هەڤاڵانی دڵسۆزی یەکێتیی نیشتمانیی کوردستان،
کەسوکاری سەربەرزی شەهیدان، پێشمەرگە قارەمانەکان،
کۆمەڵانی خەڵکی کوردستان،
لە کاتێکدا کوردستان گیرۆدەی قەیرانی هەمەلایەنەی سیاسی و ئابووری و هەڕەشەی داعش و ئەگەرەکانی گۆڕانکاری ڕۆژهەڵات بۆتەوە، هاوڵاتیان بەدەست بێ مووچەیی و برسیکردن و باری گرانی ژیان و گوزەران دەناڵێنن، لەم کاتەدا و لە بری تەکبیر و هاوکاری بۆ چاکسازی و چارەسەری کێشەکان، یەکێتی لەسایەی گروپێکی پاوانکارەوە لەهێزی تیکۆشەری خاوەن بەرنامەی ئاوەدانی و دادپەروەری کراوەتە هێزێکی پەراوێزخراو و بێباک لەخواستی هاوڵاتیان، بێباک لەتێکۆشەرانی خۆی و هاوپەیمانێتیەکانی لەتاریکی و سەفقەی ژێربەژێر بۆ تاڵانی نەوت و هەڵوشینی سەروەت و سامانی خەڵک و برسیکردنیان ئەنجام دەدرێن. بۆ ڕایکردنی بەرژەوندیەکانی ئەم گروپە یەکێتی خویندنگەی جەنابی مامجەلال و بەهای وەرگرتنی بڕیاری سیاسی لەهیچ ئۆرگانێکیدا بەسەرکردایەتی و مەکتەبی سیاسیشەوە نەهێڵراوە.
تا ئێستا لەبەرحورمەتی جەنابی مامجەلال و کەسوکاری سەربەرزی شەهیدان و پێشمەرگە و ڕێکخستنە دێرینەکان، کەمئەندامانی سەنگەر و زیندانیانی سیاسی، خۆڕاگڕی هێزی پێشمەرگەی کوردستان، لەپەرۆشیمان بۆ ئایندەی یەکێتیی و ڕەچاوکردنی دۆخی سیاسی کوردستان بەگشتی، نەمانویستووە ناکۆکیەکان تەشەنە بکەن و هەوڵمانداوە بەهێمنی و دوور لەگرژی و دابڕان کاربکەین بۆ چارەسەری کێشەکان، بەڵام مەخابن لەدوای ئەم هەموو پشوودرێژی و خۆڕاگرتنە، سەرباری هەوڵی دۆستانی ناوخۆ و دەرەوەش، دەبینین هەتا دێت ئەم گروپە پاوانکارەی یەکێتی، ڕاستەوخۆ و ناڕاستەخۆ، بەشداری زیاتر دەکەن لەکۆمەڵێ سیاسەتی چەوت، بۆ بەتاڵانبردنی سامانی گشتی و بڕینی مووچەی فەرانبەران و هێزی پێشمەرگەی کوردستان، بە ئیزدواجیەتەوە هەوڵی چەواشەکردنی خەڵک و ڕای گشتی دەدەن، لەهەولێر بەشداری حکومەت و سیاسەت و "شیرینی" نەوت و بڕیارەکانن، لەسلێمانیش ناڕازی و ڕەخنەگڕن!
لەئاستی نێوخۆی حیزبیش هەتا دێت شیرازەی ئۆرگانەکان دەپچڕێ و پشێوی و بێسەروبەری و بێدادی و دەستەمۆکردنی کادیر و پەراوێزخستنی ئۆرگانەکانی یەکێتیی و پێشێلکردنی پەیڕەو و پیلانگێڕی بۆ تەزویرکرنی کۆنگرەو زەوتکردنی ئیرادەی ئەندامی ڕەسەنی یەکێتی فراوانتر دەبێ، و خزم و کەسوکاری خۆیان بێ ڕەچاوکردنی سروشت و شوناسی یەکێتی دەخزێننە ناو کایەی کاری حزبی و حکومڕانی و هەوڵی دەرپەراندنی کادیرە دڵسۆزەکان دەدەن. بۆ جێبەجێکردنی ئەو مەرامە چەوت و بەرژوەندخوازەشیان بەبێباکی ناوی مامجەلال و پێگەو ڕێزی ئەو بەکاردێنن.
