گەلی قارەمانی کوردستان !
پێشمەرگە ئازادیخوازەکان!
کەسوکاری شەهیدە نەمرەکان!
داعش و ئەوانەی لەپشتیانەوە بوون، سەرەنجامی کێشە دروستکردن بۆ پرۆژەی عیراقی فیدراڵ و قوڵبوونی کێشە سیاسی و کۆمەڵایەتییەکان لەعیراق و ناوچەکەدا، نەخشەیان داڕشت، پرۆسەی سیاسی دیموکراتی فیدراڵی لەعیراق و کوردستاندا تێکبدەن، هەتا بتوانن کۆنترۆڵی ناوچەکە بکەن، بەتایبەتی عیراق و باشووری کوردستان، هەروەها سوریا و ڕۆژئاوای کوردستان.
کە لەسوریادا بەهێزبوون، گواستیانەوە بۆ عیراق و لەپارێزگاکانی (نەینەوا و ئەنبار و سەلاحەدین) و هەندێک ناوچەی دیکە، سەرکەوتنێکی چاوەڕوان نەکراویان بەدەستهێنا، ئەم سەرکەوتنانە هاوکات کاریگەری لەسەر ڕوودانی کارەساتی شەنگالیش هەبوو.
داعشە دڕندەکان لەشنگال و ناوچە شیعە و مەسیحی نشینەکاندا، سنووری دڕندایەتیشیان بەزاندو ڕووی تاوانبارانی مێژووشیان، لەماوەیەکی کەمدا سپی کردەوە و ئەوەی تاوانبارانی ڕابردوو، لە دەیان ساڵدا ئەنجامیان داون، ئەمان لە سێ مانگدا، لەتاوانەکانی ئەوانیشیان تێپەڕاند.
یەکێتیی نیشتمانیی کوردستان ساڵاهایە لەو هێزانەیە، مەترسی سەلەفیەتی کۆمەڵکوژیی خستۆتە بەرچاو، لەناوچەکانی هەڵەبجەشدا شەڕی سەختیشیی کردن، کە هێزێکی ڕەشەکوژی وەکو داعشیش سنووری باشووری کوردستانی خستە ژێر هەڕەشەوە، هەر زوو مەترسی ئەم سیاسەتە و ئەم هێرشەمان بۆ باشووری کوردستان خستەئاراوە و جەختمان کردەوە، سیاسەتی بەرگری بگۆڕین بە سیاسەتی هێرشی ڕزگاری، لەم پێناوەشدا، بێ درێغ تێکۆشاوین و قوربانیمان داوە.
سەرەنجامی سیاسەتی هێرشی عەسکەری و پشتیوانمان لەجیهان و ناوچەکەشدا، خۆشبەختانە لەپارێزگاکانی دیالە و کەرکووک و ناوچەکانی مەخموریش و هەندێک شوێنی گرنگی نەینەواش، سەرکەوتنی گەورە گەورەی چاوەڕوان نەکراو، بەدی هێنراون.
لەهەمان کاتدا، هێزی پێشمەرگە بەسەرپەرشتی سەرۆکی هەرێم، خۆی بۆ هێرشێکی فراوان ئامادەدەکرد، هەتا شەنگال و دەوروبەریشی لەو جانەوەرانە ڕزگار بکرێ.
بەرپرسیارێتیی نەتەوەیمان بوو شەنگال لەم کاتەدا ڕزگار بکرێ، چونکە داگیرکردنی شەنگال و ئەو زڵمەی لەخوشک و برا ئێزدییەکانمان کراوە، دوای کارەساتی ئەنفال وهەڵەبجە، ئازاردەری ویژدانی نەتەوەکەمان بوو، تەنها بە ڕزگارکردنی شەنگال و ئازادکردنی دیلەکانمان، برینی قوڵی ئەو ئازارە سارێژ دەکرێت و تۆڵەی شەهیدان و زوڵم لێکراوانی ناوچەکەش دەسەندرێتەوە.
جەماوەری کۆڵنەدەری کوردستان !
بۆ سێ ڕۆژ دەچێت، ئۆپراسیۆنی ڕزگارکردنی چیای شەنگال و دێهات و شارەدێکانی دەوروبەریان، بەو پەڕی قارەمانێتی هێزی پێشمەرگە و هاوکاری هێزی ئاسمانی هاوپەیمانان، دەستی پێکردووە.
