#سالار عەزیز# و عەرەبانچییەک
لە قۆناغی یەکی پەیمانگا بووم لەگەڵ چەند هاوڕێیەکما بەپێ گەڕاینەوە تا بچینە بازاڕ، تەبعەن بە پێ ڕۆیشتنمان بۆ ڕێجیم و وەرزش نەبوو، چونکە ئەو کاتە گرانی بوو لە خواییەوە هەموان پێست وئیسقان بووین، لەبەر بێ پارەیی، پێی خۆمان کردبوو بە پاس.
لای فولکەی حەسیب ساڵحەوە (کە ئێستا پێ دەڵێن #پاڵاس#)کابرایەکی ڕیش سپی و لەرزووک، هەستت دەکرد هەژاری لێدەبارێت.پاڵی بە عەرەبانەیەکەوە دەنا کە دوو فەردە ئاردی لەسەر بوو، توانای نەبوو پاڵی تەواو بە عەرەبانەکەوە بنێت.
لەپڕدا لە ناوەڕاستی شەقامەکە عەرەبانەکەی وەرگەڕا، هەر ئەوەندەی چاوتروکاندنێک سالار عەزیز کە پارێزگاری ئەو کاتەی سلێمانی بوو لە ئۆتۆمبێلەکەی دابەزی، ئێمە وامانزانی هاوکاری دەکات وعەرەبانەکە بۆ ئەو پیرە پیاوە ڕاستدەکاتەوە.
بەڵام بە پێچەوانەوە بەشەق و زلە بەربووە ئەو کابرا داماوە و ئەیقیژان بەسەریدا دەیووت :عەرەبانەکە و خۆت دەسوتێنم هەی ناپیاو، کابراش لەترس و لەماندوبووندا وەک منداڵ لەژێر دەستی ئەو پیاوەدا دەگریا، ئەمە دیمەنێکە قەت لەبیرم ناچێتەوە.کە سالار عەزیز دەبینم یەکسەر دیمەنی ئەو پیاوە پیرەم بیردەکەوێتەوە کە کەوتە بەردەستی ملازم موحسینێک بە زمانی کوردی لێیدەدا وجنێووی پێ دەدا.
#محەمەد نوری#
[1]