سەرباری هەموو ئەمانەش، لەوەڵامی پشوودرێژی و هەوڵی بێ پسانەوەی ئێمەدا، گروپی پاوانکار لە ماوەی ڕابردوودا سەرکردایەتی و ئۆرگانی سێبەریان لەسەرجەم ناوچەکان دروستکردووە بۆ بەڕێوەبردن و ئاراستەکردنی یەکێتیی بۆ بەرژەوەندی خۆیان و پیلانگێڕی بۆ لەباربردنی ئیرادەی ئەندامانی ڕەسەن و پەراوێزخستنی پێگە شەرعیەکانی یەکێتیی.
بۆیە، ئێمەی پەیڕەوانی ڕێبازی مامجەلال، دڵسۆزانی یەکێتی، چیتر ناکرێ بێدەنگ بین لە پەیڕەوشکێنی و بنکۆڵکردنی حیزبی و پەراوێزخستنی یەکێتی لە ئاستی ناوچەکەو پەردەپۆشکردنی قەیرانەکانی، ناکرێ چیتر لێگەڕێین خەباتی 41 ساڵەی یەکێتی ئاوا بەدەستی ئەم گروپە دژ بەئاراستەی چەپکە گوڵەکەی مامجەلال بەرن و یەکێتی لەهێزێکی شۆڕشگێڕی داکۆکیکاری بەرژەوەندی خەڵکەوە بکەنە حیزبی بنەماڵە و بەشداربووی تاڵانی سامانی وڵات وبڕینی مووچەو نانی خەڵک.
ئێستاش ئێمە هەر لایەنگیری چارەسەرکردنی کۆی کێشەکانی یەکێتین بەئاڕاستەی بەرژەوەندی یەکڕیزی یەکێتی و خۆسازدانەوەی بەتێزی چەپکەگوڵەکەی جەنابی مامجەلال و کاراکردنی بڕیاڕی بوێر و دڵسۆزانەی یەکێتی بۆ چارەسەرکردنی کێشەی بژێوی خەڵک و دابینکردنی مووچە و ڕێگرتن لە بەتاڵانبردنی سامانی وڵات و ڕووبەڕووبوونەوەی گەندەڵی و پاوانکردنی بازاڕ، بۆ چارەسەری ڕاستەقینەی باری چەقبەستووی سیاسی هەرێم، بەکێشەی دەستوور و سەرۆکایەتی هەرێمیشەوە، بەڕێزگرتن لەدامەزراوە دیموکراسی و شەرعیەکان، و بەتایبەتیش پەرلەمانی کوردستان، هەر لێرەشەوە دوپاتی دەکەینەوە کەئێمە خۆمان لەهەڵەو کەموکورتیەکان بێبەریناکەین، بەڵکو هەر یەکەمان بەپێگەو کرداری خۆمان زۆر یان کەم پشکی بەرپرسیارێتی ئەم دۆخەمان لەسەرشانە و خۆمانی لی بەری ناکەین، بەلام لێرەدا مەبەستمانە تەکبیر لە ئێستا و ئایندە بکەین بە دامەزراندنی ناوەندی شەرعی بریاری یەکیتی و بەشداری کارا لە چارەسەرکردنی کیشەکانی خەلک.
لەپێناوی یەکێتی و پارێزگاری لە سەروەرییەکانی، و لە پەرۆشیمان بۆ پیشمەرگە و کەسوکاری سەربەرزی شەهیدان، و بۆ هاوکاری لە پێناوی چارەسەرکردنی کێشەکانی خەڵک، بریاڕمان دا ئەم ئەرکانەی خوارەوە جێبەجێ ئەکەین:
1. تا یەکلایی کردنەوەی کێشەکانی بەڕێوەبردنی یەکێتی، لەڕێگەی کۆنگرەیەکی شەرعی دوور لە تەزویر و دەستێوەردانی دەزگا ئەمنیەکان، ئێمە ناوەندی بڕیاری نێو یەکێتی ڕادەگەیەنین. بۆیە لێرە بەدواوە، هیچ بڕیاڕێک، چ لەناوخۆی حیزب یا بۆ دەرەوەی حیزب، بەبڕیاری گشتگیری یەکێتیی نازانرێت گەربێتوو بەئاگاداری و پەسەندکردنی ئەم ناوەندەی بڕیارەی یەکێتی نەبێت، بەپێچەوانەوە بۆ ناوخۆی یەکێتیی و دەرەوە و بۆ ڕای گشتی ناشەرعیبوونی ئەو بڕیارو سیاسەتانە ڕائەگەیەنین.
