لای هەمووان ئاشکرایە کە کوردستان ئێستا ڕوبەڕووی کۆمەڵێک قەیران و هەڕەشە بوەتەوە لەنیویاندا قەیرانی دارایی، وە بۆ ڕوبەڕوبوونەوەی ئەو قەیرانە حکومەتی هەرێم چەند هەنگاوێکی ناوە بەناوی چاکسازی و چەند بڕیارێکی دەرکردووە و ناویناوە "چاکسازی"..
ئێمەی دادوەران لەماوەی ڕابوردوودا سەبارەت بەسەرجەم ڕووداوەکانی هەرێم بێدەنگیمان هەڵبژارد لەسەر بنەمایەکی دادوەری ئەویش بێلایەنیە، بەجۆرێک لە سەرجەم کێشمەکێشمەکان دادوەران و بەتایبەتیش دادوەرانی سلێمانی بەجۆرێک هاوسەنگی خۆیان پاراستووە کە نەکەونە هیچ بەرەیەکەوە یاخود لێکدانەوەی لایەنگریی بۆ نەکرێت، لەم ڕوەشەوە دادوەران ڕوبەڕووی هێرشی ناڕەوا بوونەوە لەلایەن لایەنەکانەوە. بەڵام دادوەران دوای ڕوونبوونەوەی لایەنی دادوەری و قانونی هەڵوێستیان بەسەربەرزی و بێلایەنی دەرچووە، بەوپێیەی بنەمای سەرەکی دادوەری بردنی کێشەکانە بۆلای دادگا و دادوەران لەڕێگەی سکاڵا و داوا نەک ڕٶشتنی دادوەران بۆلای کێشەکان کە لەو دۆخەدا دادوەر بێلایەنی خۆی لەدەست دەدات.. کۆمەڵگەی کوردی دەمێکە لای جێگیر بووە وەک پەند کە (دەستێ دادوەر بیبڕێ خوێنی نیە) کەواتە گەلەکەمان بەسروشت ملکەچ و پابەندی قانون بووە، بەڵام دەسەڵاتی کوردی بووە کە ئاوی پێشێلکردنی قانونی بەردەوام ڕشتووە و بڕیارەکانی دادگای جێبەجێ نەکردووە، بەردەوامی ئەو کارەش لە پشتگوێ خستنی دامودەزگا قانونیەکانی هەرێم خۆی دەبینێتەوە..
ئێمەی دادوەران چاکسازی ڕاستەقینە لەوەدا دەبینینەوە کە قانون سەروەر بێت بەجۆرێک هەموو هاووڵاتیان یەکسانبن لەبەردەم قانون و هیچ کەس و تاقمێک لەسەروو قانونەوە نەبێت، وە ئەو هەنگاوانەی حکومەتی هەرێم بێجگە لە کەمکردنەوەی خەرجی و سیاسەتی سک هەڵگوشین هیچی تر نین کە حکومەتی هەرێم گرتونیەتەبەر بۆ بەرەنگاربوونەوەی قەیرانی دارایی کە لەسەرشانی فەرمانبەران و کەمدەرامەتان جێبەجێ دەکرێت، لەکاتێکدا چاکسازی ڕاستەقینە پرۆسەیەکی گشتگیر و هەمەلایەنە و دەبێت کۆی کۆمەڵگەی بۆ ئامادە بکرێت و متمانە بگەڕێندرێتەوە بۆ نێوان حکومەت و هاووڵاتی و گەڕاندنەوەی هەیبەتی دادگاکان و دەزگا قانونیەکان و سەروەری یاسا دەبێت، پاشان گەڕاندنەوەی سەروەت و سامانی حکومەتی هەرێم کە بە چەندین ڕێگەی قانونی و ناقانونی دەستی بەسەردا گیراوە..
ئێمەی دادوەران چاکسازی لە بڕینی موچەی فەرمانبەراندا نابینینەوە لەکاتێکدا موچە خۆی لەبنەڕەتدا نادرێت، وە ئەم دۆخەی ئێستا هەرێمی کوردستانی پێدا تێدەپەڕێت شیاوی قبوڵکردن نیە کە ڕۆژ لەدوای ڕٶژ وڵات بەرەو پاشاگەردانی و بێ قانونی هەنگاو دەنێت و کەس خۆی بەبەرپرس نازانێت لەکاتێکدا فەرمانبەران ماندەگرن ژیان دەوەستێت و لەولاشەوە بانگەشەی دەوڵەتی کوردی دەکرێت کە خەونی هەموو کوردێکە، دەوڵەتی کوردی بە یەکڕیزی و سەروەربوونی قانون و دیموکراسی ڕاستەقینە دروست دەبێت کە خەونی دادوەرانیشە و لاشمان گرنگ نیە کێ هەڵگری ئەو دروشمەیە و هەوڵی جێبەجێ کردنی دەدات، لێرەشدا بەپێویستی دەزانین هەڵوێستی سەرۆک وەزیرانی بەریتانیا بەبیری هەموولایەک بێنینەوە کە لەکاتی جەنگی جیهانی دووەم لەلایەن ئەڵمانیاوە هەڕەشەی لەناوچوونی لەسەربوو پرسیاری دادگا و سیستەمی دادوەری کردبوو و وتبووی مادام دادگا و دادوەری لە وڵاتدا سەربەخۆ و باشە کەواتە لەشەڕدا سەردەکەوین..
بۆیە داواکارین لە حکومەتی هەرێمی کوردستان و هەموو لایەنێک کە خۆی بە بەرپرس دەزانێت بەئاگا بێنەوە لەو مەترسیەی ڕوبەڕووی وڵات دەبێتەوە، ئەویش بەئەنجامدانی چاکسازی ڕاستەقینە لەڕێگەی گەڕاندنەوەی هەیبەت بۆ سەرجەم دامودەزگا یاساییەکەنی هەرێم و سەروەری قانون و سەربەخۆیی دەسەڵاتی دادوەری کە هیچ دەسەڵاتێک بۆی نەبێت دەست وەربداتە نێو کارەکانیەوە و لەمپەڕ لەبەردەمیدا دروست بکات بە دانانی حەصانە بۆ کەسایەتیەکان بۆئەوەی لەسەروو قانونەوەبن.. هەروەها هۆشداری دەدەینە دەسەڵاتی دادوەری بەوپێیەی دەسەڵاتە، ڕێگە بە دەسەڵاتی جێبەجێکردن نەدات دەست بخاتە نێو کاروباری دادوەری کە وەک دەردەکەوێت کەسانێک ڕێنمایی بۆ دەسەڵاتی دادوەری دەردەکەن کە هیچ شارەزاییەکیان نیە لە کاری دادوەری و دەسەڵاتی دادوەری..
ئێمەی دادوەران ئەم دۆخە بە مەترسیەکی گەورە دەبینین کە ڕوبەڕوی وڵاتەکەمان بۆتەوە و هەموولایەکی لێ ئاگادار دەکەینەوە و وەک ئەرکێکی قانونی و نیشتمانی لەبەردەم خوا و میللەت ئەم هۆشدارییە دەدەینە هەموولایەک.
لقی سلێمانی یەکێتی دادوەرانی هەرێمی کوردستان
17-01-2016