ئەڤرۆ، سەرجان مەحمود:
ڤەکۆلەرێ ناڤدارێ ئەمریکی د داخۆیانیەکی دا ڕاگەھاند کو ئەمریکا ئێدی ژ ھەردەمی زێدەتر دخوازیت کوردان ل ڕۆژھەلاتا ناڤین بکەتە ھەڤپەیمانێ خوە و پرۆژێ دەولەتا سەربخوە یا کوردستانێ ل باشور و ڕۆژئاڤا ل سەر مێزا سەرۆک و کۆنگریسا ئەمریکا دایە و ژ بەر وێ یەکێ ژی نھا گەلەک وەلاتێن ھەرێمێ دژبەریا کوردان دکەن.
نۆم چۆمسکی نڤیسەر و ڤەکۆلەرێ ناڤدارێ ئەمریکا ل سەر ڕەوشا ڕۆژھەلاتا ناڤین و ب تایبەت ڕەوشا کوردستانێ و قۆناغا ئاشتیا ل تورکیا و پاشەرۆژا کوردان و ستراتیژیا ئەمریکا و ئورۆپا ل سەر ڕۆژھەلاتا ناڤین داخۆیانیێن گرنگ دانە دەزگەھێن ڕاگەھاندنێ و دیار کر کو ئەز ب ڕەحەتی دبێژم ئەڤ نیڤ سەدسال یا کوردایە و ھەموو شەرت و مەرج بۆ ئاڤاکرنا دەولەتەکا سەربخوە یا کوردان گونجاییە.
ڤەکۆلەرێ ئەمریکی د دەستپێکێ دا ل سەر ڕەوشا سووریێ، عیراق و تورکیا و ھێرشێن داعشێ بۆ سەر کۆبانێ ڕاوەستیا و دیار کر کو ئالۆزیێن ل وان وەلاتان ئالۆزیێن گەلەک کورن و بنگەھێ خوە ژ ناکۆکیێن مەزھەبی وەردگرن و دو یان سێ ئالیێ ڤان ئالۆزیان ھەنە و گۆت: (یا یەکێ ل ژێر سیاسەتا مەزھەبا سوننە تورکیا، قەتەر و عەرەبستانا سعوودیی نە و ئالیێ دویێ یێ ئالۆزیان ئیران، سووریە و عیراقن و ئالیێ سیێ ژی باکور، باشور و ڕۆژئاڤا کوردستانێ نە و ئەمریکا و ھەڤپەیمانا نێڤدەولەتی ژی ل گەل کوردان بووینە پشکەک ژ ئالۆزیان و ل دووڤ ھزرا من ئێدی ئەمریکا و ئورۆپا ژ دل ڤە و ل دووڤ بەرنەمەکا دارێتی ل گەل کوردان جە دگرن و کورد ئێدی زێدەتر بووینە ھەڤپەیمانێ ئەمریکا و ئورۆپا و ئەڤ یەک د بەرژەوەندا کوردان دایە).
چۆمسکی ھەروەسا دیار ژی کر کو عیراق، سووریە، ئیران ل ئالیەکی و قەتەر، تورکیا و سعوودیە ل ئالیێ دی، د مەزنبوونا داعشێ دا خوەدان ڕۆلەکا مەزنن و ھەردو ئالیان ژی خوەستن داعشێ بۆ بەرژەوەندیێن خوە بکار بینن و گۆت: (رێکخستنا تیرۆرست یا ناڤھاتی د ناڤ خوە دا نە یەک خەتە و سێ ھێلێن خوە ھەنە، ھێلەکا وێ ل گەل ھەڤپەیمانا ئیرانێ، ھێلا دی یا وێ ل گەل تورکیا و ھەڤکارێن وێ و ھێلا دیتر ژی جیھادی نە و داعش کارتەکا مەزنە د دەستێ ھەردو ئالیان دا، لێ ئالیێ جیھادی یا د ناڤا داعشێ دا ڕۆژ ب ڕۆژ ب ھێزتر دبیت و ئەز باوەر دکەم د دەمەکی کورت دا جیھادی دێ ب تەمامی دەستھەلاتا خوە د ناڤا داعشێ دا بجە بکەن و ئەو یەک دێ ببیتە بنکەڤتنا ھەردو ئالیێن ڕۆژھەلاتا ناڤین ژی).
