داستانۊ حەیدەری و سنۊبەرۍ
بەشۍ پەنجاو نۊهەمە
دمای دژمانەکاش پەی قەزەنفەری، سنۊبەرە چڕیش ئەو حەیدەری، ئاما فریاشۆ، دەسشدا شمشېری و بە یەک دایوەنەی قەزەنفەرش کۊشت:
هەنوو بەرکېشا ئاهی ئاتەشناک
پەرێ حەیدەر بەگ، ئەو شېری بېباک
کېشا جە دەروون، هەناسانی سەرد
واتش: ئەی حەیدەر، چکۊنی نامەرد
مەردی جوانان، پەرێ سیرەتەن
چکۊنی نامەرد، وەقتی غیرەتەن
چکۊنی نامەرد، مەردیت بنمانە
نازارت جە دەست زاڵم بستانە
حەیدەر ئېڎ ئەژنی، جە ماهی پەروین
واتش: حازرم ئەی گېیانی شیرین
بۍ سەبر و ئارام، جە کۊی هەوشخانە
ئاما، بە ئەمداد، ئەو ماﮪ تابانە
دەس بەرد پەی شمشېر، شېری دلاوەر
دا، نە کەمەرگای، پەسی قەزەنفەر
کەردش بە دوو نیم، بە وېنەی خەیار
غەڵتان بی نە خاک، قەزەنفەر بە زار
حەیدەر وات پېش: ئەی گېیانی شیرین
پەی چی مەوارۊ، جە گۊنات ئەسرین
گېیانی قەزەنفەر، بە قوربانت بۊ
حەیدەر بەگ، سەرگەرد ناو مەمانت بۊ
غەمگین مەنیشە، قەزات، لە گېیانم
واڎەی غەم وېیەرد، سۊمای چەمانم
شوکور کە ئی جار، باڵات دیمەوە
مەردەبیم، جە نۊ، زیڼە بیمەوە
بەڵام ئەی نازار، سەوزەی کشمیری
وەسېن، وەس ، وېیەرد، واڎەی زویری
هۊرېزە وە پا، شەوگار درەنگەن
فرە نە ڕامان، ئاشووب و جەنگەن
هۊرېزە وە پا، ئەی ماهی تابان
وە هەر کۊ مەشوو، چەنیم، بە، ڕەوان
[1]