دەسما بێ دەسەڵاتا
تەنیا تاوۍ یەخێ دڕمێو و خوڎا دەیمێ گژیش هۊر و چەمەڕای بیمێ خوڎا حەقیما سانۆ و ئاویر وزۆنە دڵیشوو یانەیش هەر پاسە دڵما ئاویرش دا، ئەڎیاوە کە نۆ مانگ و نۆ ڕۊش کېشت، جە قوتو وېش گرتشوە و بە شەو نەوتەیکۆڕش گۆرە کەرڎ، تاتێو کە کاری و خەفەتی سەرەش چەرمەش کەردوو مازیش کۊم، ڕۊنە کارش کەردوو شەوېنە دوکانداری
کزیش کېشت وېس شش ساڵې زەحمەت، پائۆمێڎەیکۆڕەکەیش بېیاونۆ پەنە.
کۆڕێو کە نیمەشەوېنە کۊڵبەری کەرې پەی تێکەو نانێ ڕوێچنە عەساو دەسو ئەڎاو تاتەی بې، کۊڵەکې یانەی بې.
ئەرۍ، کۊڵەکەێوە هێقم و پتەوە کە خەڵکێ جە چەنی بېیەیش لەزەت بەرێ، بە خوەکەیش خەڵکێ شاڎ کەرې،
یاگې دڵوەشی زارۆڵا وجواناو پیرا بې.
وېرەگانە لاو دووکانیش ژەن و پیا جوان و پیر پولەشا بەستێ بی دەورشنە، تاریک و لێڵ بې، ڕەحم ۋتەبێ، وێژدان چەمېش گرتێبېنېرە، ئېنسانیەت زوە بې چاگە نەمەنەبې، تەقێو دوې و تەمام.
قەترە قەترە ۋنێ تەڕینەکۍ و گەونەکېش تەر کەرڎې
دڵ جە ترپەی کەوت نەفەسەو ئاخری کیشییاو دەم جە خوەی کەوت، چن ئاواتی کە نەیاواشا پەنە و پڕووسقیا.
چن هەرمانې کە نێمەچڵێ بېیێ و دەسش ئاستێ
چن هارەقوو زەحمەتێو کە متش و کېشتش و نەنیشت سەمەر.
چن ڕەفێقێ ماتڵوو گېلایشوە بېنې، واڵەکېش چەمەڕاو ئامایشوە بېنی، لیباسە پڕ جە هارەقەکەیش شۆرا و سەیناشوە
کام ویژدان قبووڵش کەرۊ کە پەی تیکێو نانی (200) دانێ ساچمێت بڎا وەنە.
ڕەحم و وێژدان چی زەمانەنە و جە وەڵاتو ئېمەنە قسێوەی مفتەنە، کافرسانی ک ماچاش ئینەن، دڵما وەشا و فیزێ کەرمې و بە قسێوە کە مەنتەقەکەما سەبتی جەهانین خەڵەتنیانمێشا
خوڎا کاولش کەرۊوە پەی لەشەیما کە سەدەکەش یاگې خنیکیایمانە و مەرزەکەیش یاگې تیر واردەو جوانەکاما تاڵیەکەش و جەرگ سۆتەیش بەشو ئەڎاکاو تاتەکامان ولێ زەریفیەکەش و لەزەتەکەش هنوو بېگانا.
ئەرۍ ئېمە یاگېونە ژیومێ کە ئیجازەما نییا هەوا کېشمێنە دلې شمشاما.
چیگە نانە هەراڵە کە هارەقش مجیرە پەی هەرامەنە و مشۊ گېیانیێچت دەی ڕاشنە.
وێڵ وێڵ مەگېڵام کۊ بە کۆ، دەردم گران بې ڕۊ بە ڕۊ
سا حاڵ و دەردیم پەرسە تۊ، خۊ کافرستانی نیۆ
سەیدی گرانۆ ئەلویداش، هیجران مەدۊ هەر دەم جەفاش
هەی پەی خوای بەیدې وەلاش، خۊ کافرستانی نیۆ
ئەرۍ کۆڕە ون شیرینە باڵابەرزەکەو نوېنەی ڕاو نانێنە شەهێڎ کریا.
مەوتەنەکەی چەم دیڎەش ﮪا نه ڕېت
غه ڕیبی تاکەی، بۊوه ماوای وېت
شەهادەتت مۆبارەک.
مادێح سەحرایی.[1]