لە دوای ململانێیەکی یاسایی و سیاسی لەنێوان سەرجەم لایەنە سیاسیەکانی نێو پەرلەمانی عیراق لەڕۆژی 07-03-2013 پڕۆژە یاسای بودجەی عیراق بەبێ بەشداری کردنی پەرلەمانتارە کوردەکان بە ناتەواوی پەسند کرا.
گفتوگۆکردن لەسەر ئەم یاسایە ماوەیەکی زۆری برد، چونکە ئەنجومەنی وەزیرانی فیدڕاڵ پڕۆژە یاسای بودجەیەکی ڕەوانە کردبوو کە پڕبوو لە کێشە و بڕگەی نادروست و نادەستووری سەرەڕای ڕێگەنەدان بە هەرێم لە بەشداریکردنی داڕشتنی بودجە وەک مافێکی دەستووری خۆی، هەرچەندە ئێمە وەک حکومەتی هەرێم زۆر هەوڵماندا کە ئەو کێشانە پێشووەختە بە دیالۆگ چارەسەربکرێن، بۆ ئەو مەبەستەش چەندین شاندمان ڕەوانەی بەغدا کرد و لەگەڵ بەرپرسانی بەغدا کۆبوونەوە، دواجاریش شاندێکی هەرێمی کوردستان لەژێر چاودێری سەرۆکی پەرلەمان کۆبوونەیەکی تێروتەسەلیان ئەنجامدا بەڵام بە داخەوە هەوڵەکان نەگەیشتە ئەو ئاکامەی کە بودجەیەکی پوخت کە لە خزمەت تەواوی گەلانی عیراق بێت، بخرێتە بەردەم ئەنجوومەنی نوێنەران. لەگەڵ ئەوەشدا لە ئەنجومەنی نوێنەران پڕۆژە یاساکە پەسندکرا. لە گفتوگۆکان ئامانجی هێزە سیاسیەکانی کوردستان ئەوە بوو کە بودجەیەک ئامادە بکرێت لە خزمەت تەواوی خەڵکی عیراق بێت و مافی گەلی کوردستان و پێشکەوتنەکانی تێدا ڕەچاو بکرێت.
بەڵام ئەوەی جێگەی داخە چەند خاڵێک کە لە یاساکە پەسندکراوە نەک هەر لە بەرژەوەندی خەڵکی کوردستان نییە، بەڵکو لە دژی هاوڵاتیانی هەرێم و بەرنامەکانی حکومەتی هەرێمە. بۆیە وەک حکومەتی هەرێم چەندین بڕگەی یاسای بودجەی ئەمساڵی عیراق ڕەت دەکەینەوە. و تەئکیدی ئەوەش دەکەینەوە کە ئەوان بە پشت بەستن بە پرەنسیپی زۆرینە و فەرامۆشکردنی پێشنیازو تێبینی و مافەکانی خەڵکی کوردستان لەبودجەدا، بەکردەوە بنەمای تەوافقی نیشتمانی و هاوبەشی کردنی ڕاستەقینەیان لە دەسەڵات پەکخست کە بەگوێرەی دەستور، عیراقی تازەی لەسەر بیناکراوە، لەم یاسایە نەفەقاتی حاکیمەو سیادی و پێشمەرگەو پەرەپێدانی پارێزگاکان و پیترۆ دۆلارو موستەحەقاتی کۆمپانیاکانی نەوت بەهیچ شێوەیەک لەبەرچاو نەگیراوە.
ئەم هەنگاوەش لێدانە لە پێگەو مافی سروشتی و دەستوری کورد وەک پێکهاتەیەکی سەرەکی، لە ڕۆژانی داهاتووش زنجیرەیەک کۆبوونەوە لە نێوان هێزە سیاسیەکانی هەرێمی کوردستان و پەڕلەمانتارو بەرپرسانی کورد لە بەغدا ئەنجام دەدرێت بۆ ئەوەی هەڵوێستی هەرێمی کوردستان بە ڕاشکاوی بخرێتەڕوو.
حکومەتی هەرێمی کوردستان سەرەڕای دەربڕینی نارەزایی توندی خۆی بەرامبەر ئەو پێشێلکاریە، ڕاشیدەگەینێت کە مافی خۆیەتی ئیلتزام نەکات بەو بڕگانەی کە دژی دەستووری عێراقن و سەرجەم ڕێگە قانونی و دەستوریەکان دەگرێتەبەر بۆ ڕێگریکردن لەم هەوڵەی دژ بە بەرژەوەندی و ژیان و گوزەرانی خەڵکی کوردستان و عیراق بەگشتی گیراوەتەبەر.
لەکۆتایدا حکومەتی هەرێمی کوردستان پێزانینی خۆی بۆ سەرجەم ئەو فراکسیۆن وپەرلەمانتارانە دوپاتدەکاتەوە کە هەوڵیاندا ئەنجومەنی نوێنەران بودجەیەک پەسەند بکات کە لەبەرژەوەندی هەموو گەلانی عیراقدا بێت و ئامادەش نەبوون بەم شێوەیەی ئێستای دەنگی پێبدەن، بەتایبەتیش دەستخۆشی لە پەرلەمانتارە کوردەکان دەکات کە هەموویان کۆک و یەک دەنگبوون لەسەر پاراستنی بەرژەوەندیەکانی هەرێمی کوردستان و دەنگ نەدان بۆ یاسای بودجەی ئەمساڵ.
حکومەتی هەرێمی کوردستان