ل سەر ڕەوشا کۆبانێ و ھەموو کوردستانێ ژی ڤەکۆلەرێ ئەمریکی ڕاگەھاند کو ھێرشێن داعشێ بۆ سەر کۆبانێ و شەنگال و دەڤەرێن دی یێن کوردستانێ ب دەستپێشخەریا وان ھەردو ئالیان بوویە و گۆت: (سەدەمێ سەرەکی یا ھێرشێن داعشێ بۆ سەر کوردان ئاستەنگکرنا ڕاگەھاندنا دەولەتا کوردی ل باشور و ھەرێمەکا کوردی ل ڕۆژئاڤایێ کوردستانێ بوو و ژ ئالیەکی ئیران، سووریە و عیراقێ تیرۆرست ل دژی باشور بکار ئینان و وان دەست ب ھێرشێن درندانە ل کۆبانێ کرن و تورکیا و ھەڤکارێن وێ ژی داعش ل دژی کوردان کرنە د ناڤا ھێرشێن نە مرۆڤی دا و ھەردو ئالیان ژی دخواستن کو ب ڤی ڕەنگی ئیرادا کوردان تەسلیم بگرن لێ ب وان ھێرشان بنگەھێ ئێکەتیا نەتەوی یا کوردان دروست بوو و کورد دبنە یەک و ئەو یەک سەرکەڤتنا کوردان گەرەنتی دکەت).
چۆمسکی سەبارەت ب کوردستانێ و بزاڤێن یەککرنا ناڤمالا کوردی ژی ڕاگەھاند کو ڕۆلێ مەسعود بارزانی د یەکگرتنا کوردان ڕۆلەکی دیرۆکیە و ھەردەم ڕێزدار بارزانی ھەول دایە کو ئەمریکا و ھەڤپەیمانا نێڤدەولەتی ھاریکاریا باشور و ڕۆژئاڤایێ کوردستانێ بکەن و گۆت: (نھا ژ ھەر دەمی زێدەتر کورد نێزیکی ڕاگەھاندنا دەولەتا کوردی بووینە و سەرکەڤتنا وان د شەرێ داعشێ دا دێ پشتەڤانیا بۆ ڕاگەھاندنا دەولەتا کوردی ل جیھانێ ژی زێدەتر بکەت، ل ئالیێ دی ھندەک کەس دبێژن پارتا کارکەرێن کوردستانێ و پارتا ئێکەتیا دیمۆکراتیک ل دژی دەولەتا کوردی نە لێ یا ڕاست وەسا نینە و ھەردو پارتێن کوردی ژی وەک ھەرێما کوردستانێ دخوازن دەولەتا سەربخوە یا کوردان بھێتە ڕاگەھاندن و یا ڕاستی ژی ئەڤە کو کورد دەولەتا خوە ئاڤا بکەن).
د دووماھیا ئاخڤتنا خوە دا ژی چۆمسکی ڕاگەھاند کو ئەمریکا و ھەڤپەیمانیا نێڤدەولەتی ژ ھەر دەمی زێدەتر دخوازن بنگەھەکا بھێز یا کوردان ھەبیت و نە ل دژی ڕاگەھاندنا دەولەتا کوردی نە و ل دووڤ ھزرا من نھا ھەڤپەیمانێ ھەری مەزن یێ ئەمریکا و ئورۆپا کوردن و ئەڤ ھەڤپەیمانی د بەرژەوەندا ھەردو ئالیان دایە.[1]