2. تا یەکخستنەوەی هێزی پێشمەرگە لەهێزی نیشتیمانی حکومەتی هەرێم، تەواوی هێزە چەکدارەکانی یەکێتی دەخرێنەوە سەر فەرماندەیی گشتی هێزی پێشمەرگەو لەلایەن ئەو فەرماندەییەوە سەرکردایەتی دەکرێن. لە سایەی خەبات و خۆڕاگری هێزی پێشمەرگەی کوردستان ئەمڕۆ کەرامەت و ئاسایشی گەلی کوردستان پارێزراوە، بۆیە ئەرکی سەرشانمانە بە هەموو توانامانەوە هاوکاری چاککردنی باری گوزەرانی هیزی پیشمەرگە بین.
3. زەمینەسازی بۆ کۆنگرەیەکی شەرعی و بێخەوش و دوور لە تەزویر، هەروەها ڕەتکردنەوەی ئەو بڕیاڕو ڕێوشوێنانەی کەبونەتە مایەی شێواندن و قۆرخکردنی ئۆرگانەکانی یەکێتی و دەستەمۆکردنی کادیر و پەراوێزخستنی تێکۆشەرانی ڕەسەنی یەکێتی، و بە ئامانجی سازدانی یەکێتی بۆ ئایندە و نویبوونەوەی و بەشدارپێکردنی کارای ژنان و لاوان لە ناوەندەکانی بڕیاڕ.
4. دارایی یەکێتی، لەهەرکوێیەک بێت لەدامەزراوەی شەرعی خۆی، کەمەکتەبی داراییە کۆدەکەینەوە بەشێوەیەکی شەفافانە لەپێناوی بەرژەوەندییە گشتیەکانی یەکێتی و ئۆرگانەکانی بە کاردەهێنرێت.
5. پابەندبوون بە جێبەجیکردنی ڕێکەوتنی نێوان یەکێتی و بزوتنەوەی گۆڕان و پەرەپێدانی ئەو ڕێکەوتنە بە کردار و بە ئاڕاستەی یەکخستنەوە و یەکگرتنەوە لەکەل هاوسەنگەرانی ڕابووردومان و سازدانی تواناکانمان بۆ چاکسازی و یەکخستنەوەی نێو ماڵی کورد.
6. ڕێکەوتنی یەکێتی و پارتی دیمکراتی کوردستان هۆکاری تێپەڕاندنی قۆناغی شەڕی ناوخۆ بوو، و هەوێنی دەستکەوتی گەورە بوو بۆ گەلی کوردستان. ئەمڕۆش بێگومان پەیوەندی نێوان یەکێتی و پارتی گرنگە و کاریگەری لەسەر ڕەوشی سیاسی و ئەمنی کوردستان هەیە. بۆیە لە پێناوی پاراستنی یەکڕیزی گەل و یەکبوونی حوکمڕانی کوردستان، لە پێناوی ئارامی و ئاسایشی گشتی، پیویستە پیاچوونەوە بەم پەیوەندیە بکەین بە ئاڕاستەی هاوسەنگی و دەربازبوون لە دۆخی چەقبەستووی ئێستای هەرێم و پێکهاتنی هێزە سەرەکیەکانی کوردستان.
