فیلم نامە، سەناریۆ
ئی داستانمە پەی وەش کەردەی فیلمېوی کوڵی نویسەن. ئۆمێدم ئانەنە کە کارگەردانێو یا فیلم سازێوی هەرەقەتین پەیدابۊ، بەشکەم کریۆ بە فیلمېوی کوڵ.
کارتن خواب:
ئەمیرئاغا ساحێبوو یۊ جە فرووشگاە گۆرەکاو شاری بێ. ئی فرووشگاە یاگێ ورەتەو موبڵ و سەندەلی و تەختێ وتەی و ئا جۊرە کەل و پەلا بێ.
پانایی دلێ فرووشگاکەی ئاندە گۆرە بۍ کە نزیکوو 20 تاکو 25 دانێ تەختێ وتەی، یەک نەفەریێ و دوە نەفەریێش چەنە ڕا بینێوە.
ئەمیر ئاغا بەپاو عادەتیش هەرچی سەحبانە بۍ وەڵێ ئامای شاگردەکاش، وېش ئێ و بەرەو دووکانەکەیش کەرۍوە.
سەحبانېو کوچېو زووتەر جە وەختەکەو وېش یاوا سەرو کاری. بەرەکەش کەردۆ و لوا دلێ. دەسش بەرد تاکو لارموو فرووشگاکەی کە وەسڵ بۍ بە لارمی مەرکەزی شاریۆ، لابەرۆ. دیش دیسانۆ شاگردەکېش وېرەگا وەختێو بەرەکەشا قفڵ کەردەن، ویرشا شیەن لارمەکەی داوەنە. کوچېوبۊڵەبۆڵش کەرد و یەک ڕاس لوا ڕوەو دەفتەرەو هەرمانەکۍیش.
وەڵێ ئانەیەنە بېیاوۆ لا دەفتەرەکەی، ملېوش گېڵنا گردو فرووشگاکەیەرە. جە پڕێوەنە سەرنجش لوا سەرو چېوێوی چەمەڕا نەکریای. وەختێو نزیک کۆتۆ، مدیۆ کوڕلێوی 8 تاکو 9 ساڵە سەرو کارتۆنێویۊ باڵش نیانش چیروو سەرەیش و وەرمېوی قووڵش کۆتەن پۊرە.
کوڕلەکە دەسېو جلێ شڕېش پۊرە بێنێ و سەرو ڕوومەتیش سیاو بیەبێ. هیتێو سەرپایێ نیمە دڕیێ لا پەیاشەنە نریێبێنېرە. سەرو قاچاش چن دانێ زەخمێ کۆنێ و تازێشا پۆوە دیارێ بێنێ. ئۆ ئانەیە شێ ماوێوی درێژ بۍ حمامش نەکەردەبۍ.
ئەمیر ئاغا بە دیەی ئا دیمەنیە یاگێ وېشەنە وشک بی. فرەتەر وەروو ئانەیە بۍ کە ئی کوڕە چەنی جە بەرە گۆرەکەو ئی فرووشگایەنە ئامان ئی دیم و سەرو ئی گرد تەخت و قەرەوێڵەیەنە پەی چیشی سەرو کارتۆنێوێ ڕەق و تەقیوە وتەن.
سەعات بی بە هەشتوو سەحبی، شاگرد و کارمەندەکێ فرووشگاکەی کە شش نەفەرێ بێنێ، یۊ شۆنەو یۆیەرە، ئامێ چوەر. بە دیەی ئەمیر ئاغای لا ئا کوڕیەنە و سەرو ئا مقەبێوە، سەرسامێ بیێ و نەزانێنێ چېش بېیەن و چېش قۆمیان.
وەڵێ ئانەیە دەم کەراوە و قسێ کەرا، ئەمیر ئاغا هەر دوورۆ ئیشارۍوش وەنە کەردێ تاکو گرد بلا ڕوەو دەفتەرەکەیش. وێچش چا وەختەنە لوا ڕوەشاوە و گردش دلێ دەفتەرەکەیشەنە کۊ کەردېوە.
