نامۍ: محەمەد
نامۊ تاتەی: مەلا عەبدولکەریمو بیارۍ
ڕۊ پېڎابېیەی: #14-08-1931ز#
ڕۊ مەرڎەی: #12-03-2017ز#
یاگۊ پېڎابېیەی: #بیارۍ#
یاگۊ مەرڎەی: #سلێمانی#

ژیواینامە
محەمەڎو مەلا کەریمی، کوڕو نویسەر و زانای گۆرە مامۊسا
مەلا عەبدولکەریمی مودەڕیسیەن، تاریخو (14- 08 -1931) جە شارەکڵەو بیارۍ ناوچەو هۆرامانی، دلۍ بنەیانێوە ئایینپەروەرینە بە دنیا ئامان، هەر جە سەرەتاو ژیوایشەنە دلۍ خانەقاو بیارېنە و چېرو سایەو تاتەیش و ئا زانا نامڎارانە کە چاگە تەشریفشان ئاماڎە بېیەن دەرسش وانان، تاکو تەمەنو نزیک بە ویس ساڵانی خەریکو دەرسە ئایینیەکانی بېیەن و دماو ماوێوی کەمی تېکەڵ بە دنیاو ئەدەب و شېعر و چیرۆک و بوارەکانو تەرو فەرهەنگی بېیەن، دماتەر جیاواز جە تاتەیش ویر و پەیلواش فاڕیان، باوەڕی چەپگەرا زاڵبیەن ملشەرەو پېسە چەپێ تازەگەری بەرکۆتەن. حەمەو مەلا کەریمی، وەختێ پاشنیانە دلۍ دنیاو بەنام چەپگەرایی و ئازادیوازی، کۆتەن چېرو لۊمە و سەرزەنشتێ فرەی، یەکەم ۋەرو ئانەیە وېش بەرشیەو مەدرەسێ ئایینی بییەن و کوڕو زانێوە نامڎاری، دوەم ئەچا سەردەمەنە ئا ویروباوەڕە تازۍ نامۊ و غەریبۍ بېنۍ بە کۊمەڵو کوردەواری، بەڵام ئیتر ویرو ئینسانی ئازادەن چەنی و چکۊ وېرکەرۊوەو قەرار مڎۊن. ئاڎ پېسە مروڤێ خەموەر و دڵسۊزو بوارو ئەدەبی ئاڼە سەرقاڵو خزمەتکەردەی بوارو ئەدەبی بییەن، ئڼە پاگیریش دلۍ دنیاو سیاسەتینە نەکەردەن. حەمەو مەلا کەریمی زیاتەر دماو پەنجاکا سەدەی وېیەردەینە بەتڼیی و دڵسۊزی و خەموەری چڼیین هەرمانۍ بەقیمەتېش کەردېنۍ، پېسە گلېرکەردەیۆ و ساقکەردەیۆ چڼیین دیوانە شېعرا شاعېرە وەڵینەکا، یام شاعېرە کلاسیکیەکا، کە تاکو ئا دەمە کۆتېبېنۍ چېرو تەپ و توزو زەمانەی، پېسە دیوانو شېعرەکانو مەولەوی و مەحوی و نالی و گۆران و بێخودو چڼیین تەرۍ. پاڵو ئا هەرمانە ناوازېشەنە بەرهەمو چن شاعېرێ جەهانی پېسە (پووشکین)ی بە وانەرو کوردی ئەشناسێنۍ. شارەزاو زوانەکانو عەرەبی و فارسی بییەن، بە تەرزێ فرە دەسش درېژبییەن ملشارە.
محەمەڎو مەلا کەریمی دمای ماوێ فرەی چېرو سەختی دەرد و نەوەشینە، جە بەرەبەیانو (12-03-2017ز) جە شارو سلېمانی کۊچی دمایینش کەدەن، سەرو وەسیەتو وېش پاڵو ئارامگاو گۆرانی شاعیرینە دلۍ گردو سەیوانی ئەسپەردەکریان.
 حەمەو مەلا کەریمی دلۍ کتېبو (محەمەدی مەلا کەریم بە قەڵەمی خۆی) نویستەنش: (من محەمەڎو مەلا عەبدولکەریمی مودەڕیس، تاریخو (14-08-1931ز) دلۍ شارەکڵەو بیارۍ سەر بە قەزاو هەڵەبجەی بە دنیا ئامانا، دلۍ ۋانگاو زاروڵە شېخەکا بیارېنە قورئانی پیروزم تەمام کەردەن و زوانی عەرەبی و فارسیم دلۍ حوجرەینە وانان، تاکو ساڵەو (1952ز) یانەمان جە بیارۍ بېیەن و دماتەر بارمانکەردەن پەی سلێمانی و ساڵەو (1954ز) وانای مەڵڵاییم جە سلێمانی تەمام کەردەن.
خاوەنو زیاتەر جە (30) کتېبە هەمەڕەنگانا، ئینە بېجگە ئانەی چەنی تاتەیم (مەلا عەبدولکەریمی مودەڕیس) هەرمانەم کەردېنە پەی ساقکەردەیۆ بەشێ فرەو دیوانە شیعرییە کلاسیکییە کوردییەکا.
شێرکۆ بێکەس جە تاریفۍ حەمەو مەلا کەریمینە ماچۊ:
هۆرامان کوڕو کەشیین و
سیاوچەمانە کناچۍ دەرەی
ئەچی دوەیچە وەچۍ شېعرۍ و پەخشانی کۆتێ و
دلۍ دار ۋەزێ نوورانیېچەنە (مەلا عەبدولکەریمی مودەڕیس) بەرئاما
چاڎییچی جەمێ درەختۍ ڕۊشنفکرۍ
کە یۊشان (حەمەو مەلا کەریمی گوڵاوی بۍ).
ئەسعەد ڕەشید.[1]