7. حکومەتی هەریم ئێستا گیرۆدەی قەیران بە دووای قەیرانە، بۆیە پێویستە پێداچونەوەی بنەڕەتی بەپێکهاتە و سیاسەتەکانیدا بکرێت بکرێت بۆ چارەسەری کیشەی گوزەران و مووچەی خەڵک و گێڕانەوەی متمانەی هاولاتیان، و ڕەچاوکردنی شەفافیەتی ڕاستەقینە لەبواری داهات و خەرجیدا، بەتایبەتی لە بواری نەوت بەهەموو قۆناغەکانیەوە.
8. پابەندبوون بە مافی چارەی خۆنوسین و ڕێز گرتن لە بڕیاڕی گەل و بە ئاڕاستەی بە دیهینانی دەوڵەتی سەربەخۆی کوردستان دوور لە کێبڕکێی حزبی و سیاسی.
9. هەوڵی جیدی بۆ چارەسەری کێشەکان لەگەڵ بەغداو گێڕانەوەی ناوچەدابڕێنراوەکان و دورکەوتنەوە لەسیاسەتی دابەشکردنی کوردستان بەسەر ئەجێنداو بەرنامەی وڵاتانی ئیقلیمی و جیهانیدا.
لێرەشەوە ڕایدەگەیەنین کە لەم ناوەندەوە کار دەکەین لەگەڵ لایەن و کەسایەتیە سیاسیەکانی کوردستان بۆ بەدیهێنانی هاوپەیمانیەکی فراوان لە پێناوی دیموکراسی و دادپەروەری، و لە پێناوی برەودان بە بەرنامەیەکی چاکسازی هەمەلایەن بۆ چارەسەری بنەڕەتی قەیرانەکانی سیستمی سیاسی و حوکمڕانی و ئابووری هەرێم.
پەیاممان ئاڕاستەی ئەندام و جەماوەری دڵسۆزی یەکێتی و سەرجەم ئۆرگانەکانی، لە مەکتەب و مەڵبەند و دەزگاکانی یەکێتی، فراکسیونەکانی یەکیتی لە پەرلەمانی کوردستان و عیراق و ئەنجومەنی پارێزگاکان، کەسوکاری شەهیدان، کە دوور لە گرژی پشتیوانی دیمکراسی و ڕێکخڕاوەیی ئەم ناوەندە بکەن بۆ یەکێتی، بۆ بوژاندنەوەی یەکێتی، بۆ پارێزگاری چەپکەگوڵەکەی جەنابی مامجەلال، و چارەسەرکردنی قەیران و ئاریشەکان کەبونەتە مایەی بارگرانی بۆ سەر شانی ئێوەو تەواوی هاوڵاتیان. دووپاتی دەکەینەوە، ئەم کارو بەرنامەیەمان بۆ ناو یەکێتیە، لە پێناوی یەکێتیە بەرەو کۆنگرەیەکی شەرعی دوور لە تەزویر، کۆنگرەی نوێنەرایەتی یەکێتیە ڕەسەنەکان، پەیڕەوانی ڕێبازەکەی مامجەلال.
هاوڵاتیانی کوردستان،
لەپێناو چارەسەری بنەڕەتی قەیران و کێشەکانی ئێوە پشتیوانی ئەم هەنگاوەی ئێمە بکەن، ئێمە دڵنیاتان دەکەینەوە کەجگە لەبەرژوەندی ئێوەو قوتی ماڵ و منداڵ و گوزەران و کەرامەتی ئێوە هیچ مەبەست و ویستێکی ترمان نییە، کەبەهۆی سیاسەتی هەڵە و چەواشەکاری و پەردەپۆشی قەیران لەدوای قەیران، ئێوە نەک هەر لەئایندە، بەڵکو لەمووچەی مانگانەی خۆشتان دوو دڵن، لە سایەی ئەم سیاسەت و سیستمە حوکمڕانیە کەلەگەندەڵی و خراپەکاری بەرونی تێوەگڵاوە، نەک خەریکە دەرفەتەکان، بەڵکو دەسکەوتەکانی ئێستاشمان دەکەونە بەردەم مەترسی، بۆ کۆتایی هێنان بەم ناعەدالەتی و دڵەراوکێییە پشتیوانی بەرنامەو پڕۆژەی ئێمەبن.
ناوەندی بڕیاڕی یەکێتیی نیشتمانیی کوردستان
01-09-2016