وەشتا بۊ یام تشتا بۊ، هەر ئانەن
وەشی و تشی دوۍ تامۍ جیاوازېنۍ، هەمیشە وەراوەر مدران، وەشی یام شیرینی دلۍ واردەینە گرڎ کەس لاشۆ وەش هەن، بەڵام تشی یام تاڵی پاسە نېیەن، فرەو خەڵکی حەزشان چەنەشان نېیەن.
بېجگە واردەی، دلۍ فرەو بەرکۆتەکانە وەشی و تشی هەن، پەی نموونەی هەواڵی وەش، قسۍ وەشە، گوفتاری شیرین، دەر و دەشتی وەش، پېچەوانەکەش ماچان کابرێوە ڕوو تاڵا، ئڼە تشا قووت نمەدریۊ، کابرا قسېش فرە تاڵېنۍ، یانی پەی سیفەتە مەعنەویەکا بەکارمێ.
وەختێ دوۍ کەسۍ مەگنا مامەڵە، فرە سەرش ملان، یۊشا پەویشا ماچۊ: بزام هەر ئانەنە، وەشت بۊ یام تشت بۊ.
یام کەسێ گلەیۍ جە بارو ژیوایش، یام بارو وەزعەو میللەتی کەرۊن، ماچۊ ئینە کەی حاڵ و گوزەرانەن، ئینە کەی وەزعەنە، ڕەفېقەکەش پەنەش ماچۊ ئیتر ئەچامنەن، وەشت بۊ، تشت بۊ هەر ئانەن.[1]