ بییەمێ. چەمېوە بەحتاویتەریمان خشنا سەرو شکڵوو دارە تفە تاقانەکێرە. دیارەن زیاتەر جە سەدېوەن چەمش بڕیانەرە ئی خەم و خەفەت و مەینەتی وەڵاتی. کش و ماتێوە بەحتاوی دەگاش گرتێبێ وێ. خەڵک خزابێنە لاو سۆبەی. بەروە بێجگەم جە دەنگو چۆڕەئاوەو پاسارا و جریکەو مریچڵا و گرەوای دوورەوە زاڕۆڵا دەس و پا پېچیاو دەسەپېچەنەو دلێ بېشکا و قاڕە قاڕوو قشقەڕېوە ئەوەجیامەنە جە خێڵیشان، دەنگ و ڕەنگەو کەسېوەمان نەدیوە، تاکو ئی بۍ دەنگو ئاواییە، چڵاکنۆرە.
بورهان ئەختەر.[1]
Αυτό το στοιχείο έχει γραφτεί σε (هەورامی) γλώσσα, κάντε κλικ στο εικονίδιο
για να ανοίξετε το στοιχείο στην αρχική γλώσσα!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
Αυτό το στοιχείο έχει προβληθεί φορές 123