هامنوو خیاڵی
قاقوو نیمەرۆی دابېشەرە، سەرو توختانوو هەسارەکێ وەروو کێڵەکەیمانە، لام ئاسەبێرە و چۆرتا زۊر پەی ئاردەبێنێ. چن ڕوێو بۍ گەرماو مێوە ڕەسانوو هامنی ڕوەش نیێبێ ئا چەم و دۆڵیە.
دماو چن ساتێوی چۆرتە کۊڵەکێ، بیێ بە وەرمېوی یەک سەعاتە. وەختێو هایم بیۆ، سەیەکێم تۆریێ بۍ و کۆتەبێنێ وەرەتاو. ڕوەم ئاندە داخە بیێبێ خەپلێ برێژێ.
تەنێوەم کېشاوە و هۆرساوە سەرو پەیا. گەرماکەی زۊر پەی ئاردە بێنێ و قەرارم وەنە بڕیا بێ.
بێ ئانەیە ویرێ کەروۆ، جمانېرە ڕوەو مڵکوو یانەو مامۊ ساڵەیم کە کۆتەبێ لای سەرینوو مڵکوو ئێمۆ. کۆگاکېشا دیێنە دلێ هەسارېوێ کە هانېوی گولانە پەشتیشۆ بێ. ئاوەو هانەکەی چیروو پووینە و بەرگەمېوی فرەینە ڕەدە بۍ و بە پلوورېوە تۆکڵە چنارینە پڕێرە دلێ هەسارەکێ.
چڵێو وەزی کۆنە ساڵە پەشتەو هەسارەکێنە بۍ و لەق و پۆکەش سەرو هەسارەکېش پۆژنابێرە. توختانێوی نما کەردەی نزیکوو پلوورەکێنە مەرزیابێرە کە مامۊ ساڵەم بە وەخت و ناوەخت سەرشۆ نما کەرۍ. بێجگەم مامۆیم جار جاریچ مامۆژەنیم و نەرمینەی مامۆزێم چاگە وینێنێ کە خەریکێ جل شتەی بێنێ.
ئا ڕوە وێچم نەزانێنێ پەی چیشی ڕوەم نیێنە ڕوەو ئاگەیە، گاهەز پاسە زانێنێ سەرو ئا هەسارێ جە هەسارەکێ وېما فێنکتەرەنە.
هەڵای دلێ چنارەکا ئیدەسو هەسارەکێوە بێنێ، دەنگە دەنگېوی فرەم واروو کۆگاکێ یانەو مامۆیمۆ ئەژنەوی. کوچېو گۊشێم ژیرێم کەردێ، دەنگە دەنگەکە پەیم نەژناسیا بێ. گوشم نەدا پەنە و کوچە کوچەی نزیکوو هەسارەکێ کۆتاوە.
هەر دوورۆ نەرمینەی مامۆزام سەرو توختانەکەو هەسارەکێوە دیە. تەشتێو جلێ وەروو دەسیشەنە بێنێ و بە گلارکوێوی قایم کۆتێبێنە گېیانشا.
ئینە ئەوەڵ جار بۍ کە نەرمینێ بە جلێ سەرتا پا سېیاوېوە وینێنێ، لامۆ کوچېو سەمەرە بێ، تەنانەت سەرپۊشەکەیچش سیاو بێ.
چەنی نەرمینێ فرە بەینما وەش بێ، چوون بە زارۆڵەیی پێوەرە گۆرێ بیێبێنمێ و پېسە واڵە و برایما پەنە ئامابێ و هیچ چېوێو جە یەکترینی نەشارۍنمێوە.
چا فرسەتە کوڵەنە تاکو نزیکوو هەسارەکێ بېیاوە، قەرارم دا ئیسە ئیتر وەختێوی گونجیان جوابوو داوا کاریەکەو نەرمینێ دەوۆ. نەرمینە مانگێو چاوەڵتەر هیجبی کەرش ئامابێ و داواش وەنە کەردا تاکو کوچېو جە بارەو ئا کوڕیۊ کە ئامابێ هیجبیش قسێش پەی کەروو.
کوچېوتەر نزیکوو هەسارەکێ کۆتاوە، سەرەم سڕ مەنێ نەرمینە چی سەرە بەرز مەکەرۊوە ئەحواڵ پەرسیم چەنە کەرۊ. خۊ پاسە بزانوو وەڵتەر دیاش چۆدەسشۆ بێنێ. زانێنێ خشەو پەیام مېیاوۆ گۊشێش، ویرێم کەردێ گاهەز تەقە و زرمەو گلارکۊکەو دەسیش نازۆ خشە خشوو پەیام بژنەوۆ.
