بە داخ و کەسەرێکی زۆرەوە ڕادەگەیەنین کە ڕۆژی دووشەممە ڕێکەوتی 25ی ڕێبەندانی 1395ی کۆچیی هەتاوی، بەرانبەر به 13ی فێوریەی 2017ی زایینی، کاک #عەبدولڕەزا کەریمی# ناسراو بە کاک ئەبوو مامۆستای دێرینی قوتابخانەکانی شاری #مەریوان# و تێکۆشەری دێرینی ماندوونەناسی #حیزبی دێموکراتی کوردستان#ی ئێران، لە شاری هایدلبێرگی وڵاتی ئاڵمان بۆ هەمیشە ماڵئاوایی لە هاوسەنگەرانی کرد.
هاوکار و تێکۆشەری ماندوونەناس هاوڕێ کاک عەبدولڕەزا کەریمی ساڵی 1320 لە بنەماڵەیەکی ناسراوی #کرماشان# لەدایک بوو، خوێندنی سەرەتایی و دواناوەندی لەو شارە تەواو کرد و بۆ درێژەی خوێندن لە ئاستی زانکۆدا ڕۆیشتە شاری ئیسفەهان و لەوێ توانی بڕوانامەی لیسانس لە مێژوودا بەدەست بێنێت و دواتر لە شاری مەریوان سەرقاڵی وانە وتنەوە بوو.
سەرەتا تێکۆشانی لە ڕیزی ڕێکخراوی چریکە فیداییەکانی خەڵکی ئێران دەستپێکرد و پاش ئینشعاب لەو ڕێکخراوەیە، بەرپرسایەتی لقی کوردستانی بەشی ئەقەلییەتی ئەو ڕێکخراوەیەی وەئەستۆ گرت و هەر لەو کاتەشدا بۆ پەرەپێدانی هەستی نەتەوایەتی کورد دەوری بەرچاوی گێڕا. تا سەرئەنجام ساڵی 1361ی هەتاوی هاتە ڕیزی تێکۆشەرانی حیزبی دێموکراتی کوردستانی ئێران و لە ئاستی ئەندامەتی هەیئەتی ئیجرایی کۆمیتەی حیزب لە ناوچەکانی هەورامان و جوانڕۆ ئەرکی وەئەستۆ گرت و پاشان وەک یەکێک لە دامەزرێنەرانی کۆمیتەی حیزب لە داڵاهۆ دەوری بەرچاوی گێڕا.
بەهۆی ئەو کار و تێکۆشانە لێبڕاوانەیەی هاوڕێ عەبدولڕەزا کەریمی ساڵی 1379ی هەتاوی وەک ئەندامی ڕاوێژکاری کۆمیتەی ناوەندی هەڵبژێردرا. هاوڕێ عەبدولڕەزا کەریمی بەهۆی باری نالەباری جەستەیی، بە موافقەتی حیزب لە دەرەوەی وڵات و لە ئاڵمان درێژەی بە ژیان و تێکۆشانی دا و وەک نوێنەری پێوەندییەکانی حیزب و ڕاوێژکاری سکرتێری گشتی لە پێوەندی لەگەڵ کاروباری ئۆپۆزیسیونی ئێرانی درێژەی بە بەجێهێنانی ئەرکەکانی دا.
ئێمە مامۆستایانی کرماشان وێڕای هاودەردی لەگەڵ بنەماڵەی ناوبراو، خزم و کەسوکار و هاوسەنگەرانی لە حیزبی دێموکراتی کوردستانی ئێران و خەڵکی تێکۆشەری کرماشان لەو باوەڕداین تەنیا ڕێگای ڕزگاریی نەتەوەکەمان ڕووخاندنی ڕێژیمی ئیسلامیی ئێرانە.
کۆمەڵێک لە مامۆستایانی قوتابخانەکانی کرماشان
14-02-2017