سەرئەنجام دوای ماوەیەک لەهەڵمەتی بەخشینەوەی وادەو بەڵێنی بێسنوری درۆی حزبە بەشداربوەکانی نێو ئەم سیناریۆ گاڵتەجاڕیە، بە بایکۆتکردنی لەلایەن ڕێژەیەکی زۆری جەماوەر و به بەدەستهێنانەوەی زۆرینەی کورسیەکانی پەرلەمان بۆ جارێکی دیکە لەلایەن پارتی ویەکێتیە‌وه، هەڵبژاردن تەواو بوو.
بەڵام هێشتا کۆمیسیۆن هیچ ئەنجامێکی ڕەسمی ڕانەگەیاندووە، کەچی حزبە دۆڕاوەکانی ئەمڕۆ وناڕازیانی دوێنێ، ئەوانەی بە خەڵکیان دەوت بەشداری نەکردن کۆمەک بەمانەوەی دەسەڵاتی یەکێتی و پارتی دەکات، هاواری ئەوەیان لێ بەرزبۆتەوە کە ساختەکاری بێشومارکراوەو هەرەشەی کشانەوە لەپرۆسەی سیاسی و بەشداری نەکردن لەپەرلەمانی داهاتووی کوردستاندا دەکەن! ئەمە ئیتر سەلمێنەری ئه و ڕاستیەیە کەخەڵک و دەنگی خەڵک بەلای ئەم حزبانەوە تەنها وتەنها ئه و ئامرازەیە کەبەشی ئەوان لەدەسەلات وساماندا لەهەمان ئه و سیستەمەدا مسۆگەر بکات کەپارتی و یەکێتی دایانمەزراندووە، ئەگینا بۆ هەر کەسێک کە کەمێک هوشیاری هەبێت، ئەنجامی هەڵبژاردن لەپێشەوە ڕۆشن بوو.
ئەزمونی هەڵبژاردنە‌کانی تائیستای کوردستان ئەو ڕاستیەیان سەلماندووە کە دەنگدان وهەڵبژاردن لەسایەی دەسەڵاتی دووحزبی میلیشیایی و بنەماڵەییدا، نەک هەر ڕیگاو ئامرازیک نییه و نەبووە بۆ بەشداری سیاسی جەماوەر لەدیاریکردنی چارەنوسی کۆمەلگادا، بگرە هەمیشە شانۆگەریەکی گاڵتەجاڕی بووە بەدەست ئەم حزبانەوە وهەرکات خواستبێتیان بۆ شەرعیەت پێدان و جوانکردنی ڕوی دزێوی دەسەلاتەکەیان دەستیان بۆبردووە، لەئاکامیشدا وەک هەمووجارێک زۆرینەی دەنگەکانی ناوچەکانی ژێردەستی خۆیان بە هەر گزی و فزی و چاوترساندنێک بووه، بۆخۆیان بردوە. لەولاشەوە ئەمریکاو وڵاتانی کۆنەپەرستی ناوچەکه و ئەوروپاش وەک دەسەڵاتبەدەستی داسەپاوی زۆنەکانی زەردو سەوز پشتیوانیان لێکردون. بێگومان ئه و سیستەمەش لەدەسەڵات کەخۆی بەبەرپرسیاری بچوکترین ئاست لەژیان و بژێوی وخزمەتگوزاری هاوڵاتیان نازانێ، سیستەمێک کە گەندەڵی و تاڵانچێتی بەوپەڕی خۆی گەیاندوە وبازاڕی ستەم وچەوسانەوەی لەرادەبەدەری خەڵکی کرێکاررو زەحمەتکێشی لەبەردەم کۆمپانیا و سەرمایەدارانی ناوخۆ ودەرەکیدا گەرم کردووه، هەرلەم جۆرە دەسەڵاتە دەخوازێ.
