سیاو ڕێحانە دلۍ ترازیەو هۆرسەنگنای (نەقدی ئاگا) یەنە
بەشۍ: چوارەمە
هەوزار و کارو ڕۆمان نویسی:
داستان، بەیانو ڕوداوێویا کە کۆمەڵێو چێوێ بنەڕەتیێ،پێسە کەسایەتی یەکا، زوانی، مەناخی، مژار وبابەتی وئیجۆرەچێوا، دلێشەنە نەک تەنیا بیەیشا هەن؛ بەڵکوم کاریگەریچشا هەن و داراو نەخشی بنەڕەتی یەنێ.
ڕۆمان نویس بڕێ کەسایەتیێ جە کۆمەڵگانە هۆرچنۆ و، یاگێوەپەی هەرکامی جە دلێ ئا کۆمەڵگایەنە دیاریە کەرۆ. دماتەر جە نەتیجەو دەرگیری و کێشمە کێشا ئا کەسایەتیا چەنی یەکتری روەداوەکێ ڕۆمانەکەی وەشێ با. جە دەسپەنە کەردەی داستانەکەیەو تا دما ئامایش، نویسیاری هۆش و گۆشش ئینا لاو ئی چوار چۆ داستانیشەۆ کە ئینێنێ:
کەسایەتیێ: ئا کەسێنی کەهەرکام بە جۆرێ دەرگیرێ کارو نەخشو وێشانێ.
ڕاگاو وپاگاوداستانی : داستان چ بارێوەرە ڕا گێرۆنەوەر و، ڕوە کۆگەی منیۆ.
مەکانێ و،جۆگرافی داستانی: چوار چۆی مەکانی و جۆگرافیایی داستانی، کۆگەی گێرۆوە؛ چکۆ ئافرێنیۆ و،چکۆ کوشیۆرە.
ڕوداوەکێ و تەرتێبشا : ڕوەداوەکێ چەنی تەرتیب کریا کە نەزموو تەرتیبێوی مەنتێقیشا پەۆوە دیار بۆ.
نیشانە ئەرەنیای:
بەش بەشکەردەی(پەرەگرافبەندی)، بەکار ئاوردەی نیشانەکاو نویستەی هەرکام جە یاگێ وێشانە تا ڕادێوی فرە، کارو وانەریشا ئاسانتەرکەردەن؛ تا ئایاگێ کە وانەری تەنانەت کەم وان و بنویسیچ، مارۆرە سەرو هازێ کە جە واناکەیش دەس نەکێشۆ تا بیاوۆ مە خسەدێوی دڵوازو وێش، یانێ ئاکامێوی هۆنەرمەندانە و، باوو ڕۆی.
چوارچەم، وردۆ بیەی:
کاک ڕەزای بەهمەنی و کاک مۆقەدەمی ئی خاڵێشا بە شێوێوی پەسەند، بە گا ئاوردێنێ . نویسیار،کەسایەتیەکاو داستان و،سیاوڕێحانەی، تەنانەت پەی نەفەس کێشێویچ لاشەخەرێ نمەکەرۆ؛ هە رهەنگامێوە مەنیان ئیناشا چنی و،جە گردو باس و باتورەکاشانە و، قەرارو مەدارەکاشانە، بەشدارا. دیارا،جیا ئاستەی یۆ جە کەسایەتیەکاش،بێ شۆن و قوڵاخ ،چندجارێ رستێ و،واژێ دووپات و سێ پات ئەوەکریای و...، وە چند کەمو کۆڕێێ تەرێ کە کریێ نەبا، گنا وەرو چەما کە بە لایەنێ نەرێنیێ مژمێریان.
کەیۆمەرس نیک ڕەفتار.[1]