ژیوگاو مەریوانی و ئاواییەکاش ڕوەو بارێ ئاڵۊز ملۊ
نویستەی: #هۆرامان ڕۊستەمی#
جەماوەروو وەشەوېسو مەریوان و هۆرامانی سەربەرزی
چالاکە مەدەنیەکا و ژیوگا پارێزنەرە وەشەویسەکا
ژیوگاو مەریوانی و ئاوایەکاو دەور و پەشتیش خەریکا ڕوو بە وەزعێوە ئاڵۆزە ملۆ و بېیەن گۆڕەپانېو پەی کاسپی و بازەرگانی چن کەسېوی نەیاری و بە هۆ دار بڕیەی و خەڵووز کەردەی و کیاستەی دارە نەرەکا پەی بەروو شارەسانوو مەریوانی تاڵانێوی یەکجار بێسنوورشا مەرزنانەرە سەرو سروەت و سامانوو ئی خەڵکیە.ڕۆی ڕۊشنەنە خەریکوو دزی و جەنایەتیەنێ.
دارستان پېسەو یانە و ژیوگاو سەرەکی ئېمە پەی هەوای و سڵامەتی و ....خەریکا بە دەسو ئی تاڵانچیا جە بەین ملۆ. و چن دەسێ نامۆی ئینای پەشتەو ئی کاولکاریەنە کە مشیۊم جەماوەری وەشەویس و ڕېکوزیا فەرهەنگیەکێ و چالاکە مەدەنیەکێ و ژیوگا پارێزنەکێ ئاگادارێ ئی ڕۊتیە با و بە هەر شێوێو کە پەنەشا کریۆ وەرگیری چی هەرمانە ناشیرینێ و نا مەدەنیانێ کەرا و ئێجازه نەڎا چن کەسێ خاوارێ و بە دەسو چن ناکەسە وېمانا ئی سامانە هەزاران ساڵیەی کە ویەریناو ئېمە پارێزناینە، پی ئاسۇڎەیە تاڵان کریۆ.
هەرپاسە بڕېو کەشاوەرزێ وېمانێ و بە بەهانێ ئەرەنیای باغ و مڵکی بەشێوی گەورە جە دارستانوو مەریوانیشا بڕیەن و پەی بەرژەوەندی تاکە کەسی وېشا دەسشا نیان سەرو سروەت و سامانېو کە هێنوو تاک بە تاکوو کۊمەڵگایا.
ئېمە پېسەو ئەنجۆمەن فەرهەنگی ئەدەبێو ڕۊجیاروو مەریوانی پڕ بەدڵ ئی هەرمانە ناشیرینێ و نا ئێنسانیێ شەرمەزار کەرمۍ و داوا کەرمۍ جە لایەنە پەیوەنیدارەکا کە بێدەنگێ نەبا و پەی وەرپەرچوو ئی کاریە حەر هەرمانێوە دەسشانە مەی درێغ نەکەرا.ئەنجۆمەن تاکو ماوێوی کۊرت و کۆتا سەبر کەرۊ و داوا کەرۊ جە لایەنگرەکاش کە هێمنی وېشا پارێزنا ، تاکو بزانمێ لایەنێ پەیوەنیدارێ چ بڕیارێو مد٘ا.ئەر قسێ دڵوو تاک بە تاکوو لایەنگرەکاو ئەنجۆمەنی جە لایەنوو کاربەدەساوە نەژنەویا و وەرگیری چی هەرمانە ناشرینێ نەکریا، ئاوەختە ئەنجۆمەن ڕاچارێوتەر گېرۆنە وەر و جە بەیانیە دماینەشەنە بە شێوێوی کارا و عەمەڵی ئاشکراش کەرۊ.[1]