بە‌لام ئەنجامی هەڵبژاردن هەرچیەک بێت، نه شانازی حزبە براوەکانی وەک پارتی و یەکیەتی، وە نەبەڵینی درۆیان، هیچکات دەنگی ناڕەزایەتی جەماوەر خامۆش ناک و جوڵانەوەی بەرینی ئەوان بۆ بەدەستهێنانی داخوازیەکانیان ڕاناگرێ، بەڵکو خەبات بۆ بەدەستهێنانی نان و موچە و خزمەتگوزاریەکان، وەک مەیدانێکی سەرەکی خەباتی چینایەتی کرێکاران و خەڵکی زەحمەتکێش لەبەرامبەر حزبەکان و دەستەی فەرمانڕەوادا بەهێزی خۆیەوە دەهێڵێتەوە وتوانای پەرەسەندنیش لە هەناوی خۆیدا هەڵدەگرێ. بەتایبەتی لە دۆخی ئێستای کوردستاندا که قەیرانی ئابووری ولێکترازان وکێشمەکێشی نیوخۆی حزبەکان و‌گێژاوێکی سیاسی که کۆمەڵگای بەهەلومەرجی سیاسی نادیاری عیراقەوە گرێداوەتەوە، نەک هەر ئه و توانایەی لەچینی بۆرژوازی کوردو حزبە دەسەڵاتدارەکان سەندووە کە بتوانن وەڵام بەکەمترین خواستی هاوڵاتیان بدەنەوە، بگرە توانای بەدیهێنانی یەکریزی خۆشیانی سەخت و دژوارکردووە. لەهەلومەرجێکی ئاواشدا کۆتایی هەڵبژاردن لەهەمانکاتدا دەرگای دەورەیەکی نوێ لە خەباتی چینایەتی وکێشمەکێشی نێوان جەماوەی ناڕازی و دەسەڵات دەخاته سەرپشت، کە بەناچاری مەسەلەی بەدەستهێنانی خواستەکان دەخاتە گرەوی خەباتکردن بۆ کۆتاییهێنان بەم دەسەڵاتەی ئێستا.
لەلایەکی تریشەوە پەیامی ڕۆشنی ئەمجارەی ئه و جەماوەرەی کەئەم گاڵتەجاڕیەیان بایکۆت کرد، هەر ئەوە نییە کەسورن لەسەر ناڕەزایەتیان دژ به دەسەڵاتی ئێستا، بەڵکو لەناوەڕۆکی خۆیدا بەزرکردنەوەی نا یەکی گەورەیە بەڕووی سەرتاپای سیستەمێکی حوکمڕانیدا. هەربۆیە کۆتایی هەڵبژاردن لەهەمانکاتدا هەلی خەباتی جەماوەری وشۆڕشگێرانە بۆ وەلانانی ئەم دەسەڵاتە گەندەڵ و تاڵانچییە دێنیتە پێشەوە. کەوایە ئەگەر دەورەی دوای هەڵبژاردن بۆ چینی بۆرژوازی و حزبەکانی، دەورەی خۆسازدانەوە ودابەشکردنی کورسیەکانی دەسەڵاتە لەبەرامبەر کرێکاران وخەڵکی هەژارو نەدارو ناڕازی کوردستاندا، ئەوا بۆ ئەوانیش نۆرەی هێنانەمەیدانی ڕیزی یەکگرتوو ڕێکخراو و ئامادەیە لەپێناو وەلانانی دەسەڵات و گرتنەدەستی چارەنوسی سیاسی کۆمەلگا. نۆرەی ڕەتکردنەوەی ئاسۆ سیاسەت و باوەرەکانی چینی دەسەڵاتدارو حزبەکانیەتی، نۆرەی هێنانەمەیدانی جوڵانەوەیەکی سیاسی سەربەخۆی چینایەتی و شۆڕشگێرانەیە کە لەپێناو ئازادی و یەکسانی و دامەزراندنی دەسەڵاتدارێتی جەماوەریدا، وەلانانی دەسەلاتی ئێستای کردۆتە ئامانج.
حزبی کۆمۆنیستی کرێکاریی کوردستان که لەڕیزی پێشەوەی ئەم خەباتەدا تێدەکۆشێ، بانگەوازی کرێکاران و لاوان و ژنان و خەڵکی ئازادیخواز دەکات، لەپێناو خۆئامادەکردن وجۆشدانی خەباتێکی لەم جۆره، لەدەوری ئەم حزبە کۆببنەوە.
حزبی کۆمۆنیستی کرێکاری کوردستان
#02-10-2018#