جە پڕێوەنە لاش کەردۆ وەنەم، شۆقوو دیدەیش پېسە تیرێوێ دانېش وەنە و وشکش کەردا. مەزانۇو چی پاسمە پەنە ئاما!! یەرێ تاکو چوار چرکێ زیاتەرش نەبەرد لاش کەردۆ پۆلارە. پا چوار چرکەیە بەشێوی فرەو دیمەنیش وەرم کەرد. بە جم و جۆڵشەرە زانام کە حەز مەکەرۊ زیاتەر چانەیە نزیکەش گنوۆ.
پاسە هەس کەرېنێ کە بۍ ئانەیە تەماشەم کەرۊ وینۆم! گلارکۊکەو دەسیش کە چوێوە قایێمە بێ، فڕەش دا و جلە نیمە شۆریاکېش نیێنە تەشتەکەو وەروو دەسیش. پەی ئانەیە بە پلوورەو هەسارەکێ ئاویشا کېشۆ، مەجبوورە بیە کوچېوتەر نزیکەو من گنۆوە.
چا فرسەتەنە تاوام خاس تەماشەو سەر و سیمایش کەروو. شۆقوو دیدەیش دلێ سیاوی چەماشەنە سەرنج کېش بێ. وەختێو سەرە نامنېرە سەرو تەشتوو جلەکارە، برژانگە سیاوە فرەکېش وەروو چەماش پۆژنێنېرە. سەرو زنجیش خاڵێوە سۊزە نەخشیێبێ و تاکو سەرو لچی وارینیش ئامێبێ. لووتەوانێوی نوقرەیی لووتەشەنە بۍ کە چەنی ملەوانەکێ ملیش یۊ گېرێنێوە. سەرپۊشێوی سیاوەش بینابێ سەرەشەرە کە بەشێو جە قژەکاش سەرو سەەرەیشۆ پۆژیێبێنېرە و ئۆ بەشەکەیتەریچشا مجیێبێنېرە وار سەرو شاناشەرە.
هەرپاسە وشک بیەبێنێ و تەماشەش کەرۍنێ، خاس زانێنێ کە پەلەشا و حەز پا دیدارە ناوەختەیە مەکەرۊ. چا چن دەیێقەنە کە جلەکاش ئاوی کېشێ، تەنیا یەک جاریچ سەرەش بەرز نەکەردۆ تەماشەم کەرۊ. ئاخر جارێو کە چەمێوش پەی وسا، چا وەختەنە بۍ کە تەشتوو جلەکاش هۊر گېرت و نیاش سەرو سەرەیشۆ. پەشتیش کەرداوە وەنە و بە پەلە تەڵانەکێنە لابلایە بیۆ و وەروو چەمامۆ نەمەنە.
دماو لواکەیش ئیحساسێوی عەجیبم پەی ئاما، شۆنەو ئانەیەرە گېڵێنێ تاکو بزانوو چا چن دەیێقەنە چ سەهوێوەم کەردێنە، چوونکە دیایەکەو ئاخر جاریش وەختێو تەشتەکەش هۆرگرت، پەڕ بۍ جە هەڕەشێ و سەرکەشی و متمانە بە وێ.
هەرپاسە کە مەنەبېنېرە، دماو لوای ئاڎۍ ئامانێ وېمەرە و ڕوەم نېیا ئۆ کۆگاکێ یانەو مامۆیم. مامۆژەنیم چیروو کەپرەکێنە وتێبێ. جە کەپرەکێ ڕەد بېیا و چۆلاتەرۆ مامۆم دیم سەرو بانو کێڵەکەیشاوە ئامارە وار. پا گەرماو نیمەڕۆیەنە فەرەنجێوش کەردەبۍنە و هیتێو چېرپانتۊڵۍ چەرمێش پۊرە بێنێ و کەم و وێچنێو دەسشۆ بێ.
ئاما ڕوەمۆ و واتش:
ئابۊ کەمال گېیانوو مامۆیش ئادەی ئا کەم و وێچنیە بەرە، ماچا قەڕەچیێ ئامێنێ و جە دەشتەکێ مڵکوو یانەو لالۊ باسامیەنە بارشا وسەن. بەنوو ئی کەم و وێچنیە مڵا واردەن. ئانا ئی دوە تمەنەیچشا دە پەنە و هۊشت نەشۆ چاگە بنیشە تاکو بەنەکەشا چناوە و چەنی وېت بارەشاوە.
کەم و وێچنەکەم دەسو مامۆیمۆ ئەسا و بۍ ئانەیە ویر کەروۆ خیاڵېم لوێ پەی سەرو هەسارەکێ.
ڕەزا بەهمەنی.[1]