چن سەرنجێ سەرو داستانەو داروو ئاشتی
نویستەی: #ئیبراهیم حاجی زەڵمی#
کوڵە ڕازێ زاڕۆڵانێنە، مامۊسا ڕەوفی مەحمودپوری نویستېنە
جە دوەتۆو (12) لاپەلاو نامیلێنە (نامیلکە) بەڕېسمێ شیکاریێ، ڕازیابێوە، ئی نامڵێ کە ئێسال چاپەکریێنە دندێش یاوان دەسو برایتا، یاگێ ئانەین من یەری خاڵی وزو ڕوە سەرش:
یەکەم: ڕەوف مەحمود پوور یۆن چا قەڵەمە جوان و ڕۊشنکارا کە نویستەکاش یاگێ ئانەینی ونیاوە و بە ویرۆ یۊ سەرشا مدرۆ، ئاوەزیش وزۆ سەرو پەشتەو ئاکەلیما و ئا ڕېسیایا کە جەدوەتۆ نویستەکەینە وېشا گرمۆڵەدان، واچایێ ئینسانیێ و مانایی پەڕبەهای و تەڕایێ پەی دەمتەڕکەردەیوەی ویرینێ.
دوەم: وەڵتەر زاڕۆڵێ ئېمە، هەر قینی و بېزنای وجەنگ و چەک وئاویرشا وستەن ویرشا، پەروەردەو یاونایپەنەیشا چېرو مەینەیتو ئەزیەتەکاو ژیوایمانە بېیەن. ئارۊ هەقو وېشا دلێ چەمکەکاو دینی و نیشتمانی و قەومی و خاکینە کە تەنیا جەنگ و ئەنفال و ماڵۋېرانی و دەربەدەری و جینۆسایدشا کەردەن گڵۋی ئېمەرە بەغەڵەت! ئېمەیچ پاڵو ویرنەشېیەیوەی ئا مەینەتیانە، ئی نامڵەو مەحمود پوری پەنەما واچۆ: چەمکە جوانەکا پېسە ئاشتی و ئاوەڎانی و چەنی یۆی ژیوای و ئینسانیەتی با گومێ نەکەرمۍ و دەرخواردو زاڕۆڵەکاما دەیمێشا بەڕازێ پەروەردەیانێ و پەنجێ وزمێ سەرو پەروەردێ عالی ئینسانی.
یەرەم: پی نامڵەیە واتەنش، خەڵکو هۆرامانی و کوردەواری مشۊ بزانۆ زوانی هۆرامی، دیمێ جوانو شوناس کوردەواریا، با زاڕۆڵەکێما بە زوانو ئەداییشا با بواناو بواناوە، با بواچاو کوردەواریچ گۊششا پەی بگېرۆ، با هیزیمابۊ چراوەو پەی ڕۊشنکەردەیوەی ڕاو سەوای.
مامۊسا ڕەوف دماجار شیعرەکێ مەولەوی ماچۊوە:
چوون شەماڵەی نوور گڕگڕانمەن
پەی پاسی ماران زەنگ زڕانمەن
دەسوەشی ئومێدو ویرو کاری عالتەری، پەیش موازوو.[1]