جەمەکێ گرد چا دیمەنیە و چا وەزعێ کە ئەمیر ئاغاش چەنە بێ، وڕێ و وشکێ بیێ. ئەمیر ئاغایچ بێجگەم سەرسامیەکەیش تووڕەیچ دیار بێ. ڕوەش کەردە جەمەکێ و پەرساش و واتش:
هیزی وېرەگا کام یۊ جە شمە بەرەو دووکانیش بەستەن؟!
یۆ جە شاگردەکاش کە نامۍش شارام بێ، ئاماوە جواب و واتش: قوربان من
_ ئەی چی لارمت نەدان وەنە؟!
_وەڵا قوربان عەفوەم کەرە ویرم شی!
_ دەی خۊ ئەر گردو دووکانەکەیچشا ماڵێرە هەر واچینی، قوربان ویرم شی!
یوە جە کارمەندەکا کە ژەنېوە بۍ و نامۍش سەمیرە بێ، ئاماوە جواب و واتش:
ئەمیر ئاغا ئیسە وەختوو مەحکەمەی نیا، دڵما تەقا! واچەما پەنە ئی کوڕلە کێن و چا سەرو مقەبایاوە چېشش وەنە قۆمیان و چی وتەن!؟
ئەمیر ئاغا دیا پەی سەمیرەی و کلکەش وسە وەروو دەمیش تاکو پەنەش واچۆ یەواش قسێ کەرۊ. جە جوابەکەشەنە واتش:
دەی پەرسەو منیچ هەر ئانێنە جە شمە!
سەمیرە وەختێو ڕواڵەتوو ئەمیر ئاغایش پا جۊرە دی، واتش:
دەی خاسا ئەمیر ئاغا، ئانا کامێرەکێ هەنێ، هەم متاومۍ کامێراو بەری تەماشە کەرمۍ و هەمیچ دلێ فرووشگاکەی. سەمیرە تەلەوزیۆنەکەش بە پەلە گیسنانە و ئەوەڵ جار لوا سوراخەو کامێرەکا دلێ فرووشگاکەی. فیلمەکەش گېڵناوە پەی شەوەی ۋېیەردێ. دیمەنێو بەر کۆت کە جە لێوۆ گردش سەرسامێ کەردێ و جە لێوتەریچۆ گرد جارێوەنە دەسشا کەرد خوای.
دلێ فیلمەکەیەنە دیشا، وەختێو شەوە مێ و فرووشگاکە چۆڵبۊ، کوڕلەکە چېروو یۊ جە تەختەکانە مێ بەر و چەنی وېش قسێ کەرۊ. سەرو ئی تەختیۆ پڕۆرە وار و ملۆ سەرو یۆتەری. بە باز دای و قونە قون کەردەی، فرەو جە تەختەکا تاقی کەرۊوە.
دلێ فیلمەکەیەنە، کوڕەکە ئاندە شۆقی گرتەنەرە کە مەزانۆ وەخت کەیا و درێژە مدۆ بە گەمە کەردەکیش. سەمیرە ئیتر مجبوورەبۊ فیلمەکەی سەرێع کەرۊوە، تاکو مېیاوۆ یاگێو کوڕەکە ئیتر جە پێ گنۆ و ملۆ سەرو تەختێوی تاکو بووسۆ. وەختێو درێژ کیشیۆرە، چن جارێ ئی دیم و ئۆ دیمێ کەرۊ. ئاخرش هۊرزۊوە و چن تەختێ تەرێ تاقیێ کەرۊوە. سەرو هەرکامیشا ملۆ، وەرمش مەگنۆ پۊرە.
فیلمەکە مېیاوۆ یاگێو کە گرد واقێ بېیېنۍ پۊرەشەرە و ماتشا کەردەن تاکو بزانا کوڕەکە ئاقیبەت چېش کەرۊ و چېشش پەنە مێ. ئا یاگێ کە دڵوو گردی تەزنۆ، ئاگەنە کە کوڕەکە سەرو ئاخرین تەختەکەیۆ کە کیشېیانەرە، بۍ تاقەتبۊ و چەمۍ گېڵنۆ گردو فرووشگاکەیەرە و پاسە بەر گنۆ کە شۆنەو چېوێویەرە گېڵۆ. جە پڕێوەنە سەرو تەختەکەیۆ مقەبێوە کەرۊوە چەم. وەزۊرە و هەر چاگە سەرو مقەباکێوە کیشیۆرە. بۍ ئانەیە هیچ ئی دیم و ئۆ دیم کەرۊ، دەسېوش منیۊ چیروو سەرەیش و وەرمش گنۆ پۊرە.
