خەندان- سۆران کەریم
بەڕێوەبەرایەتی پۆلیسی گەرمیان، ئاماری تاوان و ڕووداوە جۆراوجۆرەکانی ساڵی 2013ی خستەڕوو، کە تیایدا زیاتر لە هەزار تاوان و ڕووداو تۆمارکراون، له و ئامارەدا ئەوەخراوەتەڕوو، کە لەساڵی ڕابردوودا 24 تاوانی کوشتنی پیاوان بەمەبەست و بەهەڵە تۆمارکراون، بەڵام تاوانی خراپ بەکارهێنانی ئامێرەکانی پەیوەندیکردن لە چاو ساڵی 2012دا کەمی کردووە.
بەپێی ئامارێکی بەڕێوەبەرایەتی پۆلیسی گەرمیان، کە وێنەیەکی دراوە بەخەندان، لەماوەی ساڵی 2013 دا هەزار و 60 تاوان و ڕووداوی جۆراوجۆر لەسنورەکەدا تۆمارکراون. لە ئامارەکەدا ڕوونکراوەتەوە، کە 866 تاوانیان ئاشکراکراون، بەڵام 259 یان بەئاشکرانەکراوی ماونەتەوە.
لە ئامارەکەدا ڕوونکراوەتەوە، کە 11 تاوانی کوشتنی پیاوان بەمەبەست و 13 تاوانی کوشتنی پیاوان بەهەڵه و سێ حاڵەتی خۆکوشتنی پیاوان و 11 حاڵەتی خنکان بەئاو و هەشت حاڵەتی خنکان بەپەت، ئەنجامدراون. ئەمەش لە کاتێکدایە کە لە ساڵی 2012دا، ژمارەی تاوانەکان جیابوازبوون و کوشتنی پیاوان بەمەبەست 22 تاوان تۆمارکراوە کە تەنها پێنجیان ئەنجامدەرانی ئاشکرا نەکراون، هەروەها سێ حاڵەتی خۆکوشتنی پیاوان هەبووە و دوو تاوانی کوشتن بەهەڵەشە تۆمارکراوە.
بەپێی ئامارەکە، هەر لە ساڵی 2013دا لە سنووری بەڕێوەبەرایەتی پۆلیسی گەرمیان 53 حاڵەتی بەدڕەوشتی و 36 تاوانی ساختەکاری و 192 تاوانی خراپ بەکارهێنانی ئامێری پەیوەندی و 13 تاوانی ڕفاندن و 527 تاوانی شەڕکردنی جۆراوجۆر ڕوویانداوە.
لە سنووری گەرمیاندا و لە ساڵی ڕابردوودا 53 تاوانی دزینی ئۆتۆمبێل و 140 تاوانی دزی قورس تۆمارکراون. بەڵام بەراورد بە ساڵی 2012، خراپ بەکارهێنانی ئامێرەکانی پەیوەندیکردن کەمیکردووە کە لەوساڵەدا 226 حاڵەت تۆمارکراوە، لە گەڵ تۆمارکردنی 10 تاوانی بەدڕەوشتی و 520 شەرکردنی جواروجۆر و 158 دزی لە جۆری دزییە گرنگەکان.
- 10-01-2014