ئاوی زېیاتەر وەختو تەژناینە، یان دمای نانی مەۋریۊوە، بەڵام دمای واردەی میوەی بە کەمی مەۋریۊوە، چوونکوم میوەکۍ فرېشا بڕێ فرە جە پېکئاماکەیشا ئاوینە، بەڵام ئانەیچ مەڵامەت نېیەن پەی ئانەی هەکە دمای واردەی میوەکا ئاوی نەوریۊوە، بڕێ جارۍ ڕەنگە کەسێ قومێ ئاوی یان چن قومێ وەرۊوە.
هۆرامیەکۍ وەختێ دمای میوەکا ئاویشا کەردېنۍ شۊنیرە، سەرنجەو تامو دەمیشا و تامو ئاوەکېشا دان، کە دمای هەر میوێ تامێ جېیاوازش هەن، پەی نموونەی دمای واردەی (بەیۍ) گەر قومێ ئاوی کەری شۊنیشەرە تامو ئاوەکۍ ملۊنە سەرو تامو (ماسو مەیۍ) ، ئینجا ئانەیچشا کەردەن بە شېعرەو واتېنەشاوە:
ئاوەو دمای هەناری، پېسەنە ژەهرو ماری
ئاوەو دماو ساۋۍ، پېسەنە ماسو گاوۍ
ئاوەو دماو بەیۍ، پېسەنە ماسو مەیۍ.[1]