چېش جە بارەو هۆرامانیۆ نویسیان
ئەوەنویستەی و دەسکاریکەردەی: ئەسعەد ڕەشید
بەشۍ دوەمە

ماریفەتو پیرشالیاری: ئی بەرهەمە یۊن چا کتېبە دەسنویسە پیرۊزا کە جە دېرین زەمانۆ تۊمارکریان، چەرخاوچەرخ تازە کریانۆ و پاڕەوی ئایینیش چەنەکریان.
بەشی فرەو دلېنەو ئی کیېبەیە، نزاو لاڵیایۆ و سروودۍ دینیۍ و قسۍ قەڎییمیانۍ(واچۍ ژیری مادی = ژیللۍ مەرۍ)، جە بارەو جەنگو موسڵمانی و گاوری (زەردەشتی)، جە سەردەمو خەلیفەو دوەمو ئیسلامینە، جە ناوچەکاو شارەزووری و بنارو کەشەکا هۆرامانینە، چن بابەتێ بە نرخېشان چەنەنۍ، کە پاڵەوانی خەڵکو ناوچەکانو هۆرامانی نیشانە مڎۊ، چەولایچۆ زوڵم و زورو عەرەبی نیشانە مڎۊ چا ناوچەنە.
چن سەرچەمێ، پاسەش مڎا قەڵەم کە ئی بەرهەمە، پەی دەمو ئەشکانیەکا گېڵۊوە، کە خەلیفەو یەکەمو زەردەشتی(پیرشالیاری زەردەشتی) نویستەن، یان متەنشەرە، باعزێتەر پاسەش پەی ملا کە جە دەمو ساسانیەکانە ئی کتېبە پیرشالیارو زەردەشتی نویستەن.
بەهەرحاڵ، گرد یۊگیرېنۍ کە ئی بەرهەمە، پیێوە دینی زەردەشتی نویستەن، ک ئاڎییچ پیرشالیارو زەردەشتین.
گەر پاسەبۊ، مەشۊم دلېنەو ئی بەرهەمەیە پەی چن جارێ تازەکریابۊوە، هەر جارێچ بەلاو کەمیۆ، دەسکاری زوانو نویستەکەیش کریابۊ، کە چەنی وەخت و دەمەکەی گونجیۊ.
ماریفەتو پیرشالیاری، جە ساڵەکاو(842ک)، سەردەمو شېخ عەبدولقادری گەیلانینە بە دەسو کابرێوە بە نامۍ(مەڵڵا مسەفا کۊر)یۆ کەفەسەرو تېکەڵکریان بە باو و برەوەکا ئیسلامی، پەی ئانەی بە ئاسانی پا نامېوە تاوۊ، دینو ئیسلامی وەڵاکەرۊوە جە هۆرامانەنە،کە تا ئا دەمەیچە، هەڵای خەڵکو هۆرامانی زەردەشتیۍ بیېنۍ و دمای ئی تاریخیە ئیسلامش دلېنە وەڵابېیەنۆ.
شایانو باسین، چیلاو چۆلاوە نامۍ چن سەرچەمێ تەری ئامێنە، پەی نموونەی(تاریخو هۆرامانی)، (تاریخ جدید اورامان) و مەڵڵا عەبدوڵڵاو هۆرامی، (جاماسبنامە)و پیر جاماسبی ئاورامی و...هتد، بەڵام بە شېوەو بەیازە کۊن و دڕیایا، بۍ نامونیشانۍ، هەرچن تەقەللام کەردە، جە بېشانسی وېم، هیچم دەسنەکەوت، شایانو باسین نامۍ ئی سەرچەما کە چېگەنە تومارېما کەردۍ، وەڵتەر نویسەری بە نامبانگ ماموسا(مەردوخ)ی نویستېنۍ(تەماشەو تاریخو کرد کردستان- مردوخ)ی کەرە.[1]