گەزی چی و جاوی چی.
پێشوان لە بارەی ئەم پەندەوە دەگێڕنەوە: جارێک جوتیارێک لە گوندێک لە کاتی جووتکردندا کوپەڵەیەک لیرەی دۆزییەوە پاشان بردییەوە بۆ ماڵەوە و دایە دەست ژنەکە و وتی: ئەو کوپەڵە لیرەیە هەڵگرە بۆ ڕەمەزان. ڕۆژی دوایی دوو سواڵکەر بۆ سواڵ چوونە ماڵی کابرا و یەکێکیان ناوی (ڕەمەزان) بوو، ئیتر ژنەکە وایزانی کە کۆپەڵە لیرەکە هیی ئەوە، کوپەڵە لیرەکەی دا بە سواڵکەرەکە و ڕۆشت. ڕۆژی دوایی جوتیارەکە داوای کوپەڵە لیرەکە لە ژنەکەی کرد، ئەو‌یش ورد و درشت هەموو بۆ گێڕایەوە کە سواڵکەرەکان لیرەکەیان بردووە.
کابرای جوتیار لە خەفەتا سەریخۆی هەڵدەکڕان و وتی: هەر کاتێک لەم ژنەی خۆم کەرتر بینی ئینجا دەگەڕێمەوە. جوتیار ڕۆیشت و زۆر ماندوو بوو، لەسەر کانی و ئاوێک دانیشت. لەناکاو ئافرەتێک هاتەسەر کانییەکە، جوتیارەکەی بینی زۆر مەلوول بوو، ئافرەتەکە وتی: کاکە بۆچی وا ماندووی، چی قەوماوە، هەبێت و نەبێت لە جێگەیەکی دوورەوە هاتووی، جوتیارەکەش تاقەتی دەمەتەقێت نەبوو، وتی: لە جەهانەمەوە هاتوومەتەوە! ئافرەتەکە وتی: دەی توخوا پێم بڵێ: کاکە حەمەی برام چۆنە، دوو ساڵە مردووە هەواڵم لێی نییە! جوتیارەکە زانی ئافرەتەکە ئاگای لە دنیا نییە وتی: بەرەوەڵا بە یەکەوەبووین بەڵام حاڵی زۆر خراپە چونکە قەرزارە، ڕۆژ نییە فەلاقەی نەکەن، ئافرەتەکە بە پرتاو چووەوە بۆ ماڵەوە و هەرچی زێڕ و شتی بەنرخە بوو بۆ جوتیارەکەی هێنا و وتی: قوربانتبم، بڕۆ خێرا بۆیبەرە بەڵکوو لەو قەرزانە ڕزگاری بێت، جوتیار کەلوپەلەکانی هەڵگرت و ڕۆشت تا گەیشتە دووکانی جۆڵایەک لەوێ دانیشت و پشوویدا.
لاولاوە مێردی ئافرەتەکە ڕۆشتەوە بۆ ماڵەوە، ئافرەت هەرچی هەبوونەبوو بۆ مێردەکەی گێڕایەوە، مێردەکەی زانی جوتیارەکە فێڵی لە ژنەکەی کردووە، خێرا تفەنگەکەی هەڵگرت و سواری ئەسپەکەی بوو ڕۆشت، بەڕێکەوت بەرەو دووکانی جۆڵاکە، لە دوورەوە جوتیارەکە زانی مێردی ئافرەتەکەیە بە جۆڵاکەی وت: ئاغا بەدوای کەسێکدا دەگەڕێت کە گەزی کوورت و جاوی پاک بدورێت، خێرا وەرە خۆت بشارەوە، کابرای جۆڵا چووە سووچی دووکانەکەوە و خۆی شاردەوە.
مێردی ئافرەتەکە ئەسپەکەی لەبەردووکانەکەدا ڕاگرت و تفەنگەکەی کرد بە زینی ئەسپەکەوە و هاتە دووکانەکە و وتی: کابرایەکتان لەو ڕەنگە و لەو شێوەیە نەدیوە، جوتیارەکەش بە ڕووخسار ئاماژەی بۆ سووچی دووکانەکە دەکرد و بە دەمیش ئەیوت نەمدیوە! مێردی ئافرەتەکە زوو تێگەیی کە مەبەستی چییە بۆیە چووە گیانی جۆڵا و دەستی بە لێدانی کرد، جۆڵاش دەیوت گەزم کوورت نییە و جاوم پاکە. جوتیاریش کە دووکانەکە هاتەدەر و سواری ئەسپەکە بوو تفەنگەکەشی برد. مێردی ئافرەتەش هەر لە جۆڵای دەدا کە بینی ئەسپەکەی و تفەنگەکەشی تیاچوو، دوایی تێگەیی گەزی چی و جاوی چی، گەڕایەوە بۆ ماڵەوە و وتی: ئافرەت حەمەی برات زۆر قەرزاربوو تفەنگ و ئەسپەکەشم بۆ نارد. جوتیاریش بۆ ماڵی خۆیان گەڕایەوە.[1]