سەمیرە هەلسی میا دلێ چەماش و تەماشێو ئەمیر ئاغای کەرۊ و ماچۊ: من ئی کوڕمە چن ڕوێ چېوەڵتەر وەروو ئی فرووشگایەنە دیەن. تەنانەت داواو مەقەبایاش وەنە کەردا، گۊشم نەدا پەنە و ئەجیام مقەباکېش تەنیا پەی گەمە کەردەی گەرەکېنۍ.
ئەمیر ئاغا بە دەنگېوی نزم و گیریاوە واتش:
ئادەی سەمیرە خانم کامێرەکەو وەروو بەرەی کەرۊ و فیلمەکەیش گېڵنۆ پەی هیزی.
سەمیرە فیلمەکەی گېڵنۆوە، دیسان دیمەنێوتەر جە فیلمەکەی گردی سەرسامێ کەرۊوە. ئی جارە کوڕەکە جە بەروو فرووشگاکەیۆ سەرەش نیان سەرو شیشێ بەرەکەیۆ و هەر دوە دەسێش نیێنێ ئی لا و ۆلا سەرەیش و بە حەسرەتێوۆ تەماشەو دلێ فرووشگاکەی کەرۊ.
ئەمیر ئاغا وەختێو ئا دیمەنیە وینۆ، بە سەمیرەی ماچۊ: ئادەی ئیسە کامێرەو بەشوو دلێچ، دیسان کەرۊ و فیلموو دماو ئا سەعاتیە کە کوڕەکە بەرۆ بېیەن، بارەش وەرۆ.
سەمیرە وەختێو فیلمەکەی کەرۊوە، مدیا کوڕەکە پەشتەو شیشێ بەرەو فرووشگاکەیەنە واق بېیەن و دلێ فرووشگاکەی تەماشا کەرۊ. کوچېو سەرەش گېڵنۆ پیلاو پۆلارە و چا وەختەنە کە خەڵکی فرە مێ دلێ، ویش وزۆ چەنی خەڵکەکەی و پەی ئانەیە نەویناش، بە پەلە وېش کەرۊ چیروو یۊ جە تەختەکارە.
بە دیەی ئی دیمەنیە گردو جەمەکێ، داستانەکەی مېیاوانە و پەرۍشانێ با. چا وەختەنە ئەمیر ئاغا پەشتەو شیشێ دەفتەرەکەیشەنە چەمۍو وزۆ پەی یاگێ کوڕەکەی و سەرو مقەباکێ، مدیۆ کوڕەکە چاگە نەمەنەن. بە پەلە مزیۊرە و چۆدەسو خیابانەکەیۆ کوڕەکەی وینۆ کە مقەباکېش دێنە چیروو باڵیش و مڕەمای مڕەمۊ.
گېڵۆوە و بە چەمۍ تەڕېوە بە جەمەکێ ماچۊ:
دنیاو گولانەو ئا کوڕلەیە تەنیا مقەبێوەنە. گرد ڕوێو مەجبوورا ڕۊنە یاگێوۆ گیرش بارۆ، تاکو شەوۍنە سەرشۆ بووسۆ. ئاد نە پەی دزی ئامابێ دلێ ئی فرووشگایە و نە پەی زەرەردای جە فرووشگاکەی، بەڵکوو ئارەزووش ئانە بۍ تەنیا پەی یەک جاری، وتەی سەرو تەختی تاقی کەرۊوە. ئانا گردیما بە چما وېما دیما کە ئی کوڕە سەرو هیچ کام چی تەختە گراناوە وەرمش نەکۆت پۊرە، تاکو نەلاوە سەرو مقەبا ڕەق و تەقکێ وېش.
دەی فەڵەک یانەت وېرانبۊ، ئا کوڕە چا وەختۆ ئاوەزش کەردەنۆ تاکو ئیسە، سەرو مقەبایاوە مووسۊ.
ڕەزا بەهمەنی.[1]