یاڎەوەریەکېم
بەشو: دواڼزەی
من کناچېم نېیەنە، شایەڎ ئیتر چی سن و ساڵەنە نەوینوونەش. ھەروەخت زەردەخەنەکەیشا جە تەلەفزیۆنەنە وینوونە، چەماشا وینوونە کە چە زەردەخەنێوە کاڵ و کرچ و ماناڎارە مازارە، پەلکە و قژۍ ئازادێشان وینوونە، مووچرکېوە مەینە لاشەمەرە و چەمېچم پەڕێ بانە ھەرسی و چک چک تلێ باوە دلێ دیڎەیم. ئیجا دڵیچم نمەی لاشا بەروونە وېشا تەڕێ و تڵیسم کەرانە و دیدەیم مازارە دلێ خەم و پەژارێوە بۍ حەد و حسر و بۍ وېنەی. دمایی سوکناییم پەی مەی، بەڵام ۋزۆم جموجووڵێوە بۍ حەد و حەشر! چی ڕوانە ئێڼە مەرگ و خەم و پەژارە وینوونە عەڼاموو گېیانیم ئێش کەرۊنە و ھیلاکەن. چەمېم پەڕێنێ تەم و لێڵی، میاچەمام چرچ و خەماویی. لووتەم لووکش ئاستەنەرە و وەروو چەمامنە ماسێنە و پوفش کەردەن. ڕیشم چەرمەتەر جە جارانی مرمانۆنە و لۆچش ئاستەنەرە زنج و میاچەمام. ئیتر با دەس و پەنجەم مدرۆنە کە گۊ و ئەرمانای قەڵەم و کاغەزیش نېیەن، دەسمنە گنای گنۆرە وەروو پایام. ئیسەیچ گەر تاوونە بنۋېسو، عەینەکەکام قورستەر مرمانانە و خەریکەن گنارە دلێ دەسام و تارووپۊشان مرکیۆرە و کۊراییم وزانە پەنجا و پەنج ساڵەییم. ئاوێنەو مەنزڵەکێم تەماشام نمەکەرۊنە. سرووشکڵیی پەژموردە و دەم و پلیی تاسیا. سکووتێوە ئاما پێوایمەوە. مەلیس و تورش و شیرین. مڎیەو ئاخەرین ڕۊمانېوە کە وانووشەوە. کەمېوە سەبووریم پەی مەینە. ملو دەس و پلیم شۆروەوە. ئی جارە ئاوێنەکە تەماشام کەرۊنە . ئەجۊ سووگواریی و ماتەمینوو ھەمیشەگیەن . دیسان چەمېم گیریارە. لەقان لەقان مووچرکەکێ لاشەمەرە وەزارە واری.
بورهان ئەختەر.[1]
Αυτό το στοιχείο έχει γραφτεί σε (هەورامی) γλώσσα, κάντε κλικ στο εικονίδιο
για να ανοίξετε το στοιχείο στην αρχική γλώσσα!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
Αυτό το στοιχείο έχει προβληθεί φορές 121