جە دەوری یانەت مەکەران هۊڵە
پېشان کەرەم کەر جفتێ پار کۊڵە.
شېخ عەزیزی جانەوەری مەلۊ پەی دیڎەنی مەولەوی، ڕانە توشوو کابرێوە خووگ وەری قەڵخانی مەبۊ چەنی دوۍ ژەنا، مەپەرسۊشان وەنە پەی کۊی ملدۍ؟، کابرا ماچۊ: قوربان ئینۍ هەردوېشان ژەنۍ منەنۍ، یوەشا دواڼزە ساڵۍ و ئەوەشا پەنج ساڵېن ژەنیمەنۍ، هیچکام زارۊڵېشا نېیەنۍ، گەرەکمەن بەرووشا پەی سەرو مەرقەڎو مەڵڵا مسەفاو بېسارانی، بەڵکم خوڎا زارۊڵەشا دۊ پەنە.
شېخ عەزیزیچ سەرو پارچە کاغەزێوە دوۍ دېڕۍ شېعرەشا پەی منویسۊ، مڎۊش بە کابرای، پەنەش ماچۊ: بنیەش دلۍ گومەزەکەو شېخی.
بېساران ماوا، شېخی بەحر و بەڕ
ئاما وە یانەت، یەکانە و دوو دەڕ
جە دەوری یانەت مەکەران هۊڵە
پېشان کەرەم کەر، جفتێ پار کۊڵە.
سودفە، ساڵەی دمایېنە شېخ عەزیز ڕاش مەگنۊ یانەو کابرای، ژەنەکېش مشناساشۆ، هەر یوەشا کوڕێ ماران و منیاش باوشیش، ماچا: پار کە لوایمۍ سەرو مەرقەڎو شېخی و کاغەزەکەو تۊما ۋست دلۍ گومەزەکێش وگېڵایمێ، خوڎای گۆرە یۊ کوڕێش دایمۍ پەنە.[1]