مایەی سەربەرزیمانە، هێرشی ڕزگاری پێشمەرگە سەرکەوتنی گەورەی بەدەستهێناوە و داعشە هاش و هوشکەرەکان، دووچاری شکستی گەورە هاتوون، کە ئەمە سەرەتای سەرکەوتنی ستراتیژی دەبێت بۆ ڕزگارکردنی تەواوی کوردستان، بەتایبەتی لەناوچەکانی دەرەوەی هەرێمدا، لەپارێزگاکانی کەرکووک، نەینەوا و سەڵاحەدین و دوورخستنەوەی دوا مەترسیشە لە سەر پارێزگای دیالە، بەتایبەتی سەراپای قەزای خانەقین، کاریگەری عەسکەری گەورەشی بۆ لاوازکردنی توانی داعشەکان لەعیراق و ڕۆژئاوای کوردستانیشدا دەبێت، لەم کاتەشدا جەخت دەکەینەوە ئەم ڕزگاکردنەی شەنگال و ناوچەکانی تری ماددەی 140ی دەرەوەی هەرێمی کوردستان، تەنها ڕزگارکردنی خەڵک و خاک نییە لەدەست دوژمنێکی دڕندەی وەک داعش، بەڵکو سەلمێنەری ئەو ڕاستییەشە کە ئەم ناوچە کێشە لەسەرانە، پەیوەندی ئۆرگانیکیان بە سنووری باشووری کوردستانەوە هەیەو چارەنووسیان چارەنووسی شکست و سەرکەوتنی گەلی کوردستانە، بۆیە کاتێک شەنگال و جەلەولا و سەعدیە و سلێمان بەگ و مەخمور داگیردەکرێن، شۆڤێنییە عەرەبەکان زۆرتر حکومەتی هەرێم و یەکێتی و پارتیان بەکەمتەرخەم دەزانی، ئێستاش کە ئەم ناوچانە ڕزگار و ئازاد دەکرێن، هێزی پێشمەرگەی کوردستان ئەم شەرەفە تۆمار دەکات.
ئومێدەوارین ئەم ڕاستیانە، زەمینەی مێژوویی جێبەجێ کردنی ماددەی 140 ی لەسەر ئەرز و لەئەقڵەیەت و لەویژدانی هەموو لایەکدا، باشتر ڕەخساندبێ و جارێکی تر خاک و خەڵکی بەخوێنی پێشمەرگە و شەهیدانی بێ گوناح ئازاد کراو، ناکرێ بخرێتەوە گرەوی پاساوی بێ پێزی نەگێرانەوەی ئەم ناوچانە، بۆ سەر کوردستانی دایکیان.
جەماوەری سەربەرز !
پێشمەرگە هەڵمەت بەرەکان!
مەکتەبی سیاسی یەکێتیی نیشتمانیی کوردستان، لەم ڕۆژە پیرۆزەی سەرکەوتنی هێزی پێشمەرگە بەسەر دوژمنە تاریک پەرستەکاندا، پیرۆزبایی لە بەرێز سەرۆکی هەرێم و حکومەتی هەرێمی کوردستان و هێزی پێشمەرگە دەکات، بەدڵنیاییەوە چاوەڕوانی ڕزگارکردنی دوا بستۆکەی ئەو ناوچانەین. بەم بۆنە مێژوییەشەوە، سڵاو و نەوازش بۆ تێکرا شەهیدانی کوردستان دەنێرین و بە دڵنییاییەوە، دڵنیایان دەکەین کە (ئەی شەهیدان، نامرێ ناو و نیشانتان) کێلی بەرزی هەموو یەکێکتان، سەربەرزی کچ و ژنی ئێزدی پاراست و سەروەری پێشمەرگەی کردە بناغەی قۆناغی نوێی کوردایەتی هاوچەرخ.
سڵاوتان لێ بێت.... پێشمەرگە و بریندارەکان..... کە هەر برینێکتان گوڵاڵە سوورەی باخی ئازادی و ڕەنگی سووری ئاڵای شەکاوەی کوردستانە.
ئەی نەتەوەی کۆڵنەدەری کوردستان :
پیرۆز بێ ئەم سەرکەوتنە لەهەموان، مژدەش بێ بۆ سەرکەوتنی شەڕڤانان و پێشمەرگەکانی کۆبانی و ڕۆژئاوای کوردستان لەمنزیکانەدا، سڵاو لە یەکە بە یەکەی ئێوەش، ئەی فەرماندەو ئەفسەر و پێشمەرگە گیان لەسەر دەستەکانی کورد و کوردستان و ئازادی.
ئێتر بۆ پێشەوە بەرەو
سەرکەوتنی یەکجارەکی
راگەیاندنی مەکتەبی
سیاسی ی.ن.